Iilonga yaayapostoli 21:1-40
21 Konima sho twa topoka nayo, otwa yi mosikepa e tatu yi tu ukilila kuKos. Esiku lya landula ko, otwa yi kuRodos, nokuza mpono, otwa yi kuPatara.
2 Sho twa adha ko osikepa ya uka kuFoinikia, otwa londo e tatu yi nayo.
3 Konima sho twa mono ontuntu yaKipro, otwe yi thigi konima twe yi gameka kolumoho, notwa yi nosikepa kuSiria e tatu tula muTiro, moka osikepa ya li tayi ka helula oofulaha.
4 Opo nduno otwa kongo aalongwa e tatu ya mono, notwa kala moka uule womasiku gaheyali. Ihe aalongwa oya wilikwa kombepo ondjapuki ya kale taya lombwele Paulus kaa lyate mo nando ompadhi muJerusalem.
5 Onkee ano sho ethimbo lyetu lyokukala muTiro lya pu ko, otwa zi mo e tatu tsikile nolweendo lwetu, ihe aalongwa ayehe, mwa kwatelwa aakiintu naanona, oye tu thindikile sigo okondje yoshilando. Opo nduno otwa tsu oongolo komunkulofuta e tatu galikana
6 notwa lalekathana. Opo ihe otwa londo osikepa, yo e taya shuna komagumbo gawo.
7 Sho twa mana olweendo lwetu okuza kuTiro, otwa yi kuPtolemais, notwa yi tu ka popithe aamwatate e tatu kala puyo esiku limwe.
8 Esiku lya landula ko, otwa zi mo e tatu yi kuKesarea, notwa yi megumbo lyomuuvithi gwonkundana ombwanawa,* Filippus, ngoka a li gumwe gwomaalumentu mbeyaka yaheyali, notwa kala puye.
9 Omulumentu ngoka okwa li e na oyanakadhona yane inaaya hokanwa,* mboka ya li haya hunganeke.
10 Ihe konima sho twa kala moka uule womasiku gontumba, omuhunganeki gwedhina Agabus okwe ya a zi kuJudea.
11 Opo nduno okwe ya kutse, nokwa kutha epaya lyaPaulus e ta imanga nalyo koompadhi nokiikaha, nokwa ti: “Ombepo ondjapuki otayi ti, ‘Mwene gwepaya ndika osho ta ka mangwa ngeyi kAajuda muJerusalem, e taye mu gandja miikaha yaantu yomiigwana.’”
12 Sho twa uvu oohapu ndhoka, atuhe nosho wo mboka ya li po otwa tameke oku mu kumagidha kaaye ko nando kuJerusalem.
13 Opo nduno Paulus okwe ya yamukula a ti: “Omolwashike tamu lili, notamu teya ndje omukumo?* Shi tseyeni kutya ngame inandi ilongekidhila owala okumangwa po, ihe nokusila wo kuJerusalem, omolwedhina lyOmuwa Jesus.”
14 Sho twa nyengwa oku mu tompa, otwe mu etha,* notwa ti: “Ehalo lyaJehova nali gwanithwe.’’
15 Konima yomasiku gontumba, otwa ilongekidha okuya molweendo, notwa thikama, tu ye kuJerusalem.
16 Aalongwa yamwe yokuKesarea nayo oya yi pamwe natse, noye tu fala kegumbo lyaMnason gwokuKipro, gumwe gwomaalongwa yotango, oko tu ka kale hatu zi.
17 Sho twa thiki kuJerusalem, aamwatate oya li ye tu taamba ko nenyanyu.
18 Ihe esiku lya landula ko, Paulus okwa yi pamwe natse kuJakob, naakuluntugongalo ayehe oko ya li.
19 Opo nduno Paulus okwe ya popitha, nokwa tameke oku ya hokololela iinima ayihe, mbyoka Kalunga a longa mokati kiigwana okupitila miilonga ye yokuuvitha.
20 Konima sho ya uvu oohapu ndhoka, oya tameke okuhambelela Kalunga, noya lombwele Paulus ya ti: “Omumwatate, tala kutya ooitaali omayovi gangapi ye li mokati kAajuda, nohaya dhiginine Ompango.
21 Ihe oya uvu omitotolombo kutya owa kala to longo Aajuda ayehe mboka ye li mokati kiigwana, kaaya dhiginine Ompango yaMoses noku ya lombwela kaaya kenke oyana, nenge kaaya landule oonkuluhedhi dhawo.
22 Oshike nduno tu na okuninga po? Osha yela kutya otaya ka uva kutya owa thika.
23 Onkee ano ninga shoka tatu ku lombwele: Otu na aalumentu yane ya ninga egano.
24 Inda naalumentu mbaka e to iyogola pamwe nayo sha ikolelela kOmpango, noku ya futila, opo ya vule okukululitha omitse dhawo. Nena kehe gumwe ota ka tseya kutya shoka ya lombwelwa kombinga yoye omitotolombo, nosho wo kutya owu na eihumbato ewanawa, noho dhiginine wo Ompango.
25 Ihe kombinga yooitaali, mboka ya za miigwana yilwe, otwe ya tumine ontumwafo yi na etokolo, ndyoka twa ninga, tali ti kutya naya yande iinima, mbyoka ya yambelwa iikalunga, ombinzi, onyama yoshinamwenyo sha pondwa* nosho wo omilalo dha nyata.”*
26 Opo nduno esiku lya landula ko, Paulus okwa kutha aalumentu mboka nokwiiyogola pamwe nayo sha ikolelela kOmpango, nokwa yi motempeli, a ka popye kutya esiku lyeyogolo otali pu uunake, neyambo li yambwe pehala lyakehe gumwe gwomuyo.
27 Sho omasiku gaheyali ga li ge li pokupwa ko, Aajuda, mboka ya za kuAsia, sho ya mono Paulus motempeli, oya hwahwameke ongundu yaantu, noye mu kwata po,
28 taya igidha taya ti: “Aalumentu ne, Aaisraeli, tu kwatheleni!” Omulumentu nguka oye ha longo aantu kehe pamwe ya tse ondumbo noshigwana shetu nOmpango yetu nosho wo nehala ndika. Shimwe ishewe, okwa eta nokuli Aagreka motempeli, nokwa nyateka ehala ndika eyapuki.”
29 Oya popi ngawo, oshoka oya monene Trofimus gwokuEfeso e li naPaulus moshilando, noya li taya dhiladhila kutya Paulus okwa ya naye motempeli.
30 Moshilando ashihe omwa li mu na epiyagano, naantu oye ya taya matuka, noya kwata Paulus e taye mu kookololele kondje yotempeli, e taya edhile omiyelo nziya.
31 Manga ya li taya kambadhala oku mu dhipaga, omuwiliki gwetangakwiita okwa uvu kutya muJerusalem ashihe omu na epiyagano;
32 nokwa kutha nziya aakwiita naakuluntu yetangakwiita, noya matukile ko. Sho aantu ya mono omuwiliki gwetangakwiita nosho wo aakwiita, oya etha okudhenga Paulus.
33 Opo nduno omuwiliki gwetangakwiita okwe ya popepi naPaulus, nokwe mu kwatitha po e ta gandja elombwelo, a mangwe nomalyenge gaali; okuza mpoka, okwe mu pula kutya oye lye, nokwa ninga shike.
34 Ihe ongundu yaantu oya tameke okwiigidha iinima ya yoolokathana. Ihe molwaashoka oya li tayi kudhile, ina vula naanaa okuuva kutya oshike sha ningwa po, onkee ano okwa gandja elombwelo, Paulus a falwe komuhandjo gwaakwiita.
35 Sho a li ta ende pootalapa a uka pombanda, aakwiita oye mu humbata po, molwaashoka ongundu yaantu oya li tayi kondjitha, yi mu dhenge,
36 noya kala ye ya landula tayi igidha tayi ti: “Mu dhipageni!”
37 Sho Paulus e li pokufalwa momuhandjo gwaakwiita, okwa lombwele omuwiliki gwetangakwiita ta ti: “Otandi vulu ngaa okupopya nangoye?” Omuwiliki gwetangakwiita okwe mu pula ta ti: “Tashi ti oho popi Oshigreka?
38 Ano hangoye Omuegipiti, ngoka a hwahwamekele mombuga aalumentu 4 000, mboka ya li ya homata oomwele ya tse ondumbo nepangelo?”
39 Opo nduno Paulus okwa ti: “Ngame Omujuda gwokuTarsus shomuKilikia, omukwashigwana gwomoshilando, shoka sha tseyika nawa. Onkee ano otandi ku indile wu pitike ndje, ndi popye naantu.”
40 Konima sho Paulus a pewa epitikilo, okwa thikama pootalapa, e ta udhikile aantu noshikaha she, opo ya mwene. Sho ya mwena, okwa popi nayo mOshihebeli ta ti:
Omanyolo gopevi
^ Nenge “omuuvithi gwevaangeli.”
^ Eln., “aakadhoneelela.”
^ Nenge “mbandapaleke omwenyo gwandje.”
^ Eln., “otwa mwena.”
^ Nenge “oshinamwenyo shoka sha dhipagwa inaashi za ombinzi.”
^ MOshigreka “porneia.” Tala Omafatululo giitya.
