Iilonga yaayapostoli 17:1-34
17 Paulus naSilas oya pitile muAmfipolis nosho wo muApollonia e taye ya muTessalonika, moka mwa li mu na osinagoga yAajuda.
2 Onkee ano Paulus okwa yi meni kuyo, ngaashi ha ningi shito, nokwa tompathana nayo uule womasabati gatatu ta longitha Omanyolo,
3 te ya yelithile noku ya ulukila mOmanyolo kutya Kristus okwa li e na okuhepekwa nokuyumudhwa kuusi, ta ti: “Jesus, ngoka tandi mu mú uvithile, oye Kristus.”
4 Nena yamwe yomuyo nosho wo ongundu onene yAagreka, mboka ya li haya longele Kalunga, pamwe naakiintu yontumba aanamadhina, oya ningi ooitaali, noya tameke okukala haya kala pamwe naPaulus naSilas.
5 Ihe Aajuda oya sile Paulus naSilas efupa e taya ithana aalumentu yamwe aakolokoshi, mboka ya li haya kala taya kondowala pomahala gomalandithilo, noya imanga kumwe ya geya e taya eta evundakano moshilando. Nena oya ponokele egumbo lyaJason, taya kongo Paulus naSilas, ye ya ete kongundu yaantu ya geya.
6 Ihe sho inaaye ya adha mo, oya kookololele Jason naamwatate yamwe kaaleli yoshilando, taya igidha taya ti: “Aalumentu mboka taya piyaganeke* uuyuni awuhe, oye li wo moshilando shetu,
7 naJason okwe ya taamba ko ye li aayenda megumbo lye. Aalumentu ayehe mbaka oye li ompinge noompango dhOmukesari, sho taya ti kutya opu na omukwaniilwa gulwe, Jesus.”
8 Sho ongundu yaantu naaleli yoshilando ye shi uvu, oya tila.
9 Konima sho Jason nooyakwawo yalwe ya futu ya mangululwe, oye ya etha ya ye.
10 Nziya, sho kwa toko, aamwatate oya tumu Paulus naSilas kuBerea. Sho ya thiki, oya yi mosinagoga yAajuda.
11 Aantu yomuBerea oya li aanandunge ye vule mboka yomuTessalonika, oshoka yo oya li ya taamba ko oohapu dhaKalunga nomutima aguhe, noya konakona Omanyolo nuukeka esiku kehe, ya tale ngele shoka ya lombwelwa oshoshili tuu.
12 Onkee ano oyendji yomuyo oya ningi ooitaali, mwa kwatelwa omwaalu omushona gwaakiintu Aagreka aainekelwa nosho wo aalumentu yamwe.
13 Ihe sho Aajuda yomuTessalonika ya uvu kutya Paulus ota uvitha wo oohapu dhaKalunga muBerea, oya yi ko, ya ka hwahwameke nokusikumudha ongundu yaantu.
14 Opo nduno aamwatate oya tumu nziya Paulus a ye komunkulofuta, ihe Silas naTimoteus oya kala po.
15 Onkee ano mboka ya li ya thindikile Paulus oye mu fala sigo okuAtena, noya shuna, konima sho ya lombwelwa kutya Silas naTimoteus naya ye kuPaulus meendelelo, ngaashi tashi vulika.
16 Manga Paulus e ya tegelela muAtena, okwa mono kutya moshilando moka omwa udha iikalunga, nosha li she mu uvitha nayi.
17 Opo nduno okwa tameke okutompathana nAajuda mosinagoga nosho wo naantu yalwe, mboka haya longele Kalunga, nesiku kehe, okwa li ha uvithile ayehe, mboka ya li haya kala pomahala gomalandithilo.
18 Ihe Aafilosofi* yamwe yomAaepikuri noyomAastoa oya tameke oku mu pataneka, nayamwe oya li taya ti: “Omupopyagani nguno okwa hala oku tu lombwela shike?” Yamwe oya ti: “Ota monika a fa ta uvitha kombinga yookalunga aakwiilongo.” Oya popi ngawo, molwaashoka Paulus okwa li ta uvitha onkundana ombwanawa kombinga yaJesus noyeyumuko.
19 Onkee ano oye mu kwata e taye mu fala kOmpangu yoPombanda yomuAtena* taya ti: “Otwa hala okutseya kombinga yelongo epe, ndyoka to longo aantu.
20 Oshoka iinima yimwe, mbyoka to popi, iipe momakutsi getu, notwa hala okutseya kutya iinima mbyoka otayi ti shike.”
21 Ihe nokuli Aayatena ayehe naakwiilongo, mboka haya kala mo,* uuna kaaye na shoka taya ningi, oya li haya kundathana nokupulakena kiinima iipe.
22 Nena Paulus okwa thikama mokati kOmpangu yoPombanda yomuAtena* e ta ti:
“Aalumentu ne, Aayatena, ondi wete kutya otamu monika hamu tila unene ookalunga miinima ayihe,* mú vulithe aantu yalwe.
23 Pashiholelwa, sho nda li tandi endaenda moshilando sheni nokukonenena omahala geni omayapuki,* onda mono nokuli oshiyambelo sha nyolwa ngeyi, ‘OshaKalunga, ngoka kee shiwike.’ Onkee ano Kalunga, ngoka hamu mu longele kamu mu shi, oye tandi mú uvithile.
24 Kalunga, ngoka a shiti uuyuni niinima ayihe, mbyoka yi li mo, oye Omuwa gwegulu nogwevi, ngoka ihaa kala mootempeli, dha tungwa niikaha.
25 Ye ina pumbwa aantu ye mu kwathele niikaha yawo, a fa ando a pumbwa sha, molwaashoka oye a pa aantu ayehe omwenyo nomufudho niinima ayihe.
26 Okwa shiti aantu yomiigwana ayihe okuza momuntu gumwe, opo ya kale kombanda yevi alihe, nokwe ya uthile wo nale omathimbo gawo noongamba dhaampoka ye na okukala,
27 opo ya konge Kalunga, ngele otaya vulu oku shi ninga mokupampadhala kwawo, noya vule lela oku mu mona, oshoka uushili owo kutya ke li nando kokule nakehe gumwe gwomutse.
28 Oshoka omolwe, otu na omwenyo, tatu inyenge, notu li po, nayamwe nokuli yomaatoti yeni yiitewo oya tile: ‘Oshoka natse wo oyana.’*
29 “Onkee ano molwaashoka tse oyana* yaKalunga, inatu dhiladhila kutya Kalunga okwa fa oshingoli, oshisiliveli, nenge emanya, nenge a fa oshinima sha hongwa, nosha etwa po kaantu.
30 Odhoshili kutya Kalunga okwa kala ta idhidhimikile aantu, sho ya li kaaye mu shi, ihe ngashingeyi, ota tseyithile aantu ayehe kehe pamwe kutya naya itedhulule.
31 Molwaashoka okwa tula po esiku, sho ta ka pangula uuyuni awuhe pauyuuki, ta longitha omulumentu, ngoka a langeka po, nokwe mu yumudha kuusi, opo a ulukile aantu ayehe kutya esiku ndyoka otali ke ya shili.”
32 Sho ya uvu kombinga yeyumuko lyaasi, yamwe oya tameke okusheka Paulus, omanga yalwe ya ti: “Oshinima shika otwa hala ishewe tu ke shi uve kungoye oshikando tashi ya.”
33 Onkee ano Paulus okwe ya thigi po,
34 ihe aalumentu yamwe oye mu wayimine, noya ningi ooitaali. Mokati kawo omwa li Dionisius, ngoka a li oshilyo shOmpangu yoPombanda yaAtena,* nosho wo omukiintu gwedhina Damaris nayalwe ishewe.
Omanyolo gopevi
^ Nenge “taya vundakanitha.”
^ Nenge “aantu mboka ya itaala muunongo wopantu.”
^ Eln., “koAreopagi.”
^ Nenge “mboka ya li taya talele po.”
^ Eln., “koAreopagi.”
^ Nenge “mu hole unene iinima yopakalunga.”
^ Nenge “gokugalikanena.”
^ Nenge “oludhi lwe.”
^ Nenge “oludhi.”
^ Eln., (shoAreopagi.)
