Iilonga yaayapostoli 18:1-28
18 Konima yaashoka, Paulus okwa zi mo muAtena, nokwa yi kuKorinto.
2 Hoka okwa adha ko omulumentu Omujuda, gwedhina Akula, omvalele yaPontus, ngoka a adhika opo a zi kuItalia pamwe nomukulukadhi gwe Priskila, molwaashoka Klaudius okwa li a gandja elombwelo Aajuda ayehe ya ze mo muRoma. Onkee ano Paulus okwa yi kuyo,
3 a ka kale megumbo lyawo, nokwa li ha longo pamwe nayo, molwaashoka oya li haya longo iilonga ya faathana yokuninga ootenda.
4 Mesabati kehe, okwa li hayi kosinagoga, a ka gandje iipopiwa,* a tompe Aajuda nosho wo Aagreka, ya itaale.
5 Sho Silas naTimoteus ya zi kuMakedonia, Paulus okwa tameke okuuvitha oohapu dhaKalunga a mana mo, nokutompa Aajuda kutya Jesus oye Kristus.
6 Ihe konima sho ya tsikile oku mu pataneka noku mu sheka, okwa ipupula ontsi koonguwo dhe, nokwa ti kuyo: “Ondjo yombinzi yeni nayi kale kombanda yeni. Ngame kandi na ondjo. Okuza ngashingeyi, otandi kala handi yi kaantu yomiigwana yilwe.”
7 Onkee ano okwa zi mo moka,* nokwa yi megumbo lyomulumentu gwedhina Titius Justus, ngoka a li ha longele Kalunga noku na egumbo lya tegama nosinagoga.
8 Ihe Krispus, omukuluntu gwosinagoga, okwa itaale mOmuwa, pamwe naanegumbo lye ayehe. Nena oyendji yomAakorinto, mboka ya uvu onkundana ombwanawa, oya itaale e taya ninginithwa.
9 Kakele kaashono, Omuwa okwa lombwele Paulus memoniko uusiku ta ti: “Ino kala wa tila, ihe tsikila okuuvitha, noino teka omukumo,”*
10 oshoka ngame ondi li pamwe nangoye, nokapu na nando omuntu te ku ponokele, e ku etele oshiponga; oshoka moshilando shika ondi na mo aantu oyendji.”
11 Onkee ano okwa kala moka uule womumvo noomwedhi hamano, te ya longo oohapu dhaKalunga.
12 Sho Gallio a li ngoloneya* gwaAkaia, Aajuda oya imanga kumwe, ya kwate po Paulus e taye mu fala kompangu,
13 taya ti: “Omulumentu nguka ota longo aantu ya longele Kalunga momukalo, ngoka gu li ompinge nompango yoshilongo shetu.”
14 Ihe sho Paulus a li e li pokupopya, Gallio okwa ti kAajuda: “Aajuda ne, andola okwa li a longa sha shili sha puka, nenge uuwinayi washa, ando onda pulakene kune neidhidhimiko.
15 Ihe ngele otamu ludhikathana shi na ko nasha noohapu, nomadhina nosho wo nompango yeni, shoka oshi li miikaha yeni. Inandi hala okukala omutokoli gwiinima mbyoka.”
16 Opo ihe okwe ya tidha mo mompangu.
17 Onkee ano ayehe oya kwata Sostenes, omukuluntu gwosinagoga, noya tameke oku mu dhenga manga e li komeho goshipundi shokupangula. Ihe Gallio ina ya mo nando olunyala miinima mbyoka.
18 Ihe konima sho Paulus a kala muKorinto uule womasiku gontumba, okwa laleke aamwatate, nokwa yi pamwe naPriskila naAkula nosikepa kuSiria. Sho Paulus a li muKenkrea, okwa kululitha ko omafufu ge, ga ninge omafupi, oshoka okwa li a gana kuKalunga.
19 Onkee ano sho ya yi muEfeso, okwe ya thigi po e ta yi mosinagoga, nokwa tompathana nAajuda.
20 Nonando oya kala taye mu indile a kale po ishewe uule womasiku gontumba, ka li e shi zimine,
21 ihe okwe ya laleke, nokwe ya lombwele ta ti: “Otandi ka galukila kune ishewe, ngele Jehova okwe shi hala.” Opo nduno muEfeso okwa zi mo nosikepa,
22 nokwa yi kuKesarea. Okuza mpono okwa yi* a ka talele po egongalo, opo ihe ta yi kuAntiokia.
23 Konima sho a kala moka uule wethimbo, okwa zi mo e ta yi, a ka talele po omahala gi ili nogi ili, gomiitopolwa yaGalatia noyaFrigia, ta tsu omukumo aalongwa ayehe.
24 Omulumentu Omujuda gwedhina Apollos, omvalele yaAleksandria, okwe ya muEfeso; okwa li enyakwa* mokupopya, noku shi Omanyolo nawa.
25 Omulumentu ngoka okwa li a longwa kombinga yaJehova, nombepo ondjapuki oye mu kwathele a longe aantu nokupopya iinima yi li paushili kombinga yaJesus, ihe okwa li owala e shi eninginitho lyaJohannes.
26 Okwa tameke okupopya nuulaadhi mosinagoga, naasho Priskila naAkula ye mu uvu, oye mu ithana po e taye mu yelithile ondjila yaKalunga nawanawa paushili.
27 Shimwe ishewe, molwaashoka okwa li a hala okuya kuAkaia, aamwatate yomuEfeso oya nyolele aamwatate yokuAkaia ontumwafo, ye mu taambe ko nombili. Onkee ano sho a thiki hoka, okwa kwathele noonkondo mboka ya ningi ooitaali kesilohenda lyaKalunga.
28 Okwa li a popi nuulaadhi, nokutompa thiluthilu Aajuda kutya oya puka, sho e ya leshele montaneho Omanyolo, ngoka taga ulike kutya Jesus oye Kristus.
Omanyolo gopevi
^ Nenge “a ka tompathane nayo.”
^ Sha hala okutya, mosinagoga.
^ Eln., “noino mwena.”
^ Ngoloneya gwoshitopolwalongo shaRoma. Tala Omafatululo giitya.
^ Tashi vulika kuJerusalem.
^ Nenge “omunongo.”
