Iilonga yaayapostoli 1:1-26
1 Membo lyandje lyotango, ndyoka nde ku nyolele, Teofilus, onde ku lombwele kombinga yiinima ayihe, mbyoka Jesus a ninga, nokwa longa aantu,
2 sigo esiku, ndyoka a kuthwa po, a ye megulu, konima sho a pe aayapostoli, mboka a hogolola, omalombwelo okupitila mombepo ondjapuki.
3 Konima sho a hepekwa, okwe ya ihololele lwiikando, opo ya tompwe kutya oku na omwenyo. Oya kala noku mu mona momukokomoko gwomasiku 40, nokwa kala ta popi kombinga yUukwaniilwa waKalunga.
4 Sho a li a gongala pamwe nayo, okwe ya lombwele ta ti: “Inamu za mo muJerusalem, ihe kaleni mwa tegelela oshinima shoka nde mú lombwela, shoka Tate e mú uvanekela;
5 oshoka Johannes okwa ninginitha shili momeya, ihe ne, otamu ka ninginithwa nombepo ondjapuki konima yomasiku omashona.”
6 Manga ya li ya gongala, oya pula Jesus ya ti: “Omuwa, mbela uukwaniilwa waIsraeli oto wu totulula pethimbo ndika?”
7 Okwa ti kuyo: “Tate gwomegulu oye awike e na uuthemba* wokuutha kutya opethimbo lini iinima mbika tayi ka ningwa, ihe ne ethimbo ndyoka inamu pumbwa oku li tseya.
8 Ihe otamu ka pewa oonkondo, uuna mwa tililwa ombepo ondjapuki, notamu ka gandja uumbangi kombinga yandje muJerusalem, muJudea ashihe nomuSamaria nosho wo kombanda yevi alihe.”
9 Konima sho a popi ngawo, manga ye mu tala, okwa yeluthwa pombanda, nokwa ningine moshikogo montaneho yawo.
10 Manga ya li ya ligamena kegulu, sho Jesus ta yi, ohaluka, puyo opwa thikama aalumentu yaali ya zala oonguwo oontokele,
11 e taya ti kuyo: “Aalumentu ne Aagalilea, omolwashike mwa thikama mwa ligamena kegulu? Jesus, ngoka a kuthwa pune, a yi megulu, ota ka galuka naanaa ngaashi mwe mu mono, sho ta yi megulu.”
12 Opo nduno oya shuna kuJerusalem okuza kondundu hayi ithanwa Ondundu yOoholivi, ndjoka yi li popepi naJerusalem, mpoka pu na oshinano shokilometa yimwe.*
13 Sho ya thiki, oya yi mondunda yopombanda, moka ya li haya kala. Mondunda moka omwa li Petrus, Johannes, Jakob, Andreas, Filippus, Tomas, Bartolomeus, Mateus, Jakob, omwanamati gwaAlfeus, Simon omulaadhi naJudas, omwanamati gwaJakob.
14 Ayehe oya kala taya galikana ya mana mo, ye na edhiladhilo limwe, pamwe naakiintu yamwe nosho wo Maria, yina yaJesus, naamwayinamati yaJesus.
15 Esiku limwe, Petrus okwa thikama mokati kaamwahe, mboka ya li 120 lwaampono, nokwa ti kuyo:
16 “Aalumentu ne, aamwatate, oohapu dhopahunganeko, ndhoka David a popi, sho a nwethwa mo kombepo ondjapuki, odha li dhi na okugwanithwa. Okwa popi kombinga yaJudas, ngoka a li a kwatela komeho mboka ya kwata po Jesus.
17 Judas okwa li gumwe gwomutse, nokwa li ha longo pamwe natse moshilonga shika.
18 (Omulumentu ngoka okwa landa epya nondjambi, ndjoka a li a pewa, omolwiilonga ye kaayi li pauyuuki. Okwa gu ko a thikila po omutse, olutu lwe e talu topa,* niinima ye ayihe yomela oya gu mo.
19 Oshinima shoka osha tseyika kwaayehe muJerusalem, nepya ndyoka oye li luku melaka lyawo, Akeldama, sha hala okutya, “Epya lyOmbinzi.”)
20 Oshoka membo lyOmapisalomi omwa nyolwa taku ti: ‘Ehala lye nali ninge eputu, noitamu ka kala nando omuntu, noshinakugwanithwa she shuutonateli nashi pewe gulwe.’
21 Onkee ano otwa pumbwa okuhogolola gumwe gwomaalumentu, mboka ya kala pamwe natse ethimbo alihe, ndyoka Omuwa Jesus a kala ta longo iilonga ye mokati ketu,
22 okuza sho a ninginithwa kuJohannes, sigo esiku, ndyoka a kuthwa po putse, a ye megulu. Omulumentu ngoka naye na kale e shi mona* kutya Jesus okwa yumuka.”
23 Onkee ano oya popile aalumentu yaali, Matias naJosef, ngoka ha ithanwa Barsabas, noha ithanwa wo Justus.
24 Opo nduno oya galikana taya ti: “Jehova, ongoye wu shi shoka shi li momitima dhaantu ayehe. Tu ulukila kutya oguni po wa hogolola paalumentu mbaka yaali,
25 opo a ninge omuyapostoli, noku longe oshilonga, shoka Judas a etha po e ta yi noondjila dhe.”
26 Onkee ano oya umbile aalumentu mboka oshihogololitho e tashi kwata Matias, nokwa yalulilwa* maayapostoli 11.
Omanyolo gopevi
^ Nenge “oonkondopangelo.”
^ Eln., “uule woshinano, shoka hashi endwa mesiku lyEsabati.”
^ Nenge “olutu lwe e talu topa pokati.”
^ Nenge “naye na kale ombangi.”
^ Sha hala okutya, okwa kala a talika ko ngaashi yalwe 11.
