KAaroma 9:1-33
9 Ngame omulanduli gwaKristus, notandi popi oshili; itandi fundju, oshoka eiyuvo lyandje, ndyoka tali wilikwa kombepo ondjapuki, otali shi koleke
2 kutya ondi na oluhodhi olunene nuuwehame momutima gwandje itaawu hulu.
3 Oshoka onda li nda hala andola ongame ndi kale nda topolwa ko kuKristus, ongaangoka a thingwa, omolwuuwanawa waamwatate, ano aakwanezimo yandje yopanyama,
4 mboka ye li Aaisraeli. Kalunga oyo a hogolola ya ninge oyana; okwe ya tumbaleke, nokwa ningi ehangano nayo e te ya pe Ompango; okwe ya pe wo uuthembahenda wokulonga iilonga iiyapuki, nokwe ya pe omauvaneko.
5 Oya za mootatekulululwa, moka wo mwa za Kristus, e li omuntu gwopanyama. Kalunga, ngoka e li omupangeli gwaayihe, na hambelelwe sigo aluhe. Amen.
6 Ihe shoka inashi hala okutya oohapu dhaKalunga inadhi gwanithwa. Oshoka mboka ya za muIsraeli haayehe “Aaisraeli” shili.
7 Shimwe ishewe, haayehe oyana, molwaashoka owala ya za moluvalo* lwaAbraham. Pehala lyaashono, okwa lombwele Abraham ta ti: “Mboka taya ka ithanwa oluvalo* lwoye otaya ka za muIsak.”
8 Ano, oyana yaAbraham yopanyama kaye shi oyana yaKalunga lela, ihe oyana, mboka ya uvanekwa, oyo ya talika ko ye li oluvalo* lwe.
9 Oshoka oohapu dheuvaneko lyaKalunga odha tile ngeyi: “Otandi ka galuka pethimbo ngandika, notandi ka adha Sara e na okanona okamati.”
10 Inashi ningwa owala pethimbo ndyoka, ihe nopethimbo wo Rebekka a li metegelelo lyaakwanambwiyu yatatekulululwa, Isak.
11 Oshoka manga inaaya valwa, noinaya longa sha oshiwanawa, nenge oshiwinayi, Kalunga okwa ulike kutya elalakano lye inali ikolelela kiilonga, ihe okwaamboka a hala okuhogolola.
12 Onkee ano okwa lombwele Rebekka ta ti: “Osheeli shoye otashi ka ninga omupika gwonkelo.”
13 Ngaashi owala kwa nyolwa taku ti: “Onda li ndi hole Jakob, ihe onda li ndi tonde Esau.”
14 Otatu ti nduno shike? Mbela osha hala okutya Kalunga ke shi omuyuuki? Hasho nando!
15 Oshoka okwa lombwele Moses ta ti: “Otandi sile ohenda kehe ngoka nda hala okusila ohenda, notandi kenukile kehe ngoka nda hala okukenukila.”
16 Onkee ano inashi ikolelela kehalo lyomuntu, nenge koonkambadhala dhe, ihe osha ikolelela kuKalunga, ngoka e na ohenda.
17 Oshoka enyolo olya popi kombinga yaFarao lya ti: “Onde ku etha wu kale nomwenyo netompelo lyokuulika oonkondo dhandje okupitila mungoye, nedhina lyandje li tseyithwe kombanda yevi alihe.”
18 Onkee ano oha sile ohenda kehe ngoka a hala okusila ohenda, ihe oha etha kehe ngoka a hala okukala a tangalala, a kale a tangalala.
19 Otashi vulika wu pule ndje to ti: “Omolwashike Kalunga he tu pe uusama? Olye ta vulu okukondjitha ehalo lye?”
20 Mbela ongoye lye, wu yamukule Kalunga ngawo? Mbela oshiyuma sheloya ohashi pula omuhongi gwasho tashi ti: “Omolwashike wa hongo ndje ngeyi?”
21 Mbela omuhongi gwiiyuma ke na uuthemba wokulongitha eloya limwe, ndyoka a umbinga, a honge mo oshiyuma shimwe, shi longithwe miinima ya simana, nashimwe oshi longithwe miinima, mbyoka inaayi simana?
22 Sha faathana, Kalunga okwa tokola a holole ondjahi ye, noku ulike oonkondo dhe, manga ta idhidhimikile ethimbo nuule mboka* ye mu geyitha, noya gwana okuhanagulwa po.
23 Shoka okwe shi ningi, opo a ulukile mboka* a sila ohenda esimano lye enene, noku ke ya pe ondjambi, ndjoka e ya longekidhila,
24 ano, mboka a ithana okuza mAajuda nosho wo miigwana yilwe.
25 Shika otashi ningwa, ngaashi wo Hosea a hunganeka a ti: “Mboka kaaye shi aantu yandje otandi ke ya ithana ‘aantu yandje,’ nomukiintu, ngoka a li kee holike, otandi ke mu ithana ‘omuholike gwandje’;
26 nomehala, moka ya lombwelelwe kutya, ‘Kamu shi aantu yandje,’ omo taya ka ithanwa ‘oyana yaKalunga omunamwenyo.’”
27 Shimwe ishewe, Jesaja okwa popi ta igidha kombinga yAaisraeli ta ti: “Nonando omwaalu gwoyana yaIsraeli ogu kale gwa fa ehekevi lyefuta, aashona yowala taya ka hupithwa.
28 Oshoka Jehova ota ka tokola evi thiluthilu, note ke shi ninga meendelelo.”
29 Jesaja okwa hunganeka wo a ti: “Andola Jehova gwomatangakwiita okwa li inaa hupitha yamwe yomoluvalo* lwetu, ando otwa kala owala twa fa Sodom naGomorra.”
30 Otatu ti nduno shike? Ooshono kutya nonando aantu yomiigwana kaya li taya lalakanene uuyuuki, oya talika ko aayuuki, oshoka oya ulike kutya oye na eitaalo;
31 ihe nonando Israeli okwa li ta lalakanene okuvulika kompango yuuyuuki, ine yi gwanitha po.
32 Omolwashike mbela? Omolwaashoka ine yi lalakanena sha ikolelela keitaalo, ihe okiilonga. Onkee ano okwa pundukithwa “kemanya lyepundukitho”;
33 ngaashi kwa nyolwa taku ti: “Tala, ngame otandi tula muSion emanya lyepundukitho nosho wo emanya lyeyemateko, ihe ngoka e na eitaalo mulyo ita ka yematekwa.”
Omanyolo gopevi
^ Eln., “mombuto.”
^ Eln., “ombuto.”
^ Eln., “ombuto.”
^ Eln., “iiyuma yondjahi.”
^ Eln., “iiyuma yesilohenda.”
^ Eln., “yomombuto.”
