Iilonga yaayapostoli 11:1-30
11 Aayapostoli nosho wo aamwatate, mboka ya li muJudea, oya uvu kutya aantu yomiigwana yilwe nayo oya taamba ko oohapu dhaKalunga.
2 Onkee ano sho Petrus e ya kuJerusalem, aantu, mboka ya li haya dhiginine ompango yi na ko nasha nokukenkwa, oya tameke oku mu pa uusama*
3 taya ti: “Owa yile megumbo lyaantu, mboka inaaya kenkwa, e to li pamwe nayo.”
4 Opo ihe Petrus okwe ya lombwele ombahu nokawawa* oshinima shoka, ta ti:
5 “Manga nda li tandi galikana moshilando shaJoppa, onda mono memoniko oshinima* tashi kulukithwa okuza megulu sha fa oshiyata oshinene sholiina sha kwatwa koonkotso dhasho ne, noshe ya sigo okungame.
6 Sho nde shi tala nawa, onda mono mo iinamwenyo yomagulu gane yokombanda yevi, iilikama, iinamwenyo, mbyoka hayi ipwedha* nosho wo oondhila dhokegulu.
7 Onda uvu wo ewi tali lombwele ndje tali ti: ‘Petrus, thikama, dhipaga e to li!’
8 Ihe onda ti: ‘Aawe, Omuwa, molwaashoka mokana kwandje inamu enda nando onale sha sha nyata, nenge inaashi yogoka.’
9 Ewi, ndyoka lya zi megulu, olya popi oshikando oshitiyali tali ti: ‘Ino ithana we iinima, mbyoka Kalunga a yogola, kutya oya nyata.’
10 Ewi ndyoka olya popi ishewe oshikando oshititatu, opo nduno iinima ayihe oya shunithwa megulu.
11 Pethimbo olyo tuu ndyoka, aalumentu yatatu, ya za kuKesarea, mboka ya tumwa ndje, oya li ya thikama pegumbo, mpoka hatu zi.
12 Opo nduno ombepo ondjapuki oya lombwele ndje ndi ye pamwe nayo, nondaa kale nda limbililwa nandonando. Aamwatate, mbaka yahamano, oya yi wo pamwe nangame, notwa yi kegumbo lyaKornelius.
13 “Okwe tu hokololele nkene a mono omuyengeli a thikama megumbo lye, ngoka e mu lombwele ta ti: ‘Tuma aalumentu kuJoppa, ya ka ithane Simon, ngoka ha ithanwa Petrus,
14 note ke ku lombwela shoka mú na okuninga naanegumbo lyoye ayehe, opo mú hupithwe.’
15 Ihe sho nda tameke okupopya, oya tililwa ombepo ondjapuki, ngaashi owala natse wo twa li twe yi tililwa petameko.
16 Opo ihe onda dhimbulukwa oohapu dhOmuwa, sho a li ha popi ta ti: ‘Johannes okwa ninginitha nomeya, ihe ne otamu ka ninginithwa nombepo ondjapuki.’
17 Onkee ano ngele Kalunga okwe ya pa omagano ga faathana naangoka e tu pa, tse mboka twa kala twa itaala mOmuwa Jesus Kristus, ongame lye ando ndi imbe Kalunga a longe ehalo lye?”*
18 Sho ya uvu oohapu ndhoka, oya etha po oku mu pataneka,* noya tanga Kalunga taya ti: “Kalunga nani okwa pa wo aantu yomiigwana yilwe ompito ya itedhulule, opo ya ka mone omwenyo.”
19 Aalongwa, mboka ya li ya ihanena apuhe omolwomahepeko, ngoka ge ya po, konima sho Stefanus a dhipagwa, oya yi kuFoinikia, kuKipro nokuAntiokia, noya uvithile owala Aajuda.
20 Ihe aalumentu yamwe yomaalongwa, mboka ya za kuKipro nokuKireni, oye ya kuAntiokia e taya tameke okupopya naantu, mboka haya popi Oshigreka, noye ya uvithile onkundana ombwanawa yOmuwa Jesus.
21 Natango, eke lyaJehova olya li pamwe nayo, naantu oyendji noonkondo oya li ya ningi ooitaali, noya landula Omuwa.
22 Ehokololo ndyoka kombinga yawo olya thiki megongalo lyomuJerusalem, noya tumu Barnabas kuAntiokia.
23 Sho a thiki, okwa mono nkene Kalunga e ya sile ohenda, nokwa li a nyanyukwa e ta tameke oku ya tsa omukumo ayehe, ya kale aadhiginini kOmuwa nomutima aguhe;
24 oshoka Barnabas okwa li omulumentu e na ombepo ombwanawa, a udha ombepo ondjapuki, nokwa li e na eitaalo lya kola, naashoka osha ningitha ongundu onene yaantu ya itaale Omuwa.
25 Onkee ano okwa yi kuTarsus, a ka konge Saulus, sigo e mu mono.
26 Konima sho e mu mono, okwe ya naye kuAntiokia. Onkee ano uule womumvo gumwe, oya kala haya gongala pamwe negongalo lyomuAntiokia, noya li haya longo aantu oyendji, naashoka osho oshikando shotango aalongwa ya ithanwa Aakriste pawiliko lyaKalunga.
27 Pethimbo ndyoka, aahunganeki oya li ya zi muJerusalem e taya yi kuAntiokia.
28 Opo nduno gumwe gwomuyo gwedhina Agabus okwa thikama e ta hunganeke kekwatho lyombepo ondjapuki kutya kombanda yevi alihe otaku ke ya ondjala yekomba, ndjoka ye ke ya shili pethimbo lyokupangela kwaKlaudius.
29 Onkee ano ooitaali oya tokola kutya kehe gumwe gwomuyo na gandje iikwatha ngaashi ta vulu, opo yi tuminwe aamwatate yokuJudea.
30 Shoka osho ya ningi, noya hogolola Barnabas naSaulus oyo ya fale iikwatha mbyoka kaakuluntugongalo.
Omanyolo gopevi
^ Nenge “ombedhi.”
^ Nenge “iinima ayihe.”
^ Eln., “oshikwatelwa shontumba.”
^ Nenge “iihono.”
^ Nenge “ndi ye ehalo lyaKalunga moshipala?”
^ Eln., “oya tameke okukala ya mwena.”
