Iilonga yaayapostoli 19:1-41
19 Pethimbo ndyoka, sho iinima mbyoka tayi ningwa, Apollos okwa li muKorinto, ye Paulus okwa piti miitopolwa yokoondundu, sigo a thiki muEfeso. Hoka, okwa adha ko aalongwa yamwe,
2 nokwa ti kuyo: “Omwa pewa tuu ombepo ondjapuki sho mwa ningi ooitaali?” Oye mu yamukula ya ti: “Aawe, tse inatu uva nando onale kutya okwa kala ombepo ondjapuki.”
3 Onkee ano okwa ti: “Omwa ninginithwa ano neninginitho lya tya ngiini?” Oya ti: “Oneninginitho lyaJohannes.”
4 Paulus okwa ti: “Johannes omuninginithi okwa ninginitha aantu, ya ulike kutya oya itedhulula, nokwa kala ta lombwele aantu ya itaale mungoka te ya konima ye, ano muJesus.”
5 Sho ya uvu oohapu dhe ndhoka, oya ninginithwa medhina lyOmuwa Jesus.
6 Opo nduno sho Paulus e ya tenteke iikaha ye, oya pewa ombepo ondjapuki, noya tameke okupopya omalaka omakwiilongo nokuhunganeka.
7 Aalumentu ayehe mboka kumwe oya li 12 lwaampono.
8 Uule woomwedhi ndatu, Paulus okwa kala ha yi mosinagoga, ta popi nuulaadhi, ta gandja iipopiwa nota tompo aantu kombinga yUukwaniilwa waKalunga.
9 Ihe sho yamwe ya tindi okwiitaala,* noya sheke Ondjila yOmuwa montaneho yongundu yaantu, Paulus okwa zi po puyo pamwe naamboka ya itaala e ta kala te ya pe iipopiwa esiku kehe moshinyanga shosikola yaTirannus.
10 Shoka okwa kala te shi ningi uule womimvo mbali, sigo oosho Aajuda nAagreka ayehe mboka haya kala moshitopolwalongo shaAsia ya uvu oohapu dhOmuwa.
11 Kalunga okwa tsikile okulonga iikumithalonga iinene okupitila muPaulus,
12 nokuli nuulapi wokwiitheta epupyu nuutetahema, mboka a longitha, owa li wa falwa kaavu e taya aluka, noombepo dha nyata odha zi mo muyo.
13 Ihe Aajuda yamwe, mboka ya li haya endaenda taya tidha mo oondemoni oya li wo ya kambadhala okulongitha edhina lyOmuwa Jesus, ya tidhe mo oombepo dha nyata mwaamboka ya li ye dhi na; oya li haya ti: “Otandi mú lombwele mú ze mo medhina lyaJesus, ngoka ha uvithwa kuPaulus.”
14 Mokati kaamboka ya li haye shi ningi omwa li oyanamati yaheyali yomuyambi omukuluntu Omujuda, gwedhina Skeva.
15 Ihe ombepo ya nyata oye ya yamukula tayi ti: “Jesus ondi mu shi, naPaulus ondi mu shi ngaa; ihe ne oolye ano?”
16 Okuza mpono, omulumentu, ngoka e na ombepo ya nyata, okwe ya nukile e te ya kondjitha, noku ya sinda ayehe, nomegumbo moka, oya zi mo taya matuka ye li omalutu gowala,* noya tosholwa iilalo.
17 Oshinima shika osha tseyika kAajuda ayehe nAagreka yomuEfeso; opo ihe ayehe oya kwatwa kuumbanda, nedhina lyOmuwa Jesus olya tumbalekithwa.
18 Nena oyendji yomwaamboka ya li ya ningi ooitaali oye ya e taya hempulula nokuhokolola montaneho oondjo dhawo.
19 Eeno, oyendji yomwaamboka ya li oompulile oya eta omambo gawo e taye ga gongele pamwe, noye ga fike po montaneho yaantu ayehe. Sho ya tula kumwe ondando yomambo ngoka, oya mono kutya ongushu yago oyi thike piisiliveli 50 000.
20 Onkee ano oohapu dhaJehova odha tsikile okutaandela noonkondo, nodha holola oonkondo dhadho.
21 Konima sho iinima mbyoka ya ningwa, Paulus okwa tokola a pite muMakedonia nomuAkaia, opo a ye nawa kuJerusalem. Okwa ti: “Konima ngele nda yi kuJerusalem, otandi ka ya wo kuRoma.”
22 Onkee ano kuMakedonia okwa tumu ko aalumentu yaali, Timoteus naErastus, mboka ya li haye mu yakula, ihe ye okwa kala manga moshitopolwalongo shaAsia uule wethimbo.
23 Pethimbo ndyoka, opwa tukuluka epiyagano enene kombinga yOndjila yOmuwa.
24 Oshoka omulumentu gwedhina Demetrius, omuhambudhi gwoshisiliveli, ngoka a li ha hambula iiyelekela iishona yoshisiliveli yoshikalunga Artemis, okwa kala ha likolitha oonkulungu oonkwawo eliko olindji.
25 Okwe dhi ithana dhi gongale nosho wo aahambudhi yalwe, nokwa ti: “Yakwetu, omu shi shi nawa kutya ongeshefa ndjika oye tu likolitha oshindji.
26 Ihe ngashingeyi, omu shi wete, nomwa uva nkene Paulus ta itaalitha aantu oyendji, hamuEfeso amuke, ihe konyala nomoshitopolwalongo ashihe shaAsia kutya ookalunga ayehe, mboka ya ningwa niikaha, kaye shi ookalunga shili.
27 Kakele kaashono, oshinima shoka osha puka, oshoka aantu otaya ka popila muuwinayi ongeshefa yetu, notashi ka dhinitha wo otempeli yakalunga omunene omukiintu, Artemis, ngoka ha longelwa moshitopolwalongo ashihe shaAsia, nuuyuni awuhe itawu ka vula okumona esimano lye.”
28 Sho aalumentu mboka ye shi uvu, oya geye noonkondo, noya tameke okwiigidha taya ti: “Artemis gwaEfeso omunene!”
29 Onkee ano moshilando omwa tukuluka epiyagano, naantu ayehe oya mbombolokele kehala lyomaudhano e taya kookololele mo aalumentu Aamakedonia, Gaius naAristarkus, mboka ya li haya ende pamwe naPaulus.
30 Paulus naye okwa li a hala okuya meni, a ka popye naantu, ihe aalongwa kaya li ye mu pitike, a ye mo.
31 Nokuli aaunganeki yamwe yiituthi nosho wo yomaudhano, mboka ya li haya ungaunga naPaulus nombili, oye mu tumine elaka taye mu indile kaa tule omwenyo gwe moshiponga mokuya mehala ndyoka.
32 Aantu oya li nokuli taya igidha oohapu tadhi kondjithathana, shoka she ya ngwangwaneke, noyendji kaya li ye shi kutya oya gongala nelalakano lyashike.
33 Onkee ano oya hili mo Aleksander mongundu yaantu, Aajuda e taye mu undulile komeho, na Aleksander okwe ya udhikile noshikaha she ya mwene, opo a popye nayo.
34 Ihe sho ya dhimbulula kutya ye Omujuda, ayehe oya tameke okwiigidha oshita uule woowili mbali lwaampono taya ti: “Artemis gwaEfeso omunene!”
35 Sho amushanga gwoshilando a mweneke ongundu yaantu, okwa ti: “Aalumentu ne yomuEfeso, mbela olye gwomune kee shi kutya oshilando shaEfeso osho hashi tonatele otempeli yaArtemis omunene nosho wo oshiyelekela, shoka sha gwa megulu?
36 Molwaashoka iinima mbika itayi vulu okupatanekwa, ngungumaneni, noinamu katuka onkatu nziya.
37 Oshoka aalumentu mbaka mwe eta mpaka, kaye shi aayugi yootempeli, noihaya sheke kalunga ketu omukiintu.
38 Onkee ano ngele Demetrius naahambudhi ooyakwawo kaya uvitathane nagumwe, opu na omasiku, ngoka aatokoli haya kala ya manguluka, noongoloneya* opo ye li; oko naya fale uupyakadhi wawo.
39 Ihe ngele omwa hala sha shi vulithe pwaashoka, oshi na okutokolwa moshigongi shoshigwana sha ikolelela kompango.
40 Oshoka oshinima, shoka sha ningwa nena, otashi vulu lela oku tu etela, notu talike ko tu li aanashipotha, molwaashoka katu na etompelo lyokuulika kutya omolwashike ongundu ndjika tayi piyagana.”
41 Konima sho a popi ngawo, okwa laleke aantu, mboka ya li ya gongala.
Omanyolo gopevi
^ Nenge “ya tsikile okukukutika omitima dhawo noinaya itaala.”
^ Nenge tashi vulika, “ye li owala muumbulukweya wokohi.”
^ Ngoloneya gwoshitopolwalongo shaRoma. Tala Omafatululo giitya.
