KAaroma 15:1-33
15 Tse mboka twa kola meitaalo natu kwathele mboka aankundi meitaalo, noinatu iyopalela tse yene.
2 Kehe gumwe gwomutse na ningile omukwawo uuwanawa, opo e mu tunge.
3 Oshoka nokuli naKristus ka li a iyopalele ye mwene, ihe ongaashi kwa nyolwa taku ti: “Mboka ye mu sheke, nangame oya sheka ndje wo.”
4 Oshoka iinima ayihe, mbyoka ya nyolwa nale, oya nyolwa yi tu longe, opo tu kale tu na etegameno okupitila meidhidhimiko nomokuhekelekwa kOmanyolo.
5 Kalunga ngoka he tu kwathele tu idhidhimike, nohe tu hekeleke, ne mú kwathele mú kale hamu dhiladhila ngaashi Jesus Kristus,
6 opo mú hambelele Kalunga, He yOmuwa gwetu Jesus Kristus, newi limwe mú li muukumwe.
7 Onkee ano taambathaneni, ngaashi owala Kristus e mú taamba ko, nelalakano lyokusimanekitha Kalunga.
8 Oshoka ngame otandi mú lombwele kutya Kristus okwa ningi omuyakuli gwaamboka ya kenkwa, shi holole kutya Kalunga omunashili, opo a koleke omauvaneko, ngoka a uvanekela oohekulululwa,
9 niigwana opo yi vule okuhambelela Kalunga, omolwohenda ye. Ngaashi owala kwa nyolwa taku ti: “Onkee ano otandi ku tanga mokati kiigwana, nedhina lyoye otandi li imbile omahambelelo”;
10 nokwa ti ishewe: “Nyanyukweni, ne iigwana, pamwe naantu ye”;
11 nokwa ti wo: “Hambeleleni Jehova, ne iigwana ayihe, naantu ayehe naye mu hambelele.”
12 Natango Jesaja okwa ti: “Moluvalo* lwaIsai otamu ka za ngoka ta ka pangela iigwana; iigwana otayi ka kala yi na etegameno muye.”
13 Kalunga, ngoka ha gandja etegameno, ne mú udhithe nenyanyu nosho wo nombili, sho mwe mu inekela, opo mú kale mú na etegameno lya tsa, kekwatho lyoonkondo dhombepo ondjapuki.
14 Aamwatate, ngashingeyi, onda tompwa kombinga yeni kutya omwa udha wo uuwanawa, nontseyo, notamu vulu okupukululathana.*
15 Ihe onde mú nyolele sha yela kombinga yiinima yimwe, opo ndi mú dhimbulukithe ishewe kombinga yayo, omolwuuwanawahenda, mboka nda ulukilwa kuKalunga,
16 opo ndi kale omupiya gwaKristus Jesus kiigwana. Otandi kutha ombinga miilonga iiyapuki yonkundana ombwanawa yaKalunga, opo iigwana yi ninge eyambo lya hokiwa kuKalunga, nolya yapulwa nombepo ondjapuki.
17 Onkee ano onda nyanyukwa, sho ndi li omulongwa gwaKristus Jesus, naasho tandi longo iilonga yaKalunga.
18 Oshoka itandi popi iilonga, mbyoka nda longa kungame mwene, ihe otandi popi kombinga yaashoka Kristus a longa, nokwa popya okupitila mungame, opo a kwathele aantu yomiigwana yimwe, ya vulike kuye.
19 Kekwatho lyombepo ondjapuki, onda vulu okulonga iikumithalonga, niilongankondo nokuuvitha nawanawa onkundana ombwanawa kombinga yaKristus muJerusalem sigo okoshikandjo shaIlliriko.
20 Kungawo, onde shi ningi elalakano lyandje, kaandi uvithile onkundana ombwanawa miitopolwa, moka aantu ya uva nale kombinga yaKristus, opo kaandi tungile kekankameno lyagumwe;
21 ngaashi owala kwa nyolwa taku ti: “Mboka inaaya uvithilwa sha kombinga ye otaye ke mu mona, naamboka inaaya uva sha otaya ku uva ko.”
22 Shoka osho wo sha kala tashi imbi ndje lwiikando kaandi ye kune.
23 Ihe ngashingeyi, kapu na ehala inaandi uvithila lyomiitopolwa mbika, nonda kala nda halelela okuya kune uule womimvo odhindji.*
24 Onkee ano onda hala oku mu mona, sho tandi ya kuSpania, nokonima ngele twa kaleni pamwe uule wokathimbo, tamu thindikile ndje ondjilakati.
25 Ihe ngashingeyi, ondi li pokuya kuJerusalem, ndi ka yakule aayapuki.
26 Oshoka aamwatate yomuMakedonia noyomuAkaia oya gandja iinima yawo nehalo ewanawa, opo ya ambidhidhe aayapuki yomuJerusalem, mboka ya hepa.
27 Odhoshili kutya shoka oye shi ningi nehalo ewanawa, ihe oya li wo ye uvite kutya oye nawo oshinakugwanithwa shoku ya kwathela; molwaashoka aayapuki oya li ya topolelathana naantu yomiigwana iinima yopambepo, aantu yomiigwana oye na oshinakugwanithwa shoku ya kwathela moompumbwe dhawo dhopalutu.
28 Konima ngele nda thikitha iikwatha* yawo, nokushilipaleka kutya oye yi mona, otandi ka pita pune, sho tandi yi kuSpania.
29 Kakele kaashono, ondi shi shi kutya sho tandi ke ya kune, otandi ke ya nomalalekonuuyamba ogendji ga za kuKristus.
30 Ngashingeyi, aamwatate otandi mú ladhipike omolwOmuwa gwetu Jesus Kristus nomolwohole, ndjoka hayi zi mombepo ondjapuki, mú galikane pamwe nangame kuKalunga mwa mana mo kombinga yandje,
31 opo ndi hupithwe mokati kaamboka kaaye shi ooitaali yomuJudea, naayapuki, mboka ye li muJerusalem, ya vule okutaamba ko iikwatha, mbyoka tandi ya faalele,
32 nongele Kalunga okwe shi hala, otandi ya kune nda nyanyukwa, notu tsaathaneni omukumo.*
33 Kalunga, ngoka ha gandja ombili, na kale pamwe nane amuhe. Amen.
Omanyolo gopevi
^ Eln., “momudhi.”
^ Nenge “okulongathana.”
^ Nenge tashi vulika, “dhontumba.”
^ Eln., “iiyimati.”
^ Nenge “talalekathaneni.”
