KAaroma 6:1-23
6 Otu tye nduno shike? Mbela natu tsikile owala okukala muulunde, opo uuwanawahenda waKalunga wu vule okwiindjipala?
2 Hasho nando. Ongiini tatu vulu okutsikila okukala muulunde, sho ngashingeyi twa manguluka mo muwo?
3 Nenge kamu shi shi kutya atuhe, mboka twa ninginithwa muukumwe naKristus Jesus, otwa ninginithwa muukumwe neso lye?
4 Onkee ano otwa fumvikwa pamwe naye okupitila meninginitho lyetu nomeso lye, opo ngaashi owala Kristus a yumudhwa kuusi okupitila meadhimo lyaHe, osho wo natse otu na okweenda mokukalamwenyo okupe.
5 Ihe ngele otwa hangana naye mokusa ngaashi ye, odhoshili kutya otatu ka hangana wo naye mokuyumudhwa kuusi ngaashi ye.
6 Oshoka otu shi shi kutya omuntu gwetu omukulu okwa alelwa pamwe naye komuti, opo olutu lwetu olulunde kaalu tu pangele we, nokaatu kale we aapika yuulunde.
7 Oshoka ngele omuntu okwa si, okwa manguluka* ko kuulunde we.
8 Kakele kaashono, ngele otwa si pamwe naKristus, otwa itaala kutya otatu ka kala wo tu na omwenyo pamwe naye.
9 Oshoka otu shi shi kutya sho ngashingeyi Kristus a yumudhwa kuusi, ita ka sa we; eso ka li na we oonkondo dhoku mu pangela.
10 Oshoka sho a si, okwa si a kuthe po uulunde* lumwe aluke, ihe ngashingeyi oku na omwenyo, opo a longe ehalo lyaKalunga.
11 Sha faathana, ngele tashi ya kuulunde, italii ko mwa sa, nonando omu na omwenyo, opo mú longe ehalo lyaKalunga, mú li aalanduli yaKristus Jesus.
12 Onkee ano inamu etha uulunde wu tsikile okupangela wa fa omukwaniilwa momalutu geni, ngono haga vulu okusa, opo kaamu igandje komahalo gago.
13 Inamu tsikila wo okugandja omalutu* geni kuulunde, opo mwaa longe shoka inaashi uka,* ihe ituleni miikaha yaKalunga, mwa fa mwa yumudhwa kuusi, mú kale nomwenyo. Tuleni omalutu* geni miikaha yaKalunga, mú longe shoka sha uka.
14 Inamu pangelwa kuulunde, oshoka ngashingeyi, kamu li we kohi yompango, ihe omu li kohi uuwanawahenda waKalunga.
15 Otatu ti nduno shike? Mbela otu na okuyona, molwaashoka kaatu li we kohi yompango, ihe okohi yuuwanawahenda waKalunga? Hasho nando!
16 Mbela kamu shi kutya ngele omwa igandja, mú vulike kugumwe ngaashi aapika, nena omu li aapika ye? Ano ngele omu li aapika yuulunde, otawu mú fala meso, ihe ngele omu li aapiya yaKalunga, nohamu vulika kuye, otamu ka longa shoka sha uka.
17 Ihe Kalunga na hambelelwe, oshoka nonando omwa li aapika yuulunde, ngashingeyi ohamu vulika nomutima aguhe kelongo, ndyoka Kalunga e mú pa.
18 Eeno, molwaashoka omwa mangululwa mo muulunde, omwa ninga aapiya yuuyuuki.
19 Otandi popi pantu, omolwuunkundi weni wopanyama, oshoka ngaashi mwa li mwa gandja omalutu geni mú li aapika, ga longe iilonga inaayi yogoka, opo mú longe iilonga iiwinayi, ngashingeyi, gandjeni wo omalutu geni ga longe iilonga yuuyuuki, opo mú longe shoka sha uka.
20 Oshoka sho mwa li aapika yuulunde, omwa li mwa manguluka ko kokulonga uuyuuki.
21 Ihe mbela, pethimbo mpoka, omwa li hamu imike iiyimati yini? Omwa li hamu longo iilonga, mbyoka ngashingeyi tayi mú sitha ohoni, notayi fala meso.
22 Ihe ngashingeyi, sho mwa mangululwa mo muulunde, nomwa ninga aapiya yaKalunga, otamu imike iiyimati yuuyuuki, mbyoka pehulilo tayi ke mú petha omwenyo gwaaluhe.
23 Oshoka ondjambi yuulunde oyo eso, ihe omwenyo gwaaluhe, ogo omagano ngoka Kalunga a gandja, okupitila muKristus Jesus, Omuwa gwetu.
Omanyolo gopevi
^ Nenge “dhiminwa po.”
^ Sha hala okutya, a kuthe po uulunde.
^ Eln., “iilyo.”
^ Eln., “ga ninge iikondjitho yokulonga okwaanuuyuuki.”
^ Eln., “iilyo.”
