Iilonga yaayapostoli 13:1-52
13 Megongalo lyomuAntiokia omwa li aahunganeki naalongi mbaka: Barnabas, Simeon, ngoka ha ithanwa wo Omuluudhe,* Lukius Omukireni, Manahen, ngoka a sikola pamwe naHerodes, omupangeli gwoshitopolwalongo, nosho wo Saulus.
2 Manga ya li taya longele* Jehova, notaya idhilike iikulya, okwa popi nayo ta wilikwa kombepo ondjapuki, ta ti: “Yoololelii ndje mo Barnabas naSaulus, ya ka longe oshilonga, shoka nde ya ithanena.”
3 Opo nduno sho ya idhilike iikulya nokugalikana, oye ya tenteke iikaha yawo, noye ya laleke ya ye.
4 Onkee ano aalumentu, mbaka ya tumwa kuKalunga okupitila mombepo ondjapuki, oya yi kuSeleukia, nokuza mpoka oya yi nosikepa kuKipro.
5 Sho ya thiki muSalamis, oya tameke okuuvitha oohapu dhaKalunga moosinagoga dhAajuda. Oya yi wo naJohannes, ngoka a li te ya yakula.*
6 Sho ya mana ko ontuntu ayihe, oya yi sigo okuPafo, noya tsakaneke ko omulumentu Omujuda, gwedhina Bar-Jesus, ngoka a li ompulile nomuhunganeki omufundja.
7 Omulumentu ngoka okwa li ha longele ngoloneya* Sergius Paulus, ngoka a li omulumentu omunandunge. Molwaashoka Sergius Paulus okwa li a halelela okuuva oohapu dhaKalunga, okwa ithana Barnabas naSaulus, ye ye kuye.
8 Ihe ompulile yimwe, ndjoka wo hayi ithanwa Elimas, (ndyoka tali ti ompulile) oya tameke oku ya pataneka nokukambadhala okukeelela ngoloneya kaa itaale Omuwa.
9 Opo ihe Saulus, ngoka wo ha ithanwa Paulus, okwa tililwa ombepo ondjapuki e te mu tala, e mu tongolola
10 nokwa ti: “Mulumentu ngoye, wa udha uukengeleledhi nuuwinayi woludhi kehe, omuna gwOndiyapoli, nowu tonde ashihe, shoka sha uka, omolwashike inoo hala okweetha po okugoyokitha oondjila dha uka dhaJehova?
11 Tala! Jehova ote ku geele* e to ningi omuposi, noito ka mona we uuyelele wetango uule wethimbo.” Nziya, okwa mono oshitsime e ta kala momilema, nokwa kala ta kambadhala okupampadhala, a mone gumwe, ngoka te mu kwata moshikaha, e mu wilike.
12 Opo ihe sho ngoloneya a mono shoka sha ningwa po, okwa ningi omwiitaali, oshoka okwa li a kuminwa elongo lyaJehova.
13 Nena Paulus naamboka ya li taya ende pamwe naye oya zi kuPafo nosikepa e taya yi kuPerge shomuPamfilia. Ihe Johannes okwe ya thigi hoka e ta shuna kuJerusalem.
14 Ihe sho ya zi kuPerge, oye ya kuAntiokia shomuPisidia. Opo nduno oya yi mosinagoga mesiku lyEsabati, noya kuutumba.
15 Konima sho Ompango nomambo gaahunganeki ga leshwa montaneho, aakuluntu yosinagoga oya lombwele Paulus naBarnabas taya ti: “Aalumentu ne, aamwatate, ngele omu nine aantu oohapu dhetsomukumo, dhi ya lombweleni.”
16 Onkee ano Paulus okwa thikama, nokwe ya udhikile noshikaha she e ta ti:
“Aalumentu ne, Aaisraeli nosho wo ne yalwe, mboka hamu tila Kalunga, pulakenii ndje.
17 Kalunga kaantu mbaka, Aaisraeli, okwa hogolola ootatekulululwa, naantu ye okwe ya indjipalitha, manga ya li aakwiilongo muEgipiti e ta longitha oonkondo dhe oonene, e ya pitithe mo.
18 Opo nduno okwa kala te ya idhidhimikile mombuga uule womimvo 40 lwaampono.
19 Konima sho a hanagula po iigwana iheyali, mbyoka ya li mevi lyaKaanana, okwe ya pe evi ndyoka, li li uuthiga wawo.
20 Iinima ayihe mbyoka oya ningwa muule womimvo 450 lwaampono.
Konima yaashoka, okwa langeke po aapanguli, ye ya kwatele komeho sigo opethimbo lyomuhunganeki Samuel.
21 Ihe konima yethimbo, oya pula ya pewe omukwaniilwa, na Kalunga okwe ya pe Saul, omuna gwaKish, omulumentu gwomezimo lyaBenjamin, ngoka e ya lele uule womimvo 40.
22 Konima sho Kalunga e mu kutha ko koshipundi, okwa langeke po David, a ninge omukwaniilwa, nokwa popi kombinga ye ta ti: ‘Onda mona kutya David, omuna gwalsai, omulumentu ha nyanyudha omutima gwandje; ota ka longa ashihe, shoka nda hala.’
23 Kalunga okwa uvaneke kutya moluvalo* lwomulumentu ngoka omo tamu ka za Jesus, ngoka a li ta ka hupitha Israeli.
24 Manga ngoka inee ya, Johannes okwa kala ta uvithile Aaisraeli ayehe ya ninginithwe, opo ya ulike kutya oya itedhulula.
25 Ihe sho Johannes a li e li pokumanitha oshilonga she, okwa li ha ti: ‘Ngame hangame ngoka tamu dhiladhila. Ihe taleni, ngoka te ya konima yandje inandi gwana nokuli okudhitulula omiya dhoongaku dhe.’
26 Aalumentu ne, aamwatate, ne oluvalo lwaAbraham, nosho wo amuhe, mboka hamu tila Kalunga, otwa tuminwa ohapu ndjika yehupitho.
27 Oshoka aakalimo yomuJerusalem naapangeli yawo inaye mu* dhimbulula, ihe sho ye mu pangula, oya gwanitha po oohapu, ndhoka dha popiwa kaahunganeki, ndhoka dha li hadhi leshwa mokule montaneho yaantu mesabati kehe.
28 Nonando kaya li ye mu mono ondjo yasha ya gwana oku mu dhipagitha, oya pula Pilatus, e mu alelithe komuti.
29 Opo ihe sho ya gwanitha po ashihe shoka sha li sha nyolwa kombinga ye, oye mu kutha ko komuti, noye mu langeke mombila.*
30 Ihe Kalunga okwe mu yumudha kuusi,
31 nokwa kala ha monika omasiku ogendji kwaamboka a li a yi pamwe nayo kuGalilea sigo okuJerusalem. Mbaka ngashingeyi otaya gandja uumbangi kaantu kombinga ye.
32 “Onkee ano otatu mú tseyithile onkundana ombwanawa kombinga yeuvaneko, ndyoka lya li lya uvanekelwa ootatekulululwa.
33 Kalunga okwe li tu gwanithile po thiluthilu, tu li oluvalo lwawo, sho a yumudha Jesus, ngaashi owala sha popiwa mepisalomi etiyali taku ti: ‘Ngoye omumwandje; nena ndjika, onda ninga ho.’
34 Molwaashoka okwe mu yumudha kuusi, noita ka ola we, okwa ti: ‘Otandi ke mú ulukila ohole yi na uudhiginini, ndjoka nda uvanekela David, naashoka otashi ka ningwa shili.’*
35 Episalomi limwe ishewe olya ti: ‘Ito ka etha omudhiginini gwoye a ole.’
36 Ihe David okwa longele Kalunga* pethimbo lye, ta si e ta fumvikwa pamwe noohekulululwa, nokwa olo.
37 Ihe ngoka a yumudhwa kuKalunga ina ola.
38 “Onkee ano aamwatate, tseyeni kutya Kalunga ote ke mú dhimina po omayono geni omolweso lyomulumentu nguka.
39 Ompango yaMoses kaya li tayi vulu oku mú ningitha mú kale aayuuki, ihe omolweso lyomulumentu nguka, Kalunga ota ka tala ko aantu ayehe, mboka ya itaala, ye li aayuuki.
40 Onkee ano kaleni mwa kotoka, opo kaamu ningilwe shoka sha popiwa kAahunganeki, sho ya ti:
41 ‘Aasheki ne, taleni iilonga, mbyoka tandi yi longo pethimbo lyeni. Itamu ka itaala kutya ongame nde yi longa, nonando omu yi lombwelwe ombahu nokawawa* kugumwe, ihe otamu ke yi kuminwa, notamu ka hanagulwa po.’”
42 Sho Paulus naBarnabas ya li taya zi mo mosinagoga, aantu oye ya indile, opo ya popye ishewe kombinga yiinima mbyoka mEsabati tali landula.
43 Onkee ano konima sho ya zi mo mosinagoga e taya halakana, Aajuda oyendji naamboka ya ninga yeitaalo lyOshijuda, mboka ya li haya longele Kalunga, oya landula Paulus naBarnabas, mboka ye ya ladhipike, ya dhiginine okukala ya inekela esilohenda lyaKalunga.
44 MEsabati lya landula ko, konyala aantu ayehe moshilando oya gongala, ya pulakene koohapu dhaJehova.
45 Sho Aajuda ya mono oongundu dhaantu, oya li ya tsila Paulus ondumbo, noya tameke okusheka nokupengitha oohapu dhe.
46 Opo nduno Paulus naBarnabas oya popi nayo nuulaadhi taya ti: “One mwa li mú na okutseyithilwa tango oohapu dhaKalunga. Molwaashoka inamu hala oku dhi taamba ko, noitamu ulike kutya omwa gwana oku ka mona omwenyo gwaaluhe, taleni, ngashingeyi otatu dhi tseyithile aantu yomiigwana yilwe.
47 Oshoka Jehova okwe tu pa elombwelo, ndyoka tali ti: ‘Onde ku langeka po wu li uuyelele kiigwana, wu uvithe kombanda yevi alihe shoka tashi ka etela aantu ehupitho.’”*
48 Sho aantu yomiigwana yilwe ya uvu oohapu ndhoka, oya nyanyukwa, noya tameke okutanga Jehova, omolwoohapu dhe, naamboka ya halelela oku ka mona omwenyo gwaaluhe oya ningi ooitaali.
49 Shimwe ishewe, oohapu dhaJehova odha taandele noshilongo ashihe.
50 Ihe Aajuda oya hwahwameke aakiintu aanamadhina, mboka aatilikalunga nosho wo aalumentu, mboka ya li ya simanekwa moshilando, opo ya hepeke Paulus naBarnabas e taye ya tidha mo moshilando shawo.
51 Onkee ano Paulus naBarnabas oya ipupula ontsi yomoshilando shoka koompadhi dhawo, noya yi kuIkonium.
52 Opo ihe aalongwa oya tsikile okuudhithwa ombepo ondjapuki, noya li ya nyanyukwa noonkondo.
Omanyolo gopevi
^ Eln., “Niger.”
^ Nenge “taya longele montaneho.”
^ Nenge “kwathele.”
^ Ngoloneya gwoshitopolwalongo shaRoma. Tala Omafatululo giitya.
^ Eln., “oshikaha shaJehova otashi ku adha.”
^ Eln., “mombuto.”
^ Sha hala okutya, “Jesus.”
^ Nenge “mombiladhimbuluko.”
^ Nenge “oshi shi okwiinekelwa.”
^ Nenge “okwa longo ehalo lyaKalunga.”
^ Nenge “ayihe.”
^ Paulus oohapu dhe ndhika okwe dhi ukitha wo kaalongwa yaJesus.
