KAaroma 8:1-39
-
Ombepo yaKalunga otayi gandja omwenyo nemanguluko (1-11)
-
Ombepo oyo yene hayi holola kutya yo oyana yaKalunga (12-17)
-
Eshito alihe olya tegelela emanguluko lyoyana yaKalunga (18-25)
-
‘Ombepo yaKalunga ohayi tu indilile ko’ (26, 27)
-
Mboka ya hogololwa kuKalunga komeho yethimbo (28-30)
-
Esindano kekwatho lyohole yaKalunga (31-39)
8 Onkee ano mboka ye li muukumwe naKristus Jesus itaya ka pangulwa.
2 Oshoka ompango yombepo, ndjoka tayi gandja omwenyo okupitila muKristus Jesus, oye ku mangulula ko kompango yuulunde noyeso.
3 Shoka sha nyenge Ompango omolwuunkundi wolutu,* Kalunga okwe shi ningi, sho a tumu Omwana molupe lwomuntu omulunde, opo a kuthe po oondjo, nokungawo, okwa pangula uulunde, mboka wu li momuntu,*
4 opo tu vule okugwanitha po shoka sha uka, tashi pulwa kOmpango, tse mboka hatu ende metsokumwe nombepo yaKalunga, ihe hapanyama.
5 Oshoka mboka haya vulika kuuhalu wawo wopantu ohaya dhiladhila panyama, ihe mboka haya vulika kombepo yaKalunga ohaya dhiladhila kombinga yiinima yopambepo.*
6 Oshoka okudhiladhila panyama otaku fala meso, ihe okudhiladhila pambepo otaku eta omwenyo nombili;
7 molwaashoka mboka haya dhiladhila panyama otaya iningi aatondi yaKalunga, oshoka onyama ihayi vulika kompango yaKalunga, noitayi vulu okuvulika kuyo.
8 Onkee ano mboka haya dhiladhila panyama itaya vulu okunyanyudha Kalunga.
9 Ihe ngele ombepo yaKalunga oyi li shili mune, nena otamu ende metsokumwe nombepo ye, ihe hapanyama. Ihe kehe ngoka kee na ombepo yaKristus ke shi gwe.
10 Ihe ngele Kristus oku li muukumwe nane, ombepo otayi mú pe omwenyo omolwuuyuuki, nokuli nonando olutu olwa sa omolwuulunde.
11 Ihe ngele, ngashingeyi, ombepo yaKalunga, ngoka a yumudha Jesus kuusi, oyi li mune, nena ngoka a yumudha Kristus Jesus kuusi ota ka yumudha wo omalutu geni, ngoka haga si, ta longitha ombepo ye, ndjoka hayi kala mune.
12 Onkee ano aamwatate, katu na okupangelwa komalutu getu, ngoka omalunde.
13 Oshoka ngele ohamu vulika kuuhalu weni wopanyama, otamu ka sa shili. Ihe ngele omwa etha ombepo ondjapuki yi mú kwathele mú ethe po iilonga yuulunde, mbyoka tayi fala meso, nena otamu kala nomwenyo.
14 Oshoka ayehe, mboka haya wilikwa kombepo yaKalunga oyo oyana yaKalunga shili.
15 Oshoka Kalunga ine mú pa ombepo, ndjoka tayi mú ningi aapika, noku mú ningitha mú kale ishewe muumbanda. Ihe pehala lyaashoka, okwe mú pe ombepo, ndjoka e mú ninge aana ye, ndjoka hayi tu ningitha tu igidhe tatu ti: “Abba,* Tate!”
16 Ombepo yaKalunga oyo yene hayi tu hololele* kutya tse aana yaKalunga.
17 Ihe nena ngele tse oyana, otatu ka thigulula wo shoka Kalunga te tu pe, notatu ke shi thigulula pamwe naKristus. Ihe tango, otu na okuhepekwa pamwe naye, opo tu vule wo oku ka tumbalekwa pamwe naye.
18 Oshoka omahepeko, ngoka ndi li mugo ngashingeyi, onde ga tala ko kutya itaga vulu okuyelekwa neadhimo, ndyoka tatu ka hololelwa.
19 Iishitwa ayihe oya tegelela nondjuulukwe Kalunga e yi hololele oyana.
20 Oshoka iishitwa ayihe oyi li meyonuko, hakehalo lyayo yene, ihe omolwangoka e yi ethele mo, ihe nonando ongawo, otu na etegameno
21 kutya eshito lyo lyene otali ka mangululwa mo wo muupika weyonuko, nokuya memanguluko lyeadhimo lyoyana yaKalunga.
22 Oshoka otu shi shi kutya eshito alihe otali tsikile nokukema pamwe, notali mono iihuna pamwe sigo ongashingeyi.
23 Halyo alike, ihe natse wo, mboka twa pewa tango ombepo yaKalunga, otatu keme meni lyetu, manga twa tegelela nondjuulukwe okutaambiwa ko tu li oyana yaKalunga, ano okumangululwa mo momalutu getu ngaka okupitila mekulilo.
24 Oshoka sho twa hupithwa, otwa mono etegameno ndika; ihe ngele otu wete shoka twa tegamena, nena ndyoka kali shi etegameno lyashili. Oshoka mbela omuntu ota vulu ngaa okutegamena oshinima shoka e wete?
25 Ihe ngele otwa tegamena shoka kaatu wete, nena ohatu shi tegelele nondjuulukwe noneidhidhimiko.
26 Momukalo gwa faathana, ombepo ondjapuki ohayi tu kwathele wo muunkundi wetu; oshoka uupyakadhi owo kutya, nonando otu shi kutya otwa pumbwa okugalikana, ihatu kala tu shi kutya natu galikane kombinga yashike, ihe ombepo yaKalunga ohayi tu indilile ko, uuna tatu keme, nokatu shi kutya natu tye shike.
27 Kakele kaashono, ngoka ha mono momitima oku shi kutya elalakano lyombepo olyashike, molwaashoka ombepo ondjapuki ohayi indilile ko aayapuki, metsokumwe nehalo lyaKalunga.
28 Otu shi shi kutya iilonga yaKalunga ayihe otayi tsu kumwe omolwuuwanawa waantu, mboka ye mu hole, mboka wo a hogolola metsokumwe nelalakano lye.
29 Molwaashoka okuza petameko, okwa kala e shi nale mboka ta ka hogolola, okwa tokola kutya otaya ka kala ya fa Omwana, ngoka e na okukala omutango mokati kaamwahe oyendji.
30 Shimwe ishewe, mboka a hogolola komeho yethimbo oyo wo a ithana; naamboka a ithana, okwe ya tala ko wo aayuuki. Hugunina, mboka a tala ko aayuuki oyo wo a tumbaleka.
31 Otatu ti nduno shike kombinga yiinima mbika? Ngele Kalunga oku li pamwe natse, olye ta vulu oku tu sinda?
32 Ngele ina gamena Omwana, ihe okwe mu gandja a se omolwetu, mbela ite ke tu pa wo iinima ayihe yilwe pamwe naye?
33 Mbela olye ta vulu okutamaneka aahogololwa yaKalunga? Kapu na nando ogumwe, molwaashoka Kalunga oye te ya tala ko aayuuki.
34 Olye ta vulu oku ya mona ondjo? Kapu na nando ogumwe, molwaashoka Kristus Jesus okwe ya sila e ta yumudhwa kuusi, nongashingeyi, okwa kuutumba kolulyo lwaKalunga, te tu galikanene.
35 Olye ta vulu oku tu topola ko kohole yaKristus?* Mbela uudhigu, okuhepekwa, ondjala, onkayi, oshiponga, nenge egongamwele?
36 Ngaashi owala kwa nyolwa: “Omolwoye, otwa taalela eso kehe esiku; otwa fa oonzi tadhi ka dhipagwa.”
37 Ihe moonkalo adhihe ndhoka otatu sindana thiluthilu kekwatho lyaangoka e tu hole.
38 Oshoka onda tompwa kutya nduno eso, omwenyo, aayengeli, omapangelo, iinima, mbyoka yi li ko ngashingeyi naambyoka tayi ke ya, oonkondo,
39 uule wopombanda, nenge uule womevi,* nenge sha shilwe shomeshito, itayi vulu oku tu topola ko kohole yaKalunga,* ndjoka yi li muKristus Jesus, Omuwa gwetu.
Omanyolo gopevi
^ Eln., “wonyama.”
^ Eln., “monyama.”
^ Nenge “yaashoka ombepo tayi ya wilike ya ninge.”
^ Oshitya shOshiaramia shoka tashi ti “Tate!”
^ Eln., “oyo yene hayi tseyithile ombepo yetu.”
^ Nenge “okwiimba Kristus a kale e tu hole.”
^ Nenge tashi vulika, “kutya nduno otu na ondondo yopombanda, nenge oyopevi.”
^ Nenge “okwiimba Kalunga a kale e tu hole.”
