Iilonga yaayapostoli 4:1-37
4 Manga Petrus naJohannes taya popi naantu, aayambi, omukuluntu gwotempeli nAasadukayi oye ya kuyo.
2 Oya li ya geya, molwaashoka aayapostoli oya li taya longo aantu, notaya uvitha montaneho kutya Jesus okwa yumudhwa kuusi.
3 Onkee ano oye ya kwata po, noye ya edhilile mondholongo, sigo esiku lya landula ko, oshoka okwa li kwa toka.
4 Ihe oyendji yomwaamboka ya li ya pulakene kuyo oya itaale, nomwaalu gwaalumentu mboka ya itaale, ogwa adha pomayovi gatano lwaampono.
5 Esiku lya landula ko, aapangeli yAajuda, aakuluntu yoshigwana naalongimpango oya gongala pamwe muJerusalem,
6 pamwe naAnnas, omuyambi omukuluntu, Kajafas, Johannes, Aleksander nosho wo ayehe, mboka ya pamba omuyambi omukuluntu.
7 Oya thikameke Petrus naJohannes mokati kawo, noya tameke oku ya pula taya ti: “Okoonkondo dhalye, nenge omedhina lyalye mwa longo oshinima shika?”
8 Opo nduno Petrus okwa udhithwa ombepo ondjapuki, nokwa ti kuyo:
“Aapangeli ne yaantu naakuluntu yoshigwana,
9 ngele omwa hala okutseya kombinga yoshinima oshiwanawa, shoka twa ningile nena omulumentu nguka oshilema, nankene sha enda opo a aluke,
10 amuhe, shi tseyeni nosho wo Aaisraeli ayehe kutya omulumentu nguka a thikama komeho geni e li nawa, okwa aludhwa okupitila medhina lyaJesus Kristus Omunasareti, ngoka mwa alele komuti, ihe Kalunga okwe mu yumudha kuusi.
11 ‘Emanya ndika, olyo ndyoka ne aatungi mwa ungaunga nalyo nayi, nolyo lya ningi emanya lya simanenena kwaagehe.’*
12 Shimwe ishewe, otatu vulu owala okuhupithwa okupitila muye, oshoka kapu na edhina lilwe kohi yegulu lya hololelwa aantu, ndyoka tu na okuhupithwa okupitila mulyo.”
13 Opo ihe sho ya mono Petrus naJohannes taya popi nuulaadhi, naasho ya dhimbulula kutya inaya longwa,* oya li ya kumwa noonkondo, noya mono kutya oya li haya kala naJesus.
14 Sho ya li ya tala omulumentu, ngoka a aludhwa, a thikama pamwe naalongwa mboka yaali, kaya li ye shi kutya naya tye shike.
15 Onkee ano oye ya lombwele ya ze mo moshinyanga shOmpangu yoPombanda yAajuda, noya tameke okukundathana
16 taya ti: “Aalumentu mbaka, natu ya ninge ngiini? Molwaashoka odhoshili kutya oshikumithalonga shika oshindhindhilikwedhi ya longo, osha tseyika kaantu ayehe yomuJerusalem, noitatu vulu okutya kashi shi shoshili.
17 Onkee ano opo kaashi taandele mokati kaantu ayehe, natu ya ningileni omatilitho, noku ya lombwela kaaya popye we nando onomuntu medhina lyaJesus.”
18 Opo nduno oye ya ithana, noye ya lombwele kaaya popye we nando osha, nenge kaaya longe we aantu medhina lyaJesus.
19 Ihe Petrus naJohannes oye ya yamukula taya ti: “Tokoleni ne yene ngele osha uka koshipala shaKalunga okuvulika kune, pehala lyokuvulika kuKalunga.
20 Ihe tse itatu vulu okweetha po okupopya kombinga yiinima, mbyoka twa mona, notwa uva.”
21 Onkee ano konima sho ya kala taye ya ningile omatilitho, oye ya etha, oshoka kaya li ya mono nando etompelo lyasha lyoku ya geela, noya li ya tila aantu, molwaashoka ayehe oya li taya hambelele Kalunga, omolwoshinima shoka sha ningwa po.
22 Omulumentu, ngoka a aludhwa pashikumithalonga, okwa li e na omimvo 40 nasha.
23 Konima sho ya ethiwa, oya yi kooitaali ooyakwawo, noye ya hokololele shoka aayambi aakuluntu naakuluntu yoshigwana ye ya lombwele.
24 Sho ye shi uvu, oya galikana Kalunga pamwe newi lyopombanda taya ti:
“Omuwa Omunamapangelo agehe, ongoye wa shiti egulu, evi, efuta niinima ayihe, mbyoka yi li mo,
25 nongoye wa popi okupitila mutatekulululwa David, omupiya gwoye, to longitha ombepo ondjapuki wa ti: ‘Omolwashike iigwana ya geya, naantu taya dhiladhila* iinima yowala?
26 Aakwaniilwa yokombanda yevi oya ilongekidha, noya gongala pamwe naapangeli ya kondjithe Jehova nosho wo omugwayekwa gwe.*
27 Herodes naPontius Pilatus, pamwe naantu yomiigwana nosho wo Aaisraeli oya gongala pamwe moshilando, ya pataneke omupiya gwoye omuyapuki, Jesus, ngoka we mu gwayeke,*
28 opo ya gwanithe po shoka wa li wa hunganeka.
29 Ngashingeyi, Jehova, pulakena komatilitho gawo, ngoye wu tsikile okukwathela aapiya yoye, ya tsikile okupopya oohapu dhoye nuulaadhi lela,
30 omanga to ganeke oshikaha shoye wu aludhe aavu, nomanga to longo iilongankondo niikumithalonga okupitila medhina lyomupiya gwoye omuyapuki, Jesus.”
31 Konima sho ya galikana ya mana mo, ehala mpoka ya li ya gongala, olya kakama, naayehe oya udhithwa ombepo ondjapuki, noya tameke okupopya oohapu dhaKalunga nuulaadhi.
32 Natango, ongundu yaantu, ndjoka ya itaala, oya li ya hangana thiluthilu, nokapu na nando ogumwe gwomuyo a popi kutya shoka e na oshe mwene, ihe oya li haya topolelathana kehe shimwe.
33 Aayapostoli oya tsikile okugandja uumbangi nehwamo kombinga yeyumuko lyOmuwa Jesus, na Kalunga okwa li e ya ulukile ohenda ye onene.
34 Nokuli kapu na nando ogumwe mokati kawo a li e na ompumbwe yasha, oshoka ayehe mboka ya li ye na omapya, nenge omagumbo, oye ga landitha po, niimaliwa, mbyoka ya mona mo,
35 oye yi fala kaayapostoli. Opo ihe oye yi topolele kehe gumwe sha ikolelela kompumbwe ye.
36 Josef, ngoka wo a li ha ithanwa Barnabas kaayapostoli (ndyoka tali ti: “Omuna gwehekeleko”), Omulevi, omvalele yaKipro,
37 naye okwa li e na epya e te li landitha po, niimaliwa okwe yi pe aayapostoli.
Omanyolo gopevi
^ Eln., “emanya ndyoka hali tungilwa mohuke, opo ekuma li kale lya kola.”
^ Sha hala okutya, inaya longwa koosikola dhoorabi, ihe itashi ti kutya kaye shi okulesha nenge okunyola.
^ Nenge “taya tedhatedha.”
^ Nenge “Kristus gwe.”
^ Nenge “hogolola.”
