KAaroma 2:1-29
2 Onkee ano ito vulu okwiipopila, kutya nduno ongoye lye, ngele oho pangula yalwe. Oshoka uuna to pangula yalwe, oto ipangula ngoye mwene, molwaashoka nangoye oho ningi shoka haya ningi.
2 Otu shi shi kutya Kalunga oku li mondjila, sho ta pangula mboka haya ningi iinima mbyoka.
3 Ihe mbela oto dhiladhila kutya oto vulu okuya ontuku epangulo lyaKalunga, uuna to pangula aantu, mboka haya ningi iinima, mbyoka nangoye wo ho ningi?
4 Nenge owa dhina esilohenda enene lyaKalunga, ontalanteni neidhidhimiko lye, molwaashoka ino tseya kutya omolwesilohenda lye, Kalunga ota kambadhala oku ku kwathela, wu itedhulule?
5 Ihe molwaashoka owa kukutika omutima gwoye, noino hala okwiitedhulula, oto ipungulile ondjahi mesiku lyondjahi yaKalunga, sho ta ka pangula aantu pauyuuki.
6 Ota ka futa kehe gumwe sha ikolelela kiilonga ye.
7 Kalunga ota ka gandja omwenyo gwaaluhe kwaamboka taya lalakanene eadhimo, esimano nosho wo omalutu ihaagu yonuka, mokutsikila neidhidhimiko okulonga iilonga, mbyoka iiwanawa;
8 ihe mboka ye hole oontamanana naamboka ihaaya vulika koshili, ihe ohaya longo iilonga iiwinayi, otaya ka adhika kondjahi nokegeelo lyaKalunga.
9 Uudhigu nuuwehame otawu ka adha aantu ayehe,* mboka haya longo uuwinayi; tango otawu ka adha Aajuda, taku landula Aagreka;
10 ihe kehe gumwe, ngoka ta longo uuwanawa, Kalunga ote ke mu pa eadhimo, esimano nombili; tango ote ke yi pa Aajuda, taku landula Aagreka.
11 Oshoka Kalunga ke na nando okatongo.
12 Ayehe mboka ya yono inaaya tseya ompango otaya si wo, nonando inaya tseya ompango. Ihe mboka ya yono ye shi ompango otaya ka pangulwa sha ikolelela kompango.
13 Oshoka mboka haya uvu owala ompango hayo aayuuki koshipala shaKalunga, ihe mboka haya vulika kompango oyo ya talika ko aayuuki.
14 Oshoka aantu yomiigwana, mboka kaaye na ompango, uuna taya gwanitha po paunshitwe shoka tashi pulwa kompango, nonando kaye na ompango, oyo ompango kuyo yene.
15 Oyo yene haya ulike kutya shoka ompango tayi ti osha nyolwa momitima dhawo, sho eiyuvo lyawo hali ya hololele kutya shoka ya longa oshiwanawa, nenge oshiwinayi, nokungawo ohaya mono kutya oye na ondjo moshinima shontumba, nenge hasho.
16 Shika otashi ka ningwa uuna Kalunga ta ka pangula iilonga yaantu yomeholamo okupitila muJesus Kristus sha ikolelela konkundana ombwanawa, ndjoka tandi uvitha.
17 Ihe ngele ngoye oho iti kutya Omujuda, nowa inekela ompango, noho itangele ekwatathano lyoye naKalunga,
18 ehalo lyaKalunga owu li shi, nowa taamba ko iinima iiwanawa lela, molwaashoka owa longwa* Ompango;
19 owa tompwa lela kutya ngoye omukwatiketi gwaaposi, uuyelele kwaamboka ye li momilema,
20 omupukululi gwaamboka kaaye na oondunge, omulongi gwaanona, nowu shi omalongo gompango gopetameko noshili, ndjoka yi li mOmpango—
21 ihe mbela ngoye, ngoka ho longo yalwe, omolwashike ihoo ilongo ngoye mwene? Ngoye ngoka ho uvithile yalwe kutya “ino yaka,” omolwashike ngoye ho yaka?
22 Ngoye, ngoka to lombwele yalwe kutya “ino hondela,” ngoye omolwashike ho hondele? Ngoye, ngoka wu tonde iikalunga, omolwashike ho yaka mootempeli?
23 Ngoye, ngoka ho itangele ompango, omolwashike wa dhina Kalunga, sho ihoo vulika kOmpango?
24 Oshoka “edhina lyaKalunga otali shekwa mokati kiigwana omolweni,” ngaashi owala sha nyolwa.
25 Okukenkwa oku na owala uuwanawa, uuna to vulika kompango, ihe ngele owa dhina ompango, nena ekenko lyoye itali ti sha.
26 Onkee ano ngele omuntu, ngoka inaa kenkwa, oha vulika kiitegelelwa yi li pauyuki yOmpango, mbela okwaakenkwa kwe itaku talika ko ku li ekenko?
27 Omuntu ngoka inaa kenkwa ote ke mú pa uusama, sho ha vulika kOmpango, oshoka ne ohamu yono ompango, nonando omu yi na ya nyolwa, nomwa kenkwa.
28 Oshoka okukala Omujuda gwashili inaku ikolelela keholokopo lyokombanda, nokukenkwa kwe itaku hololwa keholokopo lyokombanda, ano panyama.
29 Ihe okukala Omujuda gwashili okwa kwatela mo uuntu womeni, nekenko lye olyo ndyoka lyokomutima. Ombepo ondjapuki oyo ye shi ningitha tashi wapa, ihe hampango. Omuntu a tya ngaaka ota pewa esimano kuKalunga, ihe hakaantu.
