Iilonga yaayapostoli 10:1-48
10 Pethimbo ndyoka, muKesarea omwa li mu na omulumentu gwedhina Kornelius, omuwiliki gwetangakwiita,* ndyoka hali ithanwa etangakwiita lyaItalia.*
2 Okwa li omulumentu omutilikalunga nosho wo aanegumbo lye ayehe, nokwa li ha gandja iikwatha oyindji kaantu, noha galikana aluhe Kalunga.
3 Esiku limwe lwopotundi ontimugoyi,* okwa mono memoniko omuyengeli gwaKalunga te ya kuye, nokwe mu ithana ta ti: “Kornelius!”
4 Kornelius okwe mu tala a tila e te mu pula ta ti: “Omuwa, oshike?” Omuyengeli okwa ti kuye: “Kalunga okwe ku dhimbulukwa omolwomagalikano niikwatha yoye.
5 Onkee ano ngashingeyi, tuma aalumentu kuJoppa, ya ka tale omulumentu gwedhina Simon, ngoka ha ithanwa Petrus.
6 Omulumentu ngoka oku li omuyenda megumbo lyaSimon, omuhiki gwiipa, ngoka e na egumbo li li popepi nefuta.”
7 Nziya, sho omuyengeli, ngoka a li ta popi naye, a yi, Kornelius okwa ithana aapiya ye yaali nosho wo omukwiita omutilikalunga, ngoka a li gumwe gwomaayakuli ye,
8 e te ya hokololele ashihe shoka sha ningwa po, nokwe ya tumu kuJoppa.
9 Esiku lya landula ko, manga ye li molweendo, noye li pokuthika moshilando, Petrus okwa yi kontala yegumbo lwopotundi ontihamano,* a ka galikane.
10 Ihe okwa si ondjala noonkondo, nokwa li a hala okulya. Manga iikulya tayi telekwa, okwa mono emoniko,
11 nokwa mono egulu lya eguluka, noshinima* sha fa oshiyata oshinene sholiina tashi kulukithilwa kevi, sha kwatwa koonkotso dhasho ne.
12 Musho omwa li iinamwenyo yokombanda yevi yomaludhi agehe, ngaashi yomagulu gane nosho wo mbyoka hayi ipwedha* yokombanda yevi noondhila dhokegulu.
13 Opo ihe okwa uvu ewi tali mu lombwele tali ti: “Petrus, thikama, dhipaga e to li!”
14 Ihe Petrus okwa ti: “Aawe, Omuwa, molwaashoka inandi lya nando onale sha sha nyata, nenge inaashi yogoka.”
15 Opo nduno okwa uvu ishewe ewi oshikando oshitiyali tali ti: “Ino ithana we iinima, mbyoka Kalunga a yogola, kutya oya nyata.”
16 Okwa uvu ishewe ewi ndyoka oshikando oshititatu, na nziya oshinima* shoka osha shunithwa megulu.
17 Manga Petrus a li natango ta ipula kutya emoniko, ndyoka a mono, otali ti shike, aalumentu, mboka ya tumwa kuKornelius, oya li ya thikama posheelo taya pula kutya egumbo lyaSimon oli li peni.
18 Oya igidha taya pula ngele megumbo moka omu na omuyenda, Simon, ngoka ha ithanwa Petrus.
19 Manga Petrus a li natango ta tedhatedha kombinga yemoniko ndyoka, Kalunga okwa popi naye okupitila mombepo ye ta ti: “Tala, opu na aalumentu yatatu taye ku pula.
20 Onkee ano thikama e to yi pevi, wu ye pamwe nayo. Ino kala wa limbililwa nandonando, molwaashoka ongame nde ya tuma.”
21 Nena Petrus okwa yi pevi kaalumentu mboka e ta ti kuyo: “Ongame nguka tamu kongo. Otamu kwathelwa shike?”
22 Oya ti: “Kornelius, omukuluntu gwetangakwiita, omulumentu omuyuuki nomutilikalunga, ngoka ha popilwa muuwanawa koshigwana ashihe shAajuda, okwa pewa omalombwelo kuKalunga okupitila momuyengeli omuyapuki, e ku hiye kegumbo lye, opo a ka uve shoka wu na oku mu lombwela.”
23 Onkee ano Petrus okwe ya ithana megumbo e te ya taamba ko ye li aayenda ye, nokwe ya pe omulalo.
Esiku lya landula ko, okwa thikama e ta yi pamwe nayo nosho wo aamwatate yamwe yomuJoppa.
24 Oya thiki muKesarea esiku lya landula ko. Kornelius okwa li e ya tegelela, nokwa adhika a ithana nale aakwanezimo ye nookuume ke kopothingo.
25 Sho Petrus e ya mo, Kornelius okwe mu tsakaneke e ta tsu oongolo poompadhi, dhe nokwe mu inyongamene.
26 Ihe Petrus okwe mu thikameke ta ti: “Thikama; nangame omuntu owala.”
27 Omanga a li ta popi naye, okwa yi megumbo, nokwa adha mo aantu oyendji ya gongala.
28 Petrus okwa ti kuyo: “Omu shi shi nawa kutya inashi pitikwa paMpango, Omujuda a endathane, nenge a popye nomuntu gwomuhoko gulwe gwi ili, ihe Kalunga okwa ulukila ndje kutya kandi na okuula nando omuntu gumwe kutya okwa nyata, nenge ina yogoka.
29 Onkee ano sho wa ithana ndje ndi ye kungoye, onde ya, kaandi na omalimbililo gasha. Onkene onda hala okuuva kutya omolwashike wa ithana ndje.”
30 Opo nduno Kornelius okwa ti: “Omasiku gane ga tetekela, pethimbo ngandika, potundi ontimugoyi* onda li megumbo lyandje tandi galikana. Opo ihe omulumentu gumwe, a zala oonguwo tadhi tayima, okwa holoka komeho gandje,
31 nokwa ti: ‘Kornelius, Kalunga okwa uva omagalikano goye, nokwa ndhindhilika iikwatha, mbyoka wa kala ho gandja.
32 Onkee ano tuma aantu kuJoppa, ya ka tale Simon, ngoka ha ithanwa Petrus. Omulumentu ngoka omuyenda megumbo lyaSimon, omuhiki gwiipa, ngoka e na egumbo li li popepi nefuta.’
33 Opo nduno onda tumu wu ka talwe, nowa ninga nawa, sho we ya huka. Onkee ano ngashingeyi otu li mpaka koshipala shaJehova Kalunga, tu uve iinima ayihe, mbyoka e ku lombwela wu tu tseyithile.”
34 Opo ihe Petrus okwa tameke okupopya ta ti: “Ngashingeyi, ondi shi shi lela kutya Kalunga ke na okatongo,
35 ihe oha taamba ko omuntu kehe, ngoka he mu tila, noha longo shoka sha uka, kutya nduno ogwomoshigwana shini.
36 Kalunga okwa tumine oyana yaIsraeli ohapu, opo e ya tseyithile onkundana ombwanawa yombili okupitila muJesus Kristus, ngoka e li Omuwa gwaayehe.
37 Omu shi shi shoka sha li tashi popiwa okuza muGalilea sigo omuJudea ashihe konima yeninginitho, ndyoka Johannes a li ta uvitha
38 kombinga yaJesus Omunasareti, nankene Kalunga e mu gwayeke nombepo ondjapuki, nokwe mu pe oonkondo. Molwaashoka Kalunga okwa li pamwe naye, okwa ende noshitopolwa ashihe ta longo uuwanawa nokwaaludha ayehe, mboka ya li taya hepekwa kOndiyapoli.
39 Tse otu li oombangi dhiinima ayihe, mbyoka a longa miitopolwa, moka mwa li Aajuda nomuJerusalem. Ihe oye mu dhipaga moku mu endjeleleka komuti.
40 Kalunga okwe mu yumudha mesiku etitatu, nokwe mu hololele aantu,
41 ihe haantu ayehe, oombangi owala, ndhoka Kalunga, a hogolola komeho yethimbo, ano tse, mboka twa lya nokunwa pamwe naye, konima sho a yumudhwa kuusi.
42 Shimwe ishewe, okwe tu lombwela tu uvithile aantu nokugandja uumbangi nawanawa kutya oye a hogololwa kuKalunga a ninge omupanguli gwaanamwenyo naasi.
43 Aahunganeki ayehe oya gandja uumbangi kombinga ye kutya kehe ngoka te mu itaale ota dhiminwa po oondjo dhe okupitila medhina lye.”
44 Manga Petrus a li natango ta popi kombinga yiinima mbyoka, ayehe, mboka ya li taya pulakene kuye, oya tililwa ombepo ondjapuki.
45 Opo nduno ooitaali mboka ya kenkwa,* mboka ye ya pamwe naPetrus, oya li ya kumwa, molwaashoka aantu yomiigwana yilwe nayo oya tililwa omagano gombepo ondjapuki.
46 Oye ya uvu taya popi omalaka omakwiilongo, notaya tanga Kalunga. Opo ihe Petrus okwa ti:
47 “Opu na ngaa ngoka ta vulu okukeelela aantu mbaka ya ninginithwe, mboka nayo ya tililwa ombepo ondjapuki ngaashi tse?”
48 Nena okwa gandja elombwelo, opo ya ninginithwe medhina lyaJesus Kristus. Opo nduno oye mu pula a kale puyo uule womasiku gontumba.
Omanyolo gopevi
^ Nenge “omunethele,” ha wilike aakwiita 100.
^ Nenge “ongundu,” ano etangakwiita lyaRoma lyaakwiita 600.
^ Sha hala okutya, lwopondatu yomutenya.
^ Sha hala okutya, lwopomulongo nambali gwomutenya.
^ Eln., “noshikwatelwa shontumba.”
^ Nenge “iihono.”
^ Eln., “oshikwatelwa.”
^ Eln., “lwopondatu yomutenya.”
^ Nenge “aadhiginini.”
