KAaroma 7:1-25
7 Aamwatate, mbela kamu shi kutya omuntu oha kala owala e li kohi yOmpango, uuna e li momwenyo? (Otandi popi naamboka ye shi ompango.)
2 Pashiholelwa, pampango, omukiintu, ngoka a hokanwa, oku na okukala nomusamane gwe, omanga e na omwenyo, ihe uuna omusamane gwe a si, okwa manguluka ko kompango yomusamane gwe.
3 Onkee ano ngele okwa hokanwa po komulumentu gulwe i ili, omanga omusamane gwe e na omwenyo, kungawo, ota hondele. Ihe ngele omusamane gwe okwa si, okwa manguluka ko kompango ye, nongele okwa hokanwa po komulumentu gulwe, nena, ita hondele.
4 Onkee ano, aamwatate, nane wo olutu lwaKristus olwe mú mangulula ko* kOmpango yaMoses. Shika osha ningwa, opo mú ninge yomuntu gulwe, ano ngono a yumudhwa kuusi. Onkee ano, ngashingeyi otatu vulu okulongithwa, tu longele Kalunga.*
5 Oshoka sho twa li hatu landula omahalo gopanyama, Ompango oye tu kwathela tu mone kutya omahalo omawinayi gopanyama ogo hage tu ningitha tu longe uulunde, nuulunde ohawu etitha eso.
6 Ihe otwa manguluka ko ngashingeyi kOmpango, onkee ano otu li aapiya yaKalunga momukalo omupe, tatu wilikwa kombepo ye, ihe hakOmpango, ndjoka ya li hayi tu wilike nale.
7 Otatu ti nduno shike? Mbela Ompango oyo uulunde? Hasho nando! Andola kapwa li Ompango, ando inatu tseya kutya uulunde oshike. Pashiholelwa, andola Ompango kaya li ya tya: “Ino kala wu na okahalu,” ando kandi shi kutya okahalu oshike.
8 Ihe omolwoshipango shoka, uulunde owa mono ompito yokupendutha mungame uuhalu woludhi kehe. Ihe sho kaapwa li ompango, kanda li ndi shi uulunde.*
9 Odhoshili kutya onda li ndi na omwenyo, manga kaanda li ndi shi ompango. Ihe sho nda tseya ompango, osha yele mo kutya ngame omulunde.
10 Oshipango, shoka nda li ndi wete kutya otashi etele ndje omwenyo, onda mono kutya otashi etele ndje eso.
11 Ihe omolwoshipango shika, uulunde owa mono ompito, wu pukithe ndje, nowu dhipage ndje.
12 Onkee ano Ompango muyo yene ondjapuki, noshipango oshiyapuki, oshi li pauyuuki noshiwanawa.
13 Onkee ano mbela shoka oshiwanawa osho sha etitha eso lyandje? Hasho nando! Ihe uulunde owo wa etele ndje eso. Ompango ombwanawa, ihe oya yelithile ndje nawa kutya uulunde owo wa etitha eso lyandje. Onkene oshipango osha ulike nkene uulunde uuwinayi lela.
14 Otu shi shi kutya Ompango oya za kuKalunga,* okupitila mombepo ye ondjapuki, ihe ngame ondi li panyama, nda landithwa po ndi li omupika guulunde.
15 Oshoka kandi uvite ko shoka tandi ningi. Ihandi longo shoka nda hala, ihe ohandi ningi shoka ndi tonde.
16 Ihe ngele otandi longo shoka inaandi hala okulonga, nena otandi zimine kutya ompango ombwanawa.
17 Ihe hangame tandi shi longo, ihe uulunde, mboka wu li mungame.
18 Oshoka ondi shi shi kutya mungame, ano molutu* lwandje, kamu na nando osha oshiwanawa. Oshoka ondi na ehalo lyokulonga shoka oshiwanawa, ihe kandi na oonkondo dhoku shi ninga.
19 Ihandi longo uuwanawa, mboka nda hala okulonga, ihe ohandi longo uuwinayi, mboka inaandi hala okulonga.
20 Ngele nduno ohandi longo shoka inaandi hala, nena hangame tandi shi longo, ihe uulunde, mboka wu li mungame.
21 Ondi na ompango, ndjika yi li mungame: Uuna nda hala okulonga shoka oshiwanawa, ohapu kala pu na sha tashi kondjitha ndje, ndi longe uuwinayi.
22 Ondi hole lela ompango yaKalunga nomutima gwandje aguhe,
23 ihe ondi wete molutu* lwandje ompango yilwe tayi kondjitha ompango, ndjoka tayi pangele omadhiladhilo gandje, notayi kondjithile ndje muupika wompango yuulunde, ndjoka yi li molutu* lwandje.
24 Ngame omulumentu omweetithihenda!* Olye ta mangulula ndje mo molutu, nduka talu si?
25 Kalunga na hambelelwe, molwaashoka ota hupitha ndje okupitila muJesus Kristus, Omuwa gwetu. Onkee ano, pamadhiladhilo gandje, ondi li omupiya gwompango yaKalunga, ihe olutu* lwandje olu li omupika gwompango yuulunde.
Omanyolo gopevi
^ Eln., “kulila.”
^ Eln., “tu imike iiyimati yaKalunga.”
^ Eln., “uulunde owa li wa sa.”
^ Eln., “oyopambepo.”
^ Eln., “monyama.”
^ Eln., “miilyo yolutu.”
^ Eln., “miilyo yolutu.”
^ Nenge “omukweyi.”
^ Eln., “onyama.”
