KAaroma 3:1-31
3 Ano okukala Omujuda, nenge okukenkwa oku na uuwanawa washike?
2 Oku na uuwanawa owundji. Shotango, ooshono kutya Aajuda oya li ya inekelelwa etumwalaka eyapuki lyaKalunga.
3 Ihe ongiini nduno ngele yamwe kaye na eitaalo? Mbela sho kaaye na eitaalo osha hala okutya Kalunga ke shi omwiinekelwa?
4 Hasho nando! Nonando aantu ayehe oya kale aaniifundja, Kalunga omunashili, ngaashi owala kwa nyolwa taku ti: “Oto ka ulika kutya ngoye omuyuuki okupitila moohapu dhoye, nongele taye ku pangula, oto sindana.”
5 Ihe ngele okwaanuuyuuki kwetu otaku holola kutya Kalunga omuyuuki, otatu shi tile ngiini? Ngele Kalunga te tu geele, mbela shoka osha hala okutya ke shi omuyuuki? (Aantu yamwe osho haya dhiladhila ngawo.)
6 Hasho nando! Oshoka ngele osho, Kalunga ota vulu ngiini okupangula uuyuni?
7 Ihe ngele oshili yaKalunga, ndjoka tayi mu simanekitha, otayi hololwa nawa kiifundja yandje, omolwashike ndi na wo okupangulwa ongomulunde?
8 Omolwashike wo ihaatu ti: “Natu longeni uuwinayi, opo tu mone uuwanawa,” ngaashi yamwe haye tu lundile kutya osho hatu ti? Aantu ya tya ngaaka otaya ka pangulwa, noshi li pauyuuki, sho taya ka pangulwa.
9 Mbela shono osha hala okutya otu vule yalwe? Hasho nando! Oshoka ngaashi twe shi popi metetekelo, Aajuda nosho wo Aagreka ayehe aalunde;
10 ngaashi owala kwa nyolwa taku ti: “Kaku na nando omuntu gumwe omuyuuki;
11 kaku na nando ogumwe e na oondunge; kaku na nando ogumwe ta kongo Kalunga.
12 Aantu ayehe oya pilamena Kalunga, ayehe oya ninga aantu yowala; kaku na nando ogumwe ta longo uuwanawa.”
13 “Omiligu dhawo odha fa ombila ya ekama; ohaya kotokele nomalaka gawo.” “Oye na uuzigo womayoka komilungu dhawo.”*
14 “Omakana gawo oga udha ethingo nuuwinayi.”
15 “Oompadhi dhawo ohadhi endelele okutilahi ombinzi.”
16 “Aluhe, ohaya hepeke aantu noku ya monitha iihuna,
17 nondjila yombili kaye yi shi.”
18 “Ihaya tila Kalunga.”
19 Otu shi shi kutya iinima ayihe, mbyoka ya popiwa mOmpango, otayi popi mboka ye li kohi yOmpango, opo kaapu kale nando ogumwe gwomuyo ta ka ipopila, nokuulika kutya uuyuni awuhe owu na ondjo koshipala shaKalunga, nowa gwana okupangulwa.
20 Onkee ano kapu na ngoka* ta vulu okutya ye omuyuuki koshipala shaKalunga, omolwokugwanitha po shoka tashi pulwa kompango, oshoka ompango oye tu kwathela tu uve ko thiluthilu kutya uulunde oshike.
21 Ihe ngashingeyi, osha yela kutya aantu otaya vulu okukala aayuuki koshipala shaKalunga, nonando itaya dhiginine Ompango, naashoka osha popiwa mOmpango nokaahunganeki.
22 Eeno, ayehe, mboka ye na eitaalo, otaya vulu okukala aayuuki koshipala shaKalunga omolweitaalo muJesus Kristus. Oshoka Kalunga ke na okatongo.
23 Oshoka ayehe oya yona, nokaye na eadhimo lyaKalunga,
24 nomolwomagano, gesilohenda lye otaya ithanwa aayuuki, okupitila mekuliloyambo, ndyoka lya futwa kuKristus Jesus.
25 Kalunga okwe mu gandja e li eyambo, opo aantu ya kale nombili naye, omolweitaalo lyawo mombinzi yaKristus. Shoka Kalunga okwe shi ningi, opo a ulike uuyuuki we, nomolwontalanteni* ye, okwa dhimine po aantu omayono gawo gomonakuziwa.
26 Shoka okwe shi ningi a ulike uuyuuki we pethimbo lyongashingeyi, sho a tala ko aantu, mboka ya itaala muJesus, ye li aayuuki.
27 Okwiitanga otaku kwatha nduno shike? Itaku kwatha sha. Ompango yini tayi keelele omuntu kaa itange? Mbela oyo ndjoka tayi ti kutya shoka a longa osha simana? Hasho nando, ihe oondjoka tayi ti kutya oku na okukala e na eitaalo.
28 Oshoka otu shi shi kutya omuntu ota ningi omuyuuki omolweitaalo lye, ihe hamolwaashoka ta gwanitha po shoka tashi pulwa kompango.
29 Nenge mbela ye oKalunga kAajuda owala? Mbela ke shi wo Kalunga kaantu yomiigwana? Eeno, oKalunga wo kaantu yomiigwana.
30 Molwaashoka Kalunga gumwe awike, ota tala ko aantu mboka ya kenkwa nosho wo mboka inaaya kenkwa, ye li aayuuki, omolweitaalo lyawo.
31 Ihe mbela shono osha hala okutya otatu hulitha po ompango omolweitaalo lyetu? Hasho nando! Mepingathano naashono, ohatu dhiginine ompango.
Omanyolo gopevi
^ Nenge “omilungu dhawo otadhi popi oohapu dha fa uuzigo womayoka.”
^ Eln., “onyama.”
^ Nenge “eidhidhimiko.”
