Iilonga yaayapostoli 14:1-28
14 Sho Paulus naBarnabas ya yi muIkonium, oya yi mosinagoga yAajuda, noya popi momukalo, ngoka gwa inyengitha Aajuda nAagreka oyendji ya ninge ooitaali.
2 Ihe Aajuda, mboka ya li inaaya itaala oya hwahwameke nokunwetha mo aantu* yomiigwana, ya kale ye li ompinge naamwatate.
3 Onkee ano kekwatho lyoonkondo dhaJehova, Paulus naBarnabas oya kala muIkonium uule wethimbo lyontumba, taya uvitha nuulaadhi oohapu dhe dhesilohenda, noya longo iikumithalonga niilongankondo.
4 Nonando ongawo, aantu oyendji moshilando oya li ya topoka; yamwe oya li ya gama kombinga yAajuda, omanga yalwe okombinga yaayapostoli.
5 Sho aantu yomiigwana nAajuda pamwe naapangeli yawo ya li ya hala okuhepeka Paulus naBarnabas noku ya dhenga nomamanya,
6 oye shi uvu, noya yi ontuku kiilando yokuLikaonia, ngaashi kuListra nokuDerbe, nosho wo komikunda dhopopepi nayo.
7 Sho ye li hoka, oya tsikile okuuvitha onkundana ombwanawa.
8 MuListra omwa li omulumentu a kuutumba e na oompadhi dha lemana. Omulumentu ngoka okwa valwa oshilema, ye shivalelwe a ende.
9 Omulumentu ngoka okwa li ha pulakene kuPaulus sho ta popi. Paulus okwe mu tala e mu tongolola, naasho a mono kutya oku na eitaalo kutya ota aluka,
10 okwa igidha ta ti: “Thikama.” Opo nduno omulumentu ngoka okwa thikama, nokwa tameke okweenda.
11 Sho oongundu dhaantu dha mono shoka Paulus a ningi, odha igidha melaka lyOshilikaonia tadhi ti: “Ookalunga oya ifetha aantu, noye ya kutse.”
12 Opo ihe oya luku Barnabas Zeus, ihe molwaashoka Paulus oye a li ta popi unene, oye mu luku Hermes.
13 Nena omuyambi gwaZeus, ngoka otempeli ye ya li popepi nomweelo gwoshilando, okwe ya pamwe nongundu yaantu pomweelo ya etelela oontsezi nosho wo iipaka, nelalakano lyoku yi yambela Paulus naBarnabas.
14 Ihe sho aayapostoli, Barnabas naPaulus, ye shi uvu, oya tuula oonguwo dhawo e taya matukile mongundu yaantu, noya igidha taya ti:
15 “Aantu ne, omolwashike tamu ningi ngawo? Natse aantu owala yonyama nombinzi ngaashi ne, notatu mú uvithile onkundana ombwanawa, opo mú ethe po iilonga mbika iiwinayi, ne mú longele Kalunga omunamwenyo, ngoka a shita egulu, evi, efuta niinima ayihe, mbyoka yi li muyo.
16 Pethimbo lyonale, okwa li a etha iigwana ayihe yi landule oondjila dhawo.
17 Ihe okwe mú ulukila kutya ye oKalunga a tya ngiini,* sho he mú longele uuwanawa moku mú lokithila omvula okuza kegulu, nohe mú pe eloolo e mú kutithe niikulya, nokwa udhitha omitima dheni enyanyu.
18 Nonando aayapostoli oya li ya popi oohapu ndhoka, oya pondola nuudhigu okukeelela oongundu dhaantu kaadhi ya yambele omayambo.
19 Ihe Aajuda, mboka ya za kuAntiokia nokuIkonium, oya hwahwameke oongundu dhaantu, noya dhenge Paulus nomamanya noku mu kookololela kondje yoshilando taya dhiladhila kutya okwa sa.
20 Ihe sho aalongwa ya li ye mu gongalela, okwa thikama, nokwa yi moshilando. Esiku lya landula ko, okwa yi pamwe naBarnabas kuDerbe.
21 Konima sho ya uvitha onkundana ombwanawa moshilando shoka, noya kwathele aantu yontumba ya ninge aalongwa, oya shuna kuListra, kuIkonium nokuAntiokia.
22 Manga ya li hoka, oya tsu aalongwa* omukumo, noye ya ladhipike, ya dhiginine eitaalo, taya ti: “Otu na okupita momaudhigu ogendji, opo tu ye mUukwaniilwa waKalunga.”
23 Kakele kaashono, megongalo kehe oya langeke mo aakuluntugongalo, noya galikana nokwiidhilika, noye ya gandja momake gaJehova, ngoka ya itaala.
24 Opo nduno oya pitile muPisidia e taya yi kuPamfilia,
25 nokonima sho ya uvitha oohapu dhaKalunga muPerge, oya yi kuAtalia.
26 Okuza mpoka, oya yi nosikepa kuAntiokia, hoka Kalunga e ke ya ulukila esilohenda omolwoshilonga, shoka ya gwanitha po.
27 Sho ya thiki, oya gongaleke egongalo e taye ya hokololele iinima mbyoka Kalunga a longa okupitila muyo, nankene Kalunga a egululile iigwana ondjila, opo yi vule okwiitaala.
28 Onkee ano oya kala pamwe naalongwa uule wethimbo.
Omanyolo gopevi
^ Nenge “oomwenyo dhaantu.”
^ Eln., “okwe mu pa uumbangi kombinga ye mwene.”
^ Nenge “oomwenyo dhaalongwa.”
