Iilonga yaayapostoli 3:1-26
3 Sho Petrus naJohannes ya li ya uka kotempeli pethimbo lyegalikano, potundi ontimugoyi,*
2 opwa li pu na omulumentu a valwa oshilema, a humbatwa ta falwa kotempeli. Esiku kehe, aantu oya li haye mu tula popepi nosheelo shotempeli, shoka sha li hashi ithanwa Osheelo sha Opala, opo a hehele iikwatha kwaamboka ya uka motempeli.
3 Sho a mono Petrus naJohannes ye li pokuya motempeli, okwa tameke oku ya hehela iikwatha.
4 Ihe Petrus naJohannes oye mu tala ye mu ukilila, noya ti: “Tala kutse!”
5 Onkee ano okwa kala e ya tala, a tegelela ye mu pe sha.
6 Ihe Petrus okwa ti: “Kandi na oshisiliveli noshingoli, ihe otandi ku pe owala shoka ndi na. Medhina lyaJesus Kristus Omunasareti, otandi ku lombwele, enda!”
7 Nena Petrus okwe mu kwata moshikaha shokolulyo e te mu thikameke. Nziya, oompadhi noompando dhe odha aluka;
8 naasho a thikama, okwa tameke okweenda, nokwa yi pamwe nayo motempeli, ta ende, ye ta nuka, nota hambelele Kalunga.
9 Aantu ayehe oye mu mono ta ende, nota hambelele Kalunga.
10 Opo nduno oya dhimbulula kutya omulumentu ngoka oye a li ha kala a kuutumba pOsheelo sha Opala shotempeli a tegelela okupewa iikwatha, noya li ya kuminwa noonkondo shoka she mu ningilwa.
11 Manga omulumentu ngoka natango a li a kwata Petrus naJohannes miikaha, aantu ayehe oya matukile kuyo mehala hali ithanwa Omukala gwaSalomo, noya li ya kumwa noonkondo.
12 Sho Petrus e ya mono, okwa ti kuyo: “Aaisraeli ne, omolwashike mwa kuminwa oshinima shika, nomolwashike mwe tu tala twa fa otse twa ningitha omulumentu nguka a ende koonkondo dhetu yene, nenge molwaashoka tu li aatilikalunga?
13 Kalunga kaAbraham, kaIsak, kaJakob naKalunga kootatekulululwa yetu, okwa tumbalekitha omupiya gwe, Jesus, ngoka mwe mu gandja miikaha yaantu, nomwe mu idhimbike koshipala shaPilatus, nokuli nonando Pilatus okwa li a hala oku mu mangulula.
14 Omwa idhimbike ngoka omuyapuki nomuyuuki, nomwa pula mú mangululilwe omulumentu, ngoka a li omudhipagi,
15 omanga mwa dhipagitha ngoka ta ka petha aantu omwenyo. Ihe Kalunga okwe mu yumudha kuusi, notu li oombangi dhasho.
16 Omulumentu, nguka mú wete nomu mu shi, okwa aludhwa okupitila medhina lyaJesus nomolweitaalo, ndyoka tu na medhina lye. Eitaalo ndyoka tu na muJesus, olyo lya ningitha omulumentu nguka a aluke thiluthilu montaneho yeni amuhe.
17 Ngashingeyi, aamwatate, ondi shi shi kutya omwe shi ningi omolwokwaatseya sha, ngaashi owala aapangeli yeni nayo ye shi ningi.
18 Ihe Kalunga okwa etha shika shi ningwe, opo a gwanithe po shoka a popya komeho yethimbo okupitila maahunganeki ayehe kutya Kristus ota ka hepekwa.
19 “Onkee ano itedhululeni, ne mú igaluluke, opo oondjo dheni dhi dhimwe po, ne mú kale tamu mono epepelelo okuza kuJehova ye mwene,*
20 noku mú tumine Kristus, ngoka a langekwa po omolweni, ano Jesus.
21 Jesus oku na okutegelela megulu, sigo oosho ethimbo lyokuninga iinima ayihe iipe lya thiki, mbyoka Kalunga a popi okupitila maahunganeki ye yonale aayapuki.
22 Nokuli Moses okwa tile: ‘Jehova Kalunga keni, ota ka langeka po gumwe gwomaamwaho, a ninge omuhunganeki ngaashi ngame. Pulakeneni kukehe shoka te mu lombwele.
23 Odhoshili kutya kehe ngoka* itaa pulakene komuhunganeki ngoka, ota yoololwa mo moshigwana shaKalunga e ta hanagulwa po thiluthilu.’
24 Aahunganeki ayehe, okuza kuSamuel naamboka ye ke mu landula, oya popya sha yela kombinga yomasiku ngaka.
25 Ne oluvalo lwaahunganeki nolwehangano, ndyoka Kalunga a ninga noohokulululwa, sho a lombwele Abraham a ti: ‘Okupitila moluvalo* lwoye, iigwana ayihe kombanda yevi otayi ka yambekwa.’
26 Konima sho Kalunga a yumudha Omupiya gwe, okwe mu tumu tango kune e mú yambeke, mokukwathela kehe gumwe gwomune a igaluluke kiilonga ye iiwinayi.”
Omanyolo gopevi
^ Sha hala okutya, lwopondatu yomutenya.
^ Eln., “koshipala shaJehova.”
^ Nenge “omwenyo.”
^ Eln., “mombuto yoye.”
