Iilonga yaayapostoli 20:1-38
20 Sho epiyagano lya loto, Paulus okwa ithana aalongwa, nokonima sho e ya tsu omukumo e te ya laleke, okwa tameke nolweendo lwe lwokuya kuMakedonia.
2 Konima sho a ende miitopolwa yaamoka, ta tsu omukumo ooitaali ooyakwawo noonkondo, okwa yi kuGreka.
3 Hoka, okwa kala ko uule woomwedhi ndatu, ihe sho a li pokuya nosikepa kuSiria, okwa uvu kutya Aajuda oya pangela ompangela, ye mu dhipage, onkee ano okwa tokola a shune ta pitile muMakedonia.
4 Okwa yi pamwe naSopater, omwanamati gwaPirro gwokuBerea, Aristarkus naSekundus yokuTessalonika, Gaius gwokuDerbe, Timoteus nosho wo Tikikus naTrofimus yokoshitopolwalongo shaAsia.
5 Aalumentu mbaka oya tetekele e taya kala ye tu tegelela muTroas.
6 Ihe konima yoshituthi shiikwiila inaayi tulwa efulika, otwa zi mo muFilippi nosikepa, nokonima yomasiku gatano, otwa yi kuTroas, hoka twa kala uule womasiku gaheyali.
7 Mesiku lyotango lyoshiwike, sho twa gongala tu lye pamwe, Paulus okwa tameke oku ya pa omayele, nokwa popi nayo ethimbo ele sigo omokati kuusiku, oshoka esiku lya landula ko, okwa li ta yi.
8 Mondunda yopombanda, moka twa li twa gongala, omwa li mu na oolamba dhontumba.
9 Omanga Paulus ta popi, omulumentu omugundjuka, Eutikus, ngoka a li a kuutumba pekende lyela etitatu, okwa kotha e ta pwile moomposi e tagu po. Sho ya yi ko kuye, oye mu adha a sa.
10 Ihe Paulus okwa londoloka e ta yi pevi, ta lala kombanda ye, e te mu papatele, nokwa ti: “Inamu lila we, oshoka oku na omwenyo.”
11 Opo nduno okwa shuna pombanda e ta pambula oshikwiila nokwa tameke okulya. Konima yaashono, okwa tsikile okupopya uule wethimbo, sigo eluwa lya tende, opo nduno okwa yi.
12 Nena omumati oye mu fala kegumbo e na omwenyo, noya li ya hekelekwa noonkondo.
13 Okuza mpono, otwa tetekele nosikepa kuAsso, tu ka pitule Paulus, oshoka okwa li a hala okweenda kolupadhi, nokwe tu lombwele tu ke mu pitule hoka.
14 Ano sho e tu adha muAsso, otwe mu londeke po e tatu yi naye nosikepa kuMitilene.
15 Opo nduno hoka otwa zi ko nosikepa esiku lya landula ko e tatu yi kuKios, ihe konima yesiku ndyoka, otwe ya muSamos, nesiku lya landula ko, otwa thiki muMileto.
16 Paulus okwa tokola a pitilile mo muEfeso nosikepa, opo kaa kale mo ethimbo ele moshitopolwalongo shaAsia, oshoka okwa li e na okweendelela, a ye kuJerusalem, opo oshituthi shOpentekoste shi mu adhe a thika nale.
17 Ihe manga a li muMileto, okwa tumu etumwalaka kuEfeso, opo aakuluntugongalo ye ye kuye.
18 Sho ye ya kuye, okwa ti kuyo: “Omu shi shi nawa nkene nda li nda ihumbata mokati keni, okuza kesiku lyotango, sho nde ya mo moshitopolwalongo shaAsia.
19 Onda kala tandi longele Omuwa neifupipiko nda mana mo, nda nika oluhodhi notandi makelwa, oshoka Aajuda oya li ya hala okudhipaga ndje.
20 Ihe inandi etha oku mú lombwela iinima ayihe, mbyoka tayi mú etele uuwanawa, nokulonga aantu montaneho nosho wo egumbo negumbo.
21 Ihe onda uvithile nawanawa Aajuda nAagreka, ya itedhulule, opo ya vule okulongela Kalunga noya kale ye na eitaalo mOmuwa gwetu Jesus.
22 Ihe ngashingeyi, taleni, otandi yi kuJerusalem tandi wilikwa* kombepo ondjapuki, nonando kandi shi kutya oshike tashi ka ningilwa ndje hoka.
23 Kakele kaashono, ombepo ondjapuki oya kala tayi londodha ndje lwiikando miilando niilando kutya otandi ka tulwa mondholongo nokutsakaneka omaudhigu.
24 Nonando ongawo, omwenyo gwandje hago nda tala ko gwa simana,* ihe onda hala okumatuka sigo okethikilo, nokugwanitha po oshilonga shoka nda pewa kOmuwa Jesus, shokuuvitha onkundana ombwanawa yesilohenda lyaKalunga nawanawa.
25 “Ihe taleni, ondi shi shi kutya kapu na nando ogumwe gwomune ngoka nda uvithile kombinga yUukwaniilwa, ta ka mona oshipala shandje ishewe.
26 Onkee ano onda hala mú shi imonene ne yene nena ndjika kutya ngame kandi na nando ondjo yombinzi yomuntu,
27 oshoka ngame inandi etha nando oku mú lombwela ashihe, shoka Kalunga a hala oku mú ningila.
28 Itonateleni ne yene nosho wo oshigunda ashihe, shoka Kalunga e mú pa, oshoka Kalunga okwe mú langeka po mú li aatonateli yasho, okupitila mombepo ondjapuki, mú lithe egongalo lyaKalunga ndyoka e li landa nombinzi yOmwana.
29 Ondi shi shi kutya uuna kaandi po we, mokati keni otamu ke ya omambungu haga lyana, noitaga ka ungaunga nohenda noonzi,
30 nomokati keni otamu ka za aalumentu taya popi iinima ya penga, opo ya ilikolele aalongwa.
31 “Onkee ano kaleni mwa tonata nokudhimbulukwa kutya uule womimvo ndatu, uusiku nomutenya, inandi etha nando okukumagidha kehe gumwe gwomune nomahodhi taga pononoka.
32 Ngashingeyi, otandi mú gandja miikaha yaKalunga, notandi mú thigile oohapu dhesilohenda lye, ano oohapu, ndhoka tadhi vulu oku mú koleka noku mú pa uuthiga, mboka tamu ka mona pamwe naayapuki ayehe.
33 Ngame inandi ihalela nando oshisiliveli, oshingoli, nenge oonguwo dhomuntu.
34 Ne yene omu shi shi kutya onda longa niikaha yandje mwene, opo ndi gwanithe po oompumbwe dhandje nosho wo oompumbwe dhaamboka ndi li nayo.
35 Miinima ayihe mbika, onde mú ulukila nkene nda longo nuudhiginini momukalo nguka; nane wo kwatheleni aankundi, nokudhimbulukwa oohapu dhOmuwa Jesus, ndhoka a popile ye mwene ta ti: ‘Okugandja ohaku eta enyanyu enene ku vule okutaamba.’”
36 Opo nduno sho Paulus a mana okupopya oohapu ndhoka, okwa tsu oongolo pamwe nayo ayehe e ta galikana.
37 Nena ayehe oya lili noonkondo, noye mu papatele* e taye mu hupita,
38 oshoka sho e ya lombwele kutya itaya ka mona we oshipala she, oshe ya uvitha nayi noonkondo. Okuza mpono, oye mu thindikile kosikepa.
Omanyolo gopevi
^ Nenge “vulika.”
^ Nenge “gu na ongushu ya sha kungame.”
^ Eln., “idhingile mothingo.”
