KAaroma 5:1-21
5 Molwaashoka ngashingeyi otwa talika ko tu li aayuuki omolweitaalo, natu kaleni tu na ombili* naKalunga, okupitila mOmuwa gwetu, Jesus Kristus,
2 ngoka wo molwaashoka tu na eitaalo muye, e shi ningitha tashi wapa tu mone uuwanawahenda waKalunga, mboka hatu nyanyukilwa ngashingeyi. Natu nyanyukweni,* molwaashoka otu na etegameno kutya Kalunga ote ke tu pa eadhimo lye.
3 Hasho ashike shoka, ihe natu kale twa nyanyukwa,* nonando otwa taalela omaudhigu, molwaashoka otu shi shi kutya omaudhigu ohage tu kwathele tu idhidhimike;
4 neidhidhimiko, ohali tu kwathele tu kale twa hokiwa kuKalunga, naashoka otashi tu pe etegameno,
5 netegameno ihali tu yemateke; molwaashoka ohole yaKalunga oya tililwa momitima dhetu okupitila mombepo ondjapuki, ndjoka twa pewa.
6 Oshoka odhoshili kutya manga kaatwa li tu na etegameno,* Kristus okwa sile aakaanakalunga pethimbo lya opala.
7 Oshoka oshidhigu kugumwe a sile omuntu omuyuuki; ihe ngele tashi ya komuntu omwaanawa, gumwe otashi vulika a kale a hala okusa pehala lye.
8 Ihe Kalunga okwe tu ulukile ohole ye, oshoka Kristus okwe tu sile, manga twa li aalunde.
9 Kakele kaashono, molwaashoka otwa talika ko tu li aayuuki omolwombinzi ye, itatu ka adhika kondjahi yaKalunga.
10 Oshoka ngele sho twa li aatondi yaKalunga, otwa hanganithwa* naye okupitila meso lyOmwana, osha yela wo kutya otatu ka hupithwa, sho ngashingeyi twa hanganithwa naKalunga, molwaashoka Jesus oku na omwenyo.
11 Hasho owala shoka, ihe otatu nyanyukilwa wo shoka Kalunga e tu ningila okupitila mOmuwa gwetu, Jesus Kristus, ngoka e shi ningitha tashi wapa, opo tu hangane* naKalunga.
12 Uulunde owe ya muuyuni okupitila momuntu gumwe, neso olye ya omolwuulunde, onkee ano eso olya taandele maantu ayehe, molwaashoka ayehe aalunde.
13 Oshoka uulunde owa li muuyuni, omanga Ompango kaaya li po, ihe omuntu ngele okwa yono, uuna kaapu na ompango, nena ke na ondjo.
14 Ihe nonando ongawo, eso olya kala tali pangele lya fa omukwaniilwa, okuza pethimbo lyaAdam sigo okuMoses, mwa kwatelwa wo naamboka inaaya yona momukalo, moka Adam a yono. Adam okwa li a faathana naangoka a li a uvanekwa kutya ote ke ya.
15 Ihe omagano gaKalunga inaga fa eyono lyaAdam. Oshoka aantu oyendji oya si omolweyono lyomuntu gumwe. Ihe aantu oyendji oya mona uuwanawahenda uunene waKalunga, okupitila momuntu gumwe, Jesus Kristus.
16 Shimwe ishewe, opu na eyooloko pokati komagano gaKalunga neyono lyomuntu gumwe, ngoka a yono. Ihe omagano, ngoka ga gandjwa omolwomayono goyendji, oga ningitha aantu oyendji ya talike ko aayuuki.
17 Oshoka omolwokuyona kwomuntu gumwe, eso olya tameke okupangela maantu, lya fa omukwaniilwa, omolwomuntu ngoka gumwe. Ihe otatu vulu okukala nuushili kutya mboka ya pewa omagano guuyuuki nuuwanawahenda waKalunga uunenenene, otaya ka kala nomwenyo okupitila momuntu gumwe, Jesus Kristus, ya ka pangele ye li aakwaniilwa.
18 Onkee ano ngaashi owala aantu ayehe ya tokolelwa eso, omolweyono lyomuntu gumwe, otaya talwa ko wo aayuuki, notaya ka mona omwenyo omolwoshilonga shuuyuuki shomuntu gumwe.
19 Ngaashi owala okwaavulika kwomuntu gumwe kwa ningitha aantu oyendji ya ninge aalunde, osho tuu wo okuvulika kwomuntu gumwe kwa ningitha aantu oyendji ya ninge aayuuki.
20 Ompango oya gandjwa, opo aantu ya mone kutya oya yona shi thike peni. Ihe ngele omayono oga indjipala, nuuwanawahenda ohawu indjipala.
21 Mbela onelalakano lyashike? Ngaashi owala uulunde neso ya kala tayi pangele ngaashi omukwaniilwa, osho tuu wo uuwanawahenda waKalunga tawu kala tawu pangele ngaashi omukwaniilwa omolwuuyuuki, notawu ka etela aantu omwenyo gwaaluhe, okupitila muJesus Kristus, Omuwa gwetu.
Omanyolo gopevi
^ Nenge tashi vulika, “natu nyanyukilweni.”
^ Nenge tashi vulika, “otwa nyanyukwa.”
^ Nenge tashi vulika, “otwa nyanyukwa.”
^ Eln., “aankundi.”
^ Nenge “panga uukuume.”
^ Nenge “pange uukuume.”
