KAaroma 16:1-27
16 Onda hala mú tseye omumwameme Foibe, ngoka ha kwathele megongalo lyaKenkrea,
2 opo mú vule oku mu taamba ko mOmuwa momukalo, ngoka gwa opalela aayapuki, nomu mu pe ekwatho kehe a pumbwa, oshoka naye wo ye mwene okwa kala ta kwathele oyendji, nangame nda kwatelwa mo.
3 Kundilii po Priska naAkula, aalongi pamwe nangame muKristus Jesus,
4 mboka ya tula oomwenyo dhawo moshiponga omolwandje,* ihe hangame awike tandi ya pandula, ihe nomagongalo agehe wo gomiigwana.
5 Kundilii po wo egongalo, ndyoka hali gongalele megumbo lyawo nosho wo kuume kandje omuholike, Epainetus, gumwe gwomaalanduli yotango* yaKristus muAsia.
6 Kundilii po Maria, ngoka a longo nuudhiginini omolweni.
7 Kundilii po Andronikus naJunias, aakwanezimo yandje, mboka twa li nayo mondholongo, aalumentu ya tseyika nawa ye li aayapostoli, noya kala aalongwa yaKristus ethimbo ele ye vule ndje.
8 Kundilii po Ampliatus, kuume kandje omuholike mOmuwa.
9 Kundilii po Urbanus, omulongi pamwe natse muKristus, nosho wo kuume kandje omuholike Stakus.
10 Kundilii po Apelles, ngoka a hokiwa kuKristus. Kundilii po wo aanegumbo yaAristobulus.
11 Kundilii po Herodion, omukwanezimo gwandje. Kundilii po aanegumbo yaNarkissus, mboka ye li aalanduli yOmuwa.
12 Kundilii po Trifania naTrifosa, aakiintu, mboka haya longele Omuwa nuudhiginini. Kundilii po Persis, kuume ketu omuholike, oshoka okwa longela Omuwa nuudhiginini.
13 Kundilii po Rufus, omuhogololwa gwOmuwa, nosho wo yina, ngoka a kala ongameme.
14 Kundilii po Asinkritus, Flegon, Hermes, Patrobas, Hermas, nosho wo aamwahe, mboka ye li nayo.
15 Kundilii po Filologus naJulia, Nereus nomumwayinakadhona, nosho wo Olimpas naayapuki ayehe, mboka ye li nayo.
16 Ikundeni mokwiihupita pahole. Omagongalo agehe gaKristus otage mu kundile po.
17 Aamwatate, otandi mú kumagidha, mú kale mwa kotokela mboka taya eta etopoko, notaye mú ningitha mú kale mú li ompinge nomalongo, ngoka mwa ilonga. Kaleni kokule nayo.
18 Oshoka aantu ya tya ngeyi kaye shi aapiya yOmuwa gwetu Kristus, ihe aapika yomala* gawo yene, nohaya heke aantu kaaye na ondjo noohapu tadhi nywitha omakutsi nodhokambweenga.
19 Okuvulika kweni okwa tseyika kaantu ayehe, onkee ano onde mú nyanyukilwa. Ihe onda hala mú kale aanandunge, opo mú tseye iinima mbyoka iiwanawa, nomu kale kaamu shi okulonga uuwinayi.
20 Masiku, Kalunga, ngoka ha gandja ombili, ota ka nyanyagulila Satana kohi yoompadhi dheni. Uuwanawahenda wOmuwa gwetu Jesus nawu kale pamwe nane.
21 Timoteus, omulongi pamwe nangame, ote mú kundile po, nosho wo Lukius, Jason naSosipater, aakwanezimo yandje.
22 Ngame, Tertius, ngoka nda nyola ontumwafo ndjika palombwelo lyaPaulus, otandi mú kundile po mOmuwa.
23 Gaius, ngoka a edhilila ndje megumbo lye, nomo hamu gongala egongalo alihe, ote mú kundile po. Erastus, omudhiginini gwiimaliwa* yoshilando, ote mú kundile po, nosho wo Kwartus, omumwayinamati.
24 ——
25 Onkundana ombwanawa, ndjoka tandi uvitha nosho wo etumwalaka kombinga yaJesus Kristus, otayi ulike kutya Kalunga ota vulu oku mú koleka. Onkundana ndjika ombwanawa oyi na ko nasha nokuuva ko oshiholekwa oshiyapuki, shoka Kalunga a holola. Oshiholekwa shika osha kala sha holekwa uule wethimbo ele.
26 Ihe ngashingeyi osha hololwa, nosha tseyithilwa iigwana ayihe okupitila mOmanyolo gaahunganeki metsokumwe nelombwelo lyaKalunga kaaluhe. Ehalo lye olyo kutya iigwana ayihe yi itaale mu ye, noyi vulike kuye;
27 Kalunga, ngoka oye awike omunandunge, na simanekwe okupitila muJesus Kristus sigo aluhe. Amen.
Omanyolo gopevi
^ Nenge “omolwomwenyo gwandje.”
^ Eln., “gwomiiyimati yotango.”
^ Nenge “yomahalo gokulya.”
^ Nenge “omupiya.”
