Iilonga yaayapostoli 26:1-32
26 Agrippa okwa ti kuPaulus: “Owa pewa ompito, wu ipopile ngoye mwene.” Opo nduno Paulus okwa ganeke oshikaha she, nokwa tameke okwiipopila ta ti:
2 “Omukwaniilwa Agrippa, shi na ko nasha niinima ayihe, mbyoka tandi tamanekelwa kAajuda, onda nyanyukwa sho tandi ipopile koshipala shoye nena ndjika,
3 unene tuu molwaashoka owu shi nawa omikalondjigilile adhihe nosho wo iinima ayihe, mbyoka Aajuda haya tamanana kombinga yayo. Onkee ano otandi ku indile, wu pulakene kungame neidhidhimiko.
4 “Odhoshili kutya Aajuda oyendji oye shi ndje nawa okuza kuunona sigo omuugundjuka wandje, sho nda kala mokati koshigwana shetu, naasho nda li muJerusalem,
5 onkee ano oye shi ndje okuza nale, notaya vulu oku shi koleka kutya ngame onda li Omufarisayi nosho wo kutya Aafarisayi ohaya dhiginine Ompango unene ye vulithe Aajuda yalwe.
6 Ihe ngashingeyi, otandi pangulwa omolwetegameno lyeuvaneko, ndyoka Kalunga a uvanekela ootatekulululwa;
7 euvaneko ndyoka olyo wo omazimo getu 12 ga tegelela oku ka mona tali gwanithwa, nomolwaashono hage mu longele nuudhiginini iilonga iiyapuki, omutenya nuusiku. Onkee ano, Omukwaniilwa, otandi tamanekwa kAajuda omolwetegameno ndika.
8 “Omolwashike ne tamu nyengwa okwiitaala kutya Kalunga ota vulu okuyumudha aasi?
9 Nangame wo onda li nda tompwa kutya ondi na okuninga ashihe shoka tandi vulu ndi kondjithe Jesus* Omunasareti.
10 Shoka osho naanaa nda li nda ningi muJerusalem, nonda tulitha oyendji yomaayapuki mondholongo, oshoka uuthemba mboka onde wu pewa kaayambi aakuluntu; naasho aayapuki ya li taya dhipagwa, onda li tandi shi popile.
11 Olundji, onda li handi ya hepeke moosinagoga adhihe, nonda li handi ya thiminike nelalakano, ya ethe po eitaalo lyawo. Shimwe ishewe, molwaashoka onda li nde ya geela noonkondo, onda li handi yi nokiilando yilwe, ndi ke ya hepeke.
12 “Pompito yimwe, manga ndi li mondjila nda uka kuDamaskus, nda tumwa kaayambi aakuluntu, noya pa ndje uuthemba ndi ka ninge ngawo,
13 mokati komutenya, omukwaniilwa, onda mono uuyelele tawu adhima wu vule wetango, wa zi megulu, wa kundukidha ndje nosho wo mboka ya li molweendo pamwe nangame.
14 Opo nduno sho atuhe twa ihata pevi, onda uvu ewi tali popi nangame mOshihebeli tali ti: ‘Saulus, Saulus, omolwashike to hepeke* ndje? Okukala to thanga oshishongitho* otashi ku etele owala oshiponga.*
15 Ihe onda ti: “Omusimanekwa, ongoye lye? Opo nduno Omusimanekwa okwa ti: ‘Ongame Jesus, ngoka to hepeke.*
16 Yambuka po e to kala othika. Onde ku ihololele, opo ndi ku hogolole wu li omupiya gwandje, nowu ninge ombangi yiinima, mbyoka wa mona, naambyoka tandi ke ku ulukila yi na ko nasha nangame.
17 Otandi ke ku hupitha wo miikaha yaantu mbaka nokiigwana, hoka tandi ke ku tumina kuyo,
18 wu tonatithe omeho gawo, wu ya galule momilema, ye ye muuyelele, noya ze mo mepangelo lyaSatana, ye ye kuKalunga, opo ya vule okudhiminwa po oondjo dhawo, noku ya pa ondjambi pamwe naamboka ya yapulwa omolweitaalo lyawo mungame.’
19 “Onkee ano, Omukwaniilwa Agrippa, ngame onda vulika owala kelombwelo, ndyoka nda pewa memoniko okuza megulu,
20 ihe tango onda uvithile mboka ye li muDamaskus, tandi ka uvithila mboka ye li muJerusalem nomiitopolwa ayihe yomuJudea nosho wo yomiigwana yilwe, opo ya itedhulule, noya longele Kalunga mokulonga iilonga, mbyoka tayi ulike kutya oya itedhulula.
21 Oshinima shika osho sha ningitha Aajuda ya kwate ndje po, sho nda li motempeli, noya kambadhala okudhipaga ndje.
22 Ihe molwaashoka onda mono nkene Kalunga ta kwathele ndje, onda tsikile sigo okunena okuuvithila aadhinwa naanenentu shoka aahunganeki nosho wo Moses a popya kutya otashi ka ningwa,
23 ano kutya Kristus okwa li ta ka hepekwa, noye a li ta ka yumudhwa tango kuusi, nokuuvithila aantu mbaka nosho wo iigwana kombinga yuuyelele.”
24 Sho Paulus a li ta popi oohapu ndhoka, opo a ipopile, Festus okwa igidha ta ti: “Paulus, oto yi oonkwengu! Ontseyo yoye oyindji otayi ku yitha oonkwengu!”
25 Ihe Paulus okwa ti: “Itandi yi oonkwengu, Omusimanekwa Festus, ihe otandi popi oohapu dhoshili, nodhi li pandunge.
26 Odhoshili kutya omukwaniilwa, nguka tandi hokololele iinima mbika nda manguluka, oku yi shi nawa; onda tompwa kutya kapu na sha shomiinima mbika kee shi, oshoka kapu na nando oshimwe shomuyo sha ningwa meholamo.
27 Mbela ngoye, Omukwaniilwa Agrippa, owa itaala ngaa maahunganeki? Ondi shi shi kutya owa itaala muyo.”
28 Ihe Agrippa okwa ti kuPaulus: “Ngoye oto vulu nani okwiitaalitha ndje, ndi ninge Omukriste muule wethimbo efupi.”
29 Opo ihe Paulus okwa ti: “Otandi galikana kuKalunga wu ninge Omukriste ngaashi ngame kutya nduno omuule wethimbo efupi, nenge ele, hangoye awike, ihe naayehe wo mboka ya pulakena kungame nena ndjika, ihe inandi hala mu tulwe mondholongo ngaashi ngame.”
30 Opo nduno omukwaniilwa, ngoloneya, Bernike nosho wo aalumentu mboka ya kuutumba pamwe nayo, oya thikama.
31 Ihe sho ya li taya yi, oya tameke okulombwelathana taya ti: “Omulumentu nguka ina ninga sha sha gwana oku mu dhipagitha, nenge oku mu tulitha mondholongo.”
32 Nena Agrippa okwa lombwele Festus ta ti: “Andola omulumentu nguka ota mangululwa, ando okwa li inaa pula a ka pangulwe kOmukesari.”
Omanyolo gopevi
^ Eln., “edhina lyaJesus.”
^ Nenge “tidhagana.”
^ Oshishongitho oshiti sha honga, shoka sha li hashi longithwa okushonga oshimuna.
^ Eln., “otashi shi ningitha owala oshidhigu kungoye.”
^ Nenge “tidhagana.”
