Iilonga yaayapostoli 24:1-27
24 Konima yomasiku gatano, omuyambi omunene Ananias okwe ya pamwe naakuluntu yoshigwana yamwe nosho wo nomunongompango* gwedhina Tertullus, noya lombwele ngoloneya shoka taya tamanekele Paulus.
2 Sho Tertullus a pewa ompito, a popye, okwa tameke okutamaneka Paulus koshipala shangoloneya, ta ti:
“Feliks, otatu ku pandula, sho tu na ombili, naasho oshigwana tashi shi enditha nawa, molwaashoka oho lele nawa.
3 Ohatu ku pandula aluhe noonkondo, Omusimanekwa Feliks, omolwiinima ayihe wo, mbyoka ho longo kehe pamwe.
4 Ihe opo kaandi mane po ethimbo lyoye, otandi ku indile wu pulakene kutse paufupi neidhidhimiko.
5 Otwa mona kutya omulumentu nguka okwa nika oshiponga,* molwaashoka ota hwahwameke Aajuda ayehe ya tse ondumbo nepangelo, noye omuwiliki gwoshimpaga shAanasareti.
6 Okwa li wo ta kambadhala okunyateka otempeli, onkee ano otwe mu kwata po.
7 ——
8 Ngele owe mu pulapula ngoye mwene, oto ka mona kutya iinima ayihe, mbyoka tatu mu tamanekele, oyoshili.”
9 Opo ihe nAajuda wo oya tameke okuyambidhidha oohapu ndhoka, taya koleke kutya iinima mbyoka oyoshili.
10 Sho ngoloneya a udhikile Paulus nomutse a popye, Paulus okwa ti:
“Ondi shi shi nawa kutya owa kala omupanguli gwoshigwana shika uule womimvo odhindji, onkee ondi na omukumo okwiipopila.
11 Oto vulu okushilipaleka kutya shoka tandi popi oshoshili. Opwa pita owala omasiku 12, okuza sho nda yile kuJerusalem, ndi ka longele* Kalunga;
12 Ihe inaya adha ndje nando tandi ludhikathana nomuntu motempeli, nenge tandi hwahwameke aantu, ya tse ondumbo nepangelo, kutya nduno omoosinagoga, nenge omoshilando ashihe;
13 noitaya vulu okukoleka iinima, mbyoka taya tamanekele ndje ngashingeyi.
14 Ihe ngame otandi zimine oshinima shika kutya ohandi longele Kalunga kootatekulululwa momukalo, ngoka taya ti oshimpaga, nonda itaala iinima ayihe, mbyoka ya popiwa mOmpango nokaahunganeki.
15 Ondi na etegameno, ndyoka wo nayo ye na, kutya Kalunga ota ka yumudha aayuuki nosho wo mboka kaaye shi aayuuki.
16 Omolwoshinima shika, ohandi kambadhala aluhe okukala neiyuvo lya yela koshipala shaKalunga noshaantu.
17 Konima yomimvo dhontumba, onda li nda fala iikwatha kuJerusalem noku ka yamba omayambo.
18 Manga nda li tandi ungaunga niinima mbyoka, oya adha ndje motempeli nda yogolwa nale metsokumwe nOmpango, nokanda li nongundu yaantu, nokapwa li epiyagano lyasha. Ihe opwa li Aajuda yamwe, mboka ya za koshitopolwalongo shaAsia,
19 mboka andola ya li ye na okuya kungoye, opo ya tamaneke ndje, ando oya monene ndje epuko.
20 Nenge pitika aalumentu, mbaka ye li mpaka, ya popye kutya oya mona ndje ondjo yashike, sho nda li komeho yOmpangu yoPombanda yAajuda,
21 kakele owala sho nda igidhile nda thikama mokati kawo kutya ‘nena, otandi pangulwa komeho goye, molwaashoka nda itaala meyumuko lyaasi.’”
22 Ihe molwaashoka Feliks okwa li e shi oshindji kombinga yOndjila yOmuwa, okwe ya laleke ta ti: “Uuna Lisias, omuwiliki gwetangakwiita, e ya, opo owala tandi ka ungaunga noshinima sheni.”
23 Okuza mpono, okwa gandja elombwelo komukuluntu gwetangakwiita kutya Paulus na mangwe po, ihe na pewe emanguluko lyontumba nosho wo ookuume ke ya pitikwe, ye mu kwathele naashoka a pumbwa.
24 Konima yomasiku gontumba, Feliks okwe ya pamwe nomukulukadhi gwe, Drusila, ngoka a li Omujuda, e ta ithana Paulus, opo ya pulakene sho ta popi kombinga yeitaalo lye muKristus Jesus.
25 Ihe sho Paulus a popi kombinga yuuyuuki, eipangelo nosho wo epangulo, ndyoka tali ke ya, Feliks okwa tila e ta ti: “Shuna manga, otandi ke ku ithana ishewe, uuna nda mono ompito.”
26 Feliks okwa li wo a tegelela Paulus e mu pe ombumbo. Onkee ano okwa kala he mu ithana lwiikando nokukundathana naye.
27 Sho pwa piti omimvo mbali, Feliks okwa pingenwa po kuPorkius Festus; ihe molwaashoka Feliks okwa li a hala okukala a hokiwa kAajuda, okwa thigi Paulus mondholongo.
Omanyolo gopevi
^ Nenge “hahende.”
^ Nenge “omupiyaganeki.” Eln., “okwa fa uuvu wolutapo.”
^ Nenge “galikane.”
