Iilonga yaayapostoli 27:1-44
27 Sho etokolo lya ningwa kutya otatu yi nosikepa kuItalia, oya gandja Paulus nosho wo aanandholongo yalwe miikaha yaJulius, omukuluntu gwongundu yetangakwiita, hali ithanwa Augustus.
2 Opo nduno otwa londo osikepa, ya zi kuAdramiti, ndjoka ya uka komatulilosikepa gokomunkulofuta gwokoshitopolwalongo shaAsia, e tatu yi nayo; Aristarkus, Omumakedonia, a za kuTessalonika, okwa li pamwe natse.
3 Esiku lya landula ko, otwa thiki muSidon, na Julius okwa ungaunga naPaulus nawa* e te mu pitike, a ye kookuume ke, opo ye mu kwathele naashoka a pumbwa.
4 Sho twa zi muSidon, otwa tsikile nolweendo lwetu, ihe molwaashoka ombepo oya li ye tu taalela, otwa gama kombinga yontuntu yaKipro, opo tu henuke ombepo ndjoka.
5 Okuza mpono, otwa taakana efuta, ndyoka li li komunkulofuta gwaKilikia naPamfilia, e tatu tula petulilosikepa lyaMira shomuLikia.
6 Mpoka, omukuluntu gwetangakwiita okwa adha po osikepa, ya za kuAleksandria, ya uka kuItalia, nokwe tu lombwele tu londe muyo.
7 Okuza mpoka, otwa ende kashona nakashona uule womasiku gontumba, sigo twa thiki muKnidos. Ihe molwaashoka ombepo oya li tayi pepe unene, inatu vula okuya komeho, notwa kunkula naKreta muSalmoni, tu ishige kuyo.
8 Opo ihe sho twa kala tatu ende tatu kunkula nuudhigu komunkulofuta, otwe ya pehala limwe, hali ithanwa Omatulilosikepa Omawanawa, ndyoka lya li popepi noshilando shaLasea.
9 Sho pwa piti omasiku gontumba, onkalo yombepo oya li ya nayipala, nethimbo lyokwiidhilika iikulya mesiku lyekwatakanitho olya li lya pita nale. Onkee ano Paulus okwe ya londodha
10 ta ti: “Aalumentu ne, kandi wete shi li pandunge tu yeni manga, molwaashoka ngele otwa yeni, osikepa ndjika otayi ka ningina, noitatu ka kanitha owala oofulaha, ihe noomwenyo dhetu wo.”
11 Ihe omukuluntu gwetangakwiita okwa pulakene komuhingisikepa nosho wo kumwene gwayo, pehala lyokupulakena kwaashoka Paulus a ti.
12 Ihe molwaashoka petulilosikepa ndyoka kapwa li puuwanawa okukala pethimbo lyokufu, oyendji yomwaamboka ya li mosikepa oya tsu kumwe, ya ze po mpoka, ya tale ngele otaya vulu okuthika kuFoiniks, ano ketulilosikepa lyomuKreta, ndyoka lya taalela kuumbangalantuzilo nokumbugantuzilo, oko ya ka kale, sigo okufu kwa piti.
13 Sho ombepo ndjoka ya li tayi pepe okuza kuumbugantu ya kodha kashona, oya dhiladhila kutya otaya ka thika kuFoiniks, noya hili mo ohangela e taya tameke okuthayila, taya kunkula nomunkulofuta gwaKreta.
14 Ihe konima yokathimbo okafupi, opwa tukuluka ombepo ondhigu hayi ithanwa Euroaquilo.*
15 Molwaashoka ombepo oya li ondhigu noonkondo, otwa nyengwa okuukililitha osikepa, yi taalele ombepo, notwa etha, yi falwafalwe kombepo.
16 Nena otwa yi konima yokantuntu okashona, haka ithanwa Kauda, tu ishige kombepo, notwa nanene okawato* nuudhigu kosindo yosikepa.
17 Ihe konima sho twa nanene okawato meni lyosikepa, oya kambadhala okukoleka osikepa moku yi manga noongodhi dha enda kohi. Molwaashoka oya li ya tila ya idhenge kiituntu yaSirti,* yi li kohi yomeya, oya mangulula oongodhi, noya kulukitha othayila, osikepa e tayi falwafalwa kombepo.
18 Molwaashoka oshikungulu osha li tashi tu tengatengitha noonkondo, esiku lya landula ko, oya tameke okuumbila iinima yimwe mefuta, opo oshiviha shosikepa shi ye pevi.
19 Opo nduno mesiku etitatu, oya umbile iilongitho yosikepa mefuta niikaha yawo yene.
20 Sho pwa piti omasiku ogendji inaatu mona etango, nenge oonyothi, sho oshikungulu oshidhigu osha li owala tashi tsikile, otwa kanitha etegameno ngele otatu ka hupa ngaa.
21 Konima sho ya kala ethimbo ele inaaya lya sha, Paulus okwa thikama mokati kawo, nokwa ti: “Aalumentu ne, andola omwa pulakenene kwaashoka nda li tandi mu lombwele, kaatu ze mo muKreta, ando inatu iyadha muupyakadhi mbuka nokukanitha iinima yetu.
22 Ihe ngashingeyi, otandi mu ladhipike mú kale mú na omukumo, oshoka kapu na nando ogumwe gwomune* ta ka sa, ihe osikepa oyo owala tayi ka teka po.
23 Uusiku mbuka wonena, omuyengeli gwaKalunga kandje, ngoka handi longele iilonga iiyapuki, okwa thikama pungame,
24 nokwa ti: ‘Paulus, ino tila. Oto ka thikama komeho gOmukesari, ihe tala, omolwoye, Kalunga ota ka hupitha ayehe, mboka ye li pamwe nangoye mosikepa.’
25 Onkee ano, aalumentu ne, kaleni mú na omukumo, oshoka onda itaala kutya Kalunga ota ka ninga naanaa ngaashi nda lombwelwa.
26 Ihe nonando ongawo, otatu ka iyadha metekosikepa popepi nontuntu yontumba.”
27 Uusiku wesiku 14, sho twa kala tatu tengatengithwa kombepo mefuta lyaAdria, mokati kuusiku, aathayili oya li taya dhiladhila kutya oye li pokuthika popepi nomutunda gwontumba.
28 Sho ya mete kutya efuta olya ya muule shi thike peni, oya mono kutya olya ya muule oometa 36 lwaampono, onkee ano oya humu ko kashona e taye li mete ishewe, noya mono kutya olya ya muule oometa 27 lwaampono.
29 Niishewe, molwaashoka otwa li twa tila kutya otashi vulika tu idhenge momamanya, oya umbile mefuta oohangela ne dhokosindo yosikepa, noya tameke okukala ya halelela ku she.
30 Ihe sho aathayili ya li taya kambadhala okwiiyaka mo mosikepa, noya li taya kulukithile okawato mefuta, taya iningitha ya fa taya umbile oohangela dhokondete yosikepa mefuta,
31 Paulus okwa lombwele omukuluntu gwetangakwiita nosho wo aakwiita ta ti: “Aalumentu mbaka ngele oya kala mosikepa, opo owala tamu vulu okuhupithwa.”
32 Opo nduno aakwiita oya tete oongodhi, ndhoka dha li dha manga okawato, e taye ka etha ka gwile mefuta.
33 Sho eluwa li li pokutenda, Paulus okwa ladhipike ayehe ya lye sha, ta ti: “Nena esiku 14 okuza sho mwa kala mwa tegelela mwa lyalyakana ku tye hwepo, ihe sigo onena inamu lya sha.
34 Onkee ano otandi mú ladhipike mú lye sha, omolwuuwanawa weni yene, oshoka kapu na nando ogumwe gwomune ta ka sa.”*
35 Konima sho a popi oohapu ndhoka, okwa kutha oshikwiila, ta galikana kuKalunga komeho gawo ayehe, e te shi pambula, nokwa tameke okulya.
36 Onkee ano ayehe oya kala ye na omukumo, noya kutha iikulya, ya lye.
37 Atuhe kumwe mboka twa li mosikepa, otwa li 276.
38 Sho ya li e taya kuta, oya tameke okuumbila oofulaha dhiilya mefuta, opo oshiviha shosikepa shi ninge oshipu.
39 Sho kwa shi, kaya li ye shi kutya oye li peni, ihe oya mono oshimpoko shefuta shi na omunkulofuta, noya li ya tokola toko okukankameka osikepa yawo mpoka, ngele otashi vulika.
40 Onkee ano oohangela oye dhi tete ko e taye dhi etha dhi gwile mefuta, nopethimbo opo tuu mpoka, oya mangulula iidhugitho yokutanauna osikepa. Konima yaashono oya yelutha othayila, opo ombepo yi undulile osikepa komunkulofuta.
41 Sho ya idhenge pokati kiituntu, yi li kohi yomeya, ondete yosikepa oya tyuulile, nosindo yayo oya tameke okuteyagulwa po komakuthikuthi.
42 Opo ihe aakwiita oya tokola ya dhipage oonkwatwa, opo kaadhi yoge dhi fadhuke po.
43 Ihe molwaashoka omukuluntu gwetangakwiita okwa li a tokola toko okuthikitha Paulus e na omwenyo, okwe ya keelele kaaya ninge shoka taya dhiladhila. Opo nduno okwa lombwele mboka taya vulu okuyoga ya nukile mefuta, opo ya ka thike tango komutunda,
44 e taku landula yalwe, yamwe oya ikwatelela kiipilangi, omanga yamwe okiipambu yosikepa. Onkee ano ayehe oya thiki komutunda ye na omwenyo.
Omanyolo gopevi
^ Nenge “nohenda.”
^ Sha hala okutya, ombepo ndjoka hayi zi kuumbangalantuzilo.
^ Okawato hoka oka li haka longithwa okuhupitha aantu.
^ Tala Omafatululo giitya.
^ Nenge “kapu na omwenyo.”
^ Eln.,“efufu limwe lyokomitse dheni tali gu ko.”
