Iilonga yaayapostoli 15:1-41
-
Oontamana muAntiokia kombinga yokukenkwa (1, 2)
-
Omukundu gwa etwa kuJerusalem gu kandulwe po (3-5)
-
Aakuluntugongalo naayapostoli ya gongala (6-21)
-
Ontumwafo ya za kolutuwiliki (22-29)
-
Okwiikaleka kokule nombinzi (28, 29)
-
-
Omagongalo ga tsuwa omukumo kontumwafo (30-35)
-
Paulus naBarnabas taya topoka (36-41)
15 Opo nduno aalumentu yamwe ya za kuJudea oya tameke okulonga aamwatate taya ti: “Kapu na ngoka ta vulu okuhupithwa, ngele ina kenkwa, ngaashi Ompango yaMoses tayi ti.”
2 Ihe konima yaashono, pokati kaalumentu mboka naPaulus naBarnabas opwa holoka etopoko nosho wo oontamanana, nopwa ningwa elongekidho, opo Paulus naBarnabas nosho wo aamwatate yalwe ya ye kaayapostoli nokaakuluntu yoshigwana muJerusalem, omolwoshinima shoka.*
3 Onkee ano konima sho Paulus naBarnabas ya thindikilwa ondjilakati kegongalo, oya piti muFoinikia nomuSamaria, noya lombwele ooitaali ooyakwawo ombahu nokawawa* nkene aantu yomiigwana ya tameke okulongela Kalunga, naashoka osha li sha nyanyudha aamwatate ayehe noonkondo.
4 Sho ya thiki muJerusalem, oya taambiwa ko nawa kegongalo, kaayapostoli nosho wo kaakuluntu yoshigwana, noye ya hokololele iinima ayihe, mbyoka Kalunga a longa okupitila muyo.
5 Ihe yamwe yomoshimpaga shAafarisayi, mboka ya li ya ningi ooitaali, oya thikama, noya ti: “Aantu mboka yomiigwana oya pumbwa okukenkwa e taya lombwelwa ya vulike kOmpango yaMoses.”
6 Onkee ano aayapostoli naakuluntu yoshigwana oya gongala, ya kundathane kombinga yoshinima shoka.
7 Konima sho ya kundathana* ethimbo ele, Petrus okwa thikama, nokwa ti kuyo: “Aamwatate, omu shi shi nawa kutya okuza nale, Kalunga ongame a hogolola mokati keni, opo ndi uvithile aantu yomiigwana yilwe onkundana ombwanawa, noya itaale.
8 Na Kalunga, ngoka a tseya shoka shi li momutima, okwa ulika kutya okwe ya taamba ko, sho e ya pe ombepo ondjapuki, ngaashi owala natse e yi tu pe.
9 Okwa ulika kutya kapu na nando eyooloko lyasha pokati ketu nayo, ihe okwa yelitha omitima dhawo, molwaashoka ya itaala.
10 Omolwashike ano ngashingeyi, mwa hala okumakela Kalunga, sho tamu tsike aalongwa ooyakweni ondjoko ondhigu, ndjoka ootatekulululwa nosho wo tse twa nyengwa oku yi humbata?
11 Kakele kaashono, otwa itaala kutya natse otatu hupithwa okupitila mesilohenda lyOmuwa Jesus, momukalo gwa faathana ngaashi yo.”
12 Nena ongundu ayihe oya mwena, noya tameke okupulakena kuBarnabas naPaulus, sho taya hokolola kombinga yiikumithalonga oyindji niilongankondo, mbyoka Kalunga a longo okupitila muyo, mokati kiigwana.
13 Konima sho ya mana okupopya, Jakob okwe ya yamukula ta ti: “Aamwatate, uvii ndje.
14 Simeon okwa hokolola nawa nkene Kalunga a dhimbulukwa aantu yomiigwana yilwe, naamoka omo a tameke okwiilikolela aantu, mboka taya ka ithanwa nedhina lye.
15 Shoka oshi li metsokumwe naashoka sha nyolwa kaahunganeki, sho ya ti:
16 ‘Konima yiinima mbika, otandi ka galuka notandi ka tungulula ishewe egumbo* lyaDavid, ndyoka lya teka po; otandi ka tungulula ishewe omakulukuma galyo,
17 opo aantu, mboka ya hupa po, ya vule okukonga Jehova ya mana mo, pamwe naantu yomiigwana ayihe, mboka haya ithanwa nedhina lyandje. Jehova osho ta ti, ngoka ta gwanitha po iinima mbika,
18 mbyoka a kala e shi okuza konale.’
19 Onkee ano etokolo* lyandje kali shi oku shi ningitha oshidhigu kaantu yomiigwana, mboka ya hala okulongela Kalunga,
20 ihe otandi ya nyolele owala ya yande iinima, mbyoka ya yambelwa iikalunga, omilalo dha nyata,* onyama yoshinamwenyo sha pondwa* nosho wo ombinzi.
21 Okuza konalenale, Ompango yaMoses oya li hayi leshwa mokule mesabati kehe moosinagoga, naantu oya li haye yi uvitha miilando niilando.”
22 Opo nduno aayapostoli, aakuluntugongalo pamwe negongalo alihe, oya tokola ya tume kuAntiokia aalumentu yamwe, mboka ya hogolola mokati kawo, ya ye pamwe naPaulus naBarnabas; oya tumu ko Judas, ngoka ha ithanwa Barsabas, nosho wo Silas, mboka ya li haya kwatele komeho mokati kaamwatate.
23 Oya nyola ontumwafo, e taye yi pe Judas naSilas tayi ti:
“Tse aayapostoli naakuluntugongalo, ano aamwaho, natu mú kunde aamwatate yomuAntiokia, yomuSiria, noyomuKilikia, mboka mwa za miigwana yilwe.
24 Otwa uvu kutya aalumentu yamwe yomutse oye ya kune taye mú piyaganeke noohapu dhawo, taya kambadhala oku mú pukitha,* nonando hatse twe ya lombwela ye shi ninge.
25 Onkee ano otwa thiki pehulithodhiladhilo, tu hogolole aalumentu yamwe yomutse, ye ye pamwe nookuume ketu aaholike Barnabas naPaulus,
26 aalumentu, mboka ya hupula oomwenyo dhawo, omolwedhina lyOmuwa gwetu, Jesus Kristus.
27 Onkee ano otatu mú tumine Judas naSilas, opo nayo ye mú lombwele iinima mbyoka okana nokana.
28 Tse otwa tokola pawiliko lyombepo ondjapuki, kaatu mú tsike we nando omutenge gulwe, kakele ko ku mú tseyithila iinima, mbika ya pumbiwa, tayi landula:
29 okuyanda iinima, mbyoka ya yambelwa iikalunga, ombinzi, onyama yoshinamwenyo sha pondwa* nosho wo omilalo dha nyata.* Ngele omwa ikaleke kokule thiluthilu niinima mbika, otashi ke mú endela nawa. Kalii po nawa!
30 Onkee ano sho aalumentu mboka ya lalekwa, ya ye, oya yi kuAntiokia e taya gongaleke ongundu ayihe yaalongwa, noye ya pe ontumwafo ndjoka.
31 Konima sho ye yi lesha, oya li ya nyanyukwa omolwetsomukumo ndyoka.
32 Molwaashoka Judas naSilas nayo oya li aahunganeki, oya tsu omukumo aamwatate niipopiwa oyindji, noye ya nkondopaleke.
33 Konima sho ya kala moka uule wethimbo, aamwatate oye ya laleke nombili, ya shune kwaamboka ye ya tumine.
34 ——
35 Ihe Paulus naBarnabas oya kala muAntiokia taya longo aantu, notaya uvitha onkundana ombwanawa yoohapu dhaJehova pamwe nayalwe oyendji.
36 Konima yomasiku gontumba, Paulus okwa ti kuBarnabas: “Ngashingeyi* natu shune tu ka talele po aamwatate yokiilando ayihe, hoka twa li twa uvithile oohapu dhaJehova, tu ka tale nkene ye li po.”
37 Barnabas okwa li a tokola toko okuya pamwe naJohannes, ngoka a li ha ithanwa Markus.
38 Ihe Paulus ka li a hala Johannes a ye pamwe nayo, molwaashoka okwa li e ya thigi muPamfilia, noka li a ya pamwe nayo miilonga yokuuvitha.
39 Opo ihe shoka osha etitha oontamanana dha kwata miiti pokati kawo e taya topoka. Nena Barnabas okwa yi pamwe naMarkus kuKipro nosikepa.
40 Konima sho aamwatate ya galikana Jehova a sile oshimpwiyu Paulus, okwa hogolola Silas a ye pamwe naye.
41 Paulus okwa ende ta koleke omagongalo gomuSiria nogomuKilikia.
Omanyolo gopevi
^ Nenge “omolwoontamanana ndhoka.”
^ Nenge “iinima ayihe.”
^ Nenge “ludhikathana.”
^ Nenge “etsali.”
^ Nenge “edhiladhilo.”
^ MOshigreka “porneia.” Tala Omafatululo giitya.
^ Nenge “oshinamwenyo shoka sha dhipagwa inaashi za ombinzi.”
^ Nenge “okupukitha oomwenyo dheni.”
^ Nenge “oshinamwenyo shoka sha dhipagwa inaashi za ombinzi.”
^ MOshigreka “porneia.” Tala Omafatululo giitya.
^ Nenge tashi vulika, “kutya nduno otashi pula shike.”
