KAaroma 4:1-25
4 Ngele osho shi li ngawo, oshike tatu vulu okutya kombinga yaashoka tatekulululwa Abraham a pewa panyama?
2 Pashiholelwa, ngele Abraham okwa li a talika ko e li omuyuuki omolwiilonga ye, ando okwa kala e na etompelo lyokwiitadha, ihe hakoshipala shaKalunga.
3 Enyolo otali ti shike? Otali ti: “Abraham okwa itaale muJehova, onkee okwa talika ko omuyuuki.”
4 Uuna omuntu a longo, oha pewa ondjambi, nondjambi ye ndjoka kayi shi yuuwanawahenda, ihe okwe yi ilongela.
5 Mepingathano naashono, ngele gumwe okwa kala e na eitaalo muKalunga, ihe ina inekela owala miilonga ye, Kalunga ote ke mu tala ko omuyuuki, omolweitaalo lye. Kalunga oye ta vulu okutala ko omulunde kutya omuyuuki.
6 David naye okwa popi kutya omuntu, ngoka a talwa ko omuyuuki kuKalunga, nonando iilonga ye kayi li metsokumwe thiluthilu nompango, ota kala a nyanyukwa.
7 “Mboka ya dhiminwa po omolwiilonga yawo iiwinayi, nomayono gawo ga siikilwa* oya nyanyukwa;
8 omuntu, ngoka omayono ge itaaga dhimbulukiwa kuJehova, ota kala a nyanyukwa.”
9 Mbela aantu mboka ya kenkwa, oyo owala taya vulu okukala ya nyanyukwa, nenge naamboka wo inaaya kenkwa? Oshoka tse ohatu ti: “Abraham okwa talika ko e li omuyuuki, omolweitaalo lye.”
10 Uunake Kalunga a li e mu tala ko omuyuuki? Okonima sho a kenkwa, nenge omanga inaa kenkwa? Kalunga okwa li e mu tala ko omuyuuki, omanga a li inaa kenkwa.
11 Kalunga okwa li e mu lombwele a kenkwe, naashoka osha li endhindhiliko li li oshihako,* ndyoka tali ulike kutya oku li omuyuuki omolweitaalo, ndyoka a adhika e na, omanga inaa kenkwa. Onkee ano okwa ningi he yaayehe mboka ye na eitaalo, nonando inaya kenkwa, opo ya talike ko aayuuki;
12 noku vule okuninga he yoluvalo ndwoka lwa kenkwa; ita ningi owala he yaamboka haya dhiginine ekenko, ihe ota ningi wo he yaamboka ye na eitaalo, ngaashi tate yetu Abraham, manga a li inaa kenkwa.
13 Abraham, nenge oluvalo* lwe, inaya uvanekelwa kutya otaya ka thigulula uuyuni, molwaashoka haya dhiginine ompango, ihe omolwaashoka ya talika ko aayuuki omolweitaalo lyawo.
14 Oshoka ngele mboka haya dhiginine ompango aathigululi, nena okukala meitaalo itaku kwatha sha, neuvaneko itali ti sha.
15 Paulelalela, Ompango ohayi tukulutha ondjahi yaKalunga, ihe ngele kapu na ompango, nena kapu na wo okuyona.
16 Abraham okwa uvanekelwa euvaneko ndyoka omolweitaalo lye, nomolwuuwanawahenda waKalunga, opo li gwanithilwe ayehe yomoluvalo* lwe, haamboka owala haya vulika kompango, ihe naamboka wo haya holele eitaalo lyaAbraham, ngoka e li tate yetu atuheni.
17 (Ongaashi owala kwa nyolwa taku ti: “Onde ku langeka po wu ninge he yiigwana oyindji.”) Abraham okwa ulike eitaalo ndyoka koshipala shaKalunga, ngoka ha yumudha aasi, noha popi iinima, mbyoka inaayi ningwa, ya fa ya ningwa nale.*
18 Nonando osha li sha fa itaashi wapa, okwa li e na etegameno neitaalo kutya ota ka ninga he yiigwana oyindji, ngaashi owala kwa nyolwa taku ti: “Oluvalo* lwoye nalwo wo otalu ka indjipala.”
19 Nonando eitaalo lyaAbraham kalya li lya nkundipala, okwa li ta dhiladhila kutya ita vulu we okumona aanona, (molwaashoka okwa li e na omimvo 100 lwaampono), nokwa li e shi kutya Sara okwa kulupa unene nokumona aanona.
20 Ihe omolweuvaneko lyaKalunga, eitaalo lye inali tengauka; ihe eitaalo lye olye mu koleke e ta hambelele Kalunga,
21 nokwa li a tompwa thiluthilu kutya shoka Kalunga a uvaneka, ota vulu wo oku shi gwanitha po.
22 Onkee ano “okwa talika ko omuyuuki.”
23 Ihe oohapu, ndhoka tadhi ti kutya “okwa talika ko omuyuuki,” inadhi ukithwa owala kuye awike,
24 ihe nokutse wo, mboka twa talika ko aayuuki, molwaashoka twa itaala muKalunga, ngoka a yumudha Jesus, Omuwa gwetu, kuusi.
25 Jesus okwa li a gandjwa, a se omolwoondjo dhetu, nokwa yumudhwa, opo tu kale aayuuki koshipala shaKalunga.
Omanyolo gopevi
^ Nenge “ga dhimwa po.”
^ Nenge “eshilipaleko”
^ Eln., “ombuto.”
^ Eln., “yomombuto.”
^ Nenge tashi vulika, “ha etitha shoka kaasha li po.”
^ Eln., “ombuto.”
