Iilonga yaayapostoli 2:1-47
2 Sho ayehe ya li ya gongala mehala limwe, mesiku lyoshituthi shOpentekoste,
2 ohaluka, manga ya li ya kuutumba, oya uvu oshihomo sha zi megulu sha fa ombepo onene, naayehe megumbo oya uvu oshihomo shoka.
3 Opo ihe oya mono omalaka ga fa omulilo, noga halakanene mokati kawo, nakehe gumwe okwa lambelwa kulimwe kombanda yomutse gwe.
4 Nena ayehe oya tililwa ombepo ondjapuki, noya tameke okupopya omalaka ga yoolokathana, ngaashi naanaa ombepo ye ya ningitha ya vule oku ga popya.
5 Pethimbo mpoka, muJerusalem omwa li Aajuda aatilikalunga, mboka ya li ya za miigwana ayihe yokombanda yevi.
6 Onkee ano sho ongundu yaantu ya uvu oshihomo shoka, oya gongala, noya li ya ngwangwana, molwaashoka kehe gumwe okwa uvu aalongwa taya popi naye melaka lye.
7 Oya li ya kumwa noonkondo, noya ti: “Taleni, aantu ayehe mbaka taya popi kaye shi Aagalilea nani?
8 Ongiini nduno sho kehe gumwe gwomutse e ya uvite, sho taya popi melaka, ndyoka a yama?
9 Yamwe yomutse otwa za kuPartia, kuMedia, nokuElam; aakalimo yomuMesopotamia, yomuJudea, yomuKappadokia, yomuPontus noyomoshitopolwalongo shaAsia,
10 yomuFrigia, yomuPamfilia, yomuEgipiti noyomiitopolwa yaLibia, popepi naKireni; aatalelipo ya za kuRoma, kuJuda, naamboka ya ninga yeitaalo lyOshijuda;
11 kuKreta; nokuArabia, ihe otu ya uvite sho taya popi kombinga yiilongankondo yaKalunga momalaka getu.”
12 Oshinima shoka osha li she ya kumitha ayehe noonkondo noshe ya ngwangwaneke, noya pulathana taya ti: “Shika osha hala okutya ngiini?”
13 Ihe yalwe oya li taye ya sheke taya ti: “Oya kolwa komaviinu omatoye.”*
14 Ihe Petrus okwa thikama pamwe naayapostoli 11, nokwa popi newi lyopombanda ta ti: “Aantu ne yomuJudea naakalimo ayehe yomuJerusalem, tseyeni oshinima shika, e tamu pulakene neitulomo kwaashoka tandi mú lombwele.”
15 Aantu mbaka inaya kolwa, ngaashi tamu ti, oshoka ngashingeyi otundi ontitatu.*
16 Kakele kaashono, shika osho sha hunganekwa okupitila momuhunganeki Joel, sho a ti:
17 ‘Kalunga okwa ti: “Momasiku gahugunina, otandi ka tilila ombepo yandje maantu yomaludhi agehe,* opo nduno oyanamati noyanakadhona yeni otaya ka hunganeka; aalumentu aagundjuka otaya ka mona omamoniko, naalumentu aakokele otaya ka lala oondjodhi.
18 Pomasiku ngoka, otandi ka tilila nokuli ombepo yandje maapiya yandje aalumentu naakiintu, notaya ka hunganeka.
19 Otandi ka holola iinima iikumithi kegulu, nomandhindhiliko kevi, ombinzi, omulilo nolwithi talu gundumuka.
20 Etango otali ka luudha, nomwedhi otagu ka tiligana gwa fa ombinzi, manga esiku enene lyaJehova lya simana inaali ya;
21 nakehe ngoka ta ithana edhina Jehova ota ka hupithwa.”’
22 “Aaisraeli ne, pulakeneni oohapu ndhika: Jesus Omunasareti oye omulumentu, ngoka mwe mu hololelwa kuKalunga montaneho, okupitila miilongankondo nomiikumithalonga nosho wo momandhindhiliko, ngoka Kalunga a longo mokati keni okupitila muye, ngaashi ne yene mú shi shi.
23 Omulumentu nguka oye ngoka mwe mu kwata po e tamu mu gandja miikaha yaakolokoshi, ye mú alele komuti. Kalunga okwa etha shoka shi ningwe, molwaashoka okwa li e shi shoka tashi ka ningilwa Jesus.
24 Ihe Kalunga okwe mu yumudha moku mu mangulula mo moomango dheso, molwaashoka eso ka li na oonkondo dhoku mu mangela mo.
25 Oshoka David okwa popi kombinga ye a ti: ‘Jehova oku li aluhe pungame,* kolulyo lwandje, onkee itandi tenguka.
26 Shoka osha nyanyudha omutima gwandje, nelaka lyandje olya ligola kenyanyu. Otandi* ka kala ndi na etegameno;
27 molwaashoka ito ka etha ndje,* ndi kale mOmbila,* noito ka etha omupiya gwoye omudhiginini, a olele mo.
28 Ongoye ho ulukile ndje oondjila, ndhoka tadhi fala komwenyo; noto ka nyanyudha ndje noonkondo koshipala shoye.’
29 “Aamwatate, pitikii ndje, ndi popye nane nda manguluka, kombinga yatatekulululwa David kutya okwa si e ta fumvikwa, nombila ye oko yi li sigo onena.
30 Molwaashoka okwa li omuhunganeki, nokwa li e shi kutya Kalunga okwe mu uvanekela mokugana kutya gumwe gwomoluvalo lwe* ota ka kuutumba koshipangelapundi she,
31 okwa li a mono komeho yethimbo eyumuko lyaKristus nokwa li a popi kombinga yalyo kutya ita ka thigala mOmbila,* nolutu lwe italu ka olela mo.
32 Kalunga okwa yumudha Jesus, na atuheni otu li oombangi dhasho.
33 Onkee ano molwaashoka okwa tumbalekwa, a kale kolulyo lwaKalunga, nokwa pewa ombepo ondjapuki, ndjoka a uvanekelwa kuHe, okwe tu tilila shoka mú wete, nomu uvite.
34 Oshoka David ina londa a ye megulu, ihe okwa popi ye mwene ta ti: ‘Jehova okwa lombwele Omuwa gwandje ta ti: “Kuutumba kolulyo lwandje,
35 sigo nda ningi aatondi yoye oshilyatelo shoompadhi dhoye.”’
36 Onkee ano egumbo alihe lyaIsraeli nali tseye shili kutya Jesus, ngoka mwe mu alele komuti, Kalunga okwe mu ninga Omuwa nosho wo Kristus.”
37 Sho ya uvu oohapu ndhoka, odhe ya gumu komitima, noya lombwele Petrus nosho wo aayapostoli ayehe yalwe taya ti: “Aamwatate, natu ninge po shike?”
38 Petrus okwa ti kuyo: “Itedhululeni e tamu ninginithwa amuhe medhina lyaJesus Kristus, opo mú dhiminwe po oondjo dheni, notamu ka pewa omagano gombepo ondjapuki.
39 Oshoka Jehova Kalunga ketu okwe mú uvanekela kutya ote ke mú pa ombepo ondjapuki amuhe noyana yeni, naayehe, mboka ye li kokule, nosho wo ayehe, mboka ta ka ithana kuye.
40 Okwe ya lombwele wo oohapu odhindji moku ya uvithila nawanawa, nokwa kala te ya kumagidha ta ti: “Iyoololii mo mepipi ndika ekolokoshi, opo mú hupithwe.”
41 Onkee ano mboka ya taamba ko oohapu dhe nenyanyu oya ninginithwa, nomesiku ndyoka, komwaalu gwooitaali okwa gwedhwa aantu* 3 000 lwaampono.
42 Oya tsikile wo okudhiginina shoka ya longwa kaayapostoli, okweendathana,* okulya pamwe nokugalikana.
43 Aayapostoli oya longo iikumithalonga oyindji niilongankondo, naantu ayehe* oya kwatwa kuumbanda.
44 Ayehe, mboka ya ningi ooitaali, oya kala pamwe, noya topolelathana ashihe, shoka ya li ye na.
45 Oya li wo ya landitha po omaliko gawo, iimaliwa e taye yi topolelathana, sha ikolelela koompumbwe dhakehe gumwe.
46 Kehe esiku, oya kala haya gongala motempeli ye na elalakano limwe, noya li haya yi niikulya komagumbo gi ili nogi ili e taye yi topolelathana tashi zi komutima, noya nyanyukwa noonkondo,
47 taya hambelele Kalunga, noya li ya hokiwa kaantu ayehe. Pethimbo olyo tuu ndyoka, Jehova okwa kala nokwiindjipaleka omwaalu gwaamboka taya ka hupithwa.
Omanyolo gopevi
^ Nenge “komaviinu omape.”
^ sha hala okutya, lwopomugoyi gwongula.
^ Eln., “monyama yoludhi kehe.”
^ Nenge “komeho gandje.”
^ Eln., “onyama yandje.”
^ Nenge “omwenyo gwandje.”
^ Nenge “mu-Hades,” sha hala okutya, muusi. Tala Omafatululo giitya.
^ Eln., “gwomoombwetelo dhe.”
^ Nenge “mu-Hades,” sha hala kutya, muusi. Tala Omafatululo giitya.
^ Nenge “oomwenyo.”
^ Nenge “okutopolelathana shoka ye na.”
^ Nenge “noomwenyo adhihe.”
