Iilonga yaayapostoli 5:1-42
5 Omulumentu gumwe gwedhina Ananias nomukulukadhi gwe, Safira, oya landitha po epya lyawo.
2 Ihe Ananias okwa holeke po iimaliwa yimwe, nomukulukadhi gwe okwa li e shi shi, naambyoka ya hupu po okwe yi fala kaayapostoli.
3 Ihe Petrus okwa ti kuye: “Ananias, omolwashike wa etha Satana e ku ningithe wu fundje kombepo ondjapuki, sho wa holeke po iimaliwa yimwe yepya?
4 Manga epya ndyoka inoo li landitha po, kalya li lyoye? Nokonima sho we li landitha po, iimaliwa kaya li yoye? Omolwashike wa dhiladhila momutima gwoye okulonga oshinima sha tya ngawo? Ino fundja aantu, ihe owa fundju Kalunga.”
5 Sho Ananias a uvu oohapu ndhoka, okwa ongotele, nokwa si; naayehe, mboka ye shi uvu, oya kwatwa kuumbanda.
6 Opo nduno aalumentu aagundjuka oya thikama, taye mu dhingile momalapi e taye mu kutha po, noye ke mu fumvika.
7 Konima yoowili ndatu lwaampono, omukulukadhi gwe okwe ya mo, noka li e shi shoka sha ningwa po.
8 Petrus okwa ti kuye: “Lombwela ndje, epya lyeni omwe li landitha po kiimaliwa mbino?” Okwa ti: “Eeno, oyo mbyoka.”
9 Onkee ano Petrus okwa ti kuye: “Omolwashike ne yaali mwa tsu kumwe mú makele ombepo yaJehova? Tala, aalumentu, mboka ya ka fumvikile omusamane gwoye, oye li pokuthika pomweelo, notaye ku ile, ye ku fale ko wo.”
10 Ohaluka, okwa ongotele poompadhi dhaPetrus, nokwa si. Sho aalumentu aagundjuka ye ya mo, oye mu adha a sa e taye mu kutha po, noye ke mu fumvika a tegama nomusamane gwe.
11 Onkee ano egongalo alihe olya kwatwa kuumbanda nosho wo ayehe mboka ye shi uvu.
12 Natango, aayapostoli oya tsikile okulonga iilongankondo oyindji niikumithalonga mokati kaantu, naayapostoli ayehe oya tsakanene mOmukala gwaSalomo.
13 Odhoshili kutya kapu na nando oyalwe ya li ye na omukumo gwokukala nayo, oshoka aantu oya li taye ya tanga unene.
14 Kakele kaashono, omwaalu ogundji gwaalumentu naakiintu, mboka ya li ya itaala mOmuwa, ogwa ende tagu indjipala.
15 Aantu oya li ya eta nokuli aavu momapandaanda, noye ya langeke kuumbete nokiiyala, opo sho Petrus ta ende po, omuzizimba gwe gu adhe yamwe yomuyo.
16 Natango, oongundu dhaantu, dha za miilando, mbyoka ya dhingilila Jerusalem, odha kala tadhi eta aavu nosho wo mboka taya hepekwa koombepo dha nyata, naayehe oya li ya aludhwa.
17 Ihe omuyambi omunene okwa thikama pamwe naayehe, mboka ya li pamwe naye, mboka ya li yomoshimpaga shAasadukayi, noya li ye ya sila efupa.
18 Opo nduno oya kwata po aayapostoli, noye ya tula mondholongo yaayehe.
19 Ihe uusiku, omuyengeli gwaJehova okwa egulula omiyelo dhondholongo e te ya piitha mo, nokwa ti:
20 “Indeni kotempeli e tamu tsikile okulombwela aantu iinima ayihe kombinga yomwenyo gwaaluhe.”
21 Konima sho ya uvu oohapu ndhoka, oya yi motempeli, sho eluwa tali tende, noya tameke okulonga aantu.
Opo nduno sho omuyambi omunene naamboka ya li pamwe naye ya thiki, oya ithana iilyo ayihe yOmpangu yoPombanda yAajuda, yi gongale nosho wo aakuluntu ayehe yoshigwana shaIsraeli,* noya tumu aalangeli yotempeli, ya ka tale aayapostoli, ye ye kuyo.
22 Ihe sho aalangeli yotempeli ya thiki ko, inaye ya adha mo mondholongo. Onkee ano oya galuka, noye ya lombwele
23 taya ti: “Otwa adha ondholongo ya pata noya langelwa, naalangeli ya thikama pomiyelo, ihe sho twa patulula po, meni kamwa li mu na nando ogumwe.”
24 Sho omukuluntu gwotempeli naayambi aakuluntu ya uvu oohapu ndhoka, oya li taya ipula noonkondo kutya oshike ishewe tashi ka ningwa po.
25 Ihe gumwe okwe ya po e te ya lombwele ta ti: “Taleni, aalumentu, mboka mwa li mwa tula mondholongo, oye li motempeli ya thikama taya longo aantu.”
26 Opo ihe omukuluntu gwotempeli pamwe naalangeli yotempeli oya yi, ye ke ya tale mo, ihe inaye ya kutha mo koonkondo, molwaashoka oya li ya tila aantu ye ya dhipage nomamanya.
27 Onkee ano sho ye ya eta, oye ya thikameke komeho gOmpangu yoPombanda yAajuda. Nena omuyambi omunene okwe ya pulapula,
28 nokwa ti: “Otwe mú indike, kaamu tsikile okulonga aantu medhina lyomulumentu nguka, ihe taleni, omwa udhitha Jerusalem nelongo lyeni, nomwa hala ondjo yombinzi yomulumentu nguka yi kale yetu.”
29 Opo ihe Petrus naayapostoli ooyakwawo oya ti: “Tse otu na okuvulika kuKalunga e li omupangeli, ihe hakaantu.
30 Kalunga kootatekulululwa okwa yumudha Jesus, ngoka mwe mu dhipaga, sho mwe mu endjeleleke komuti.
31 Kalunga okwa tumbalekitha ngoka ta ka petha aantu omwenyo nOmuhupithi moku mu tula kolulyo lwe, opo Aaisraeli ya itedhulule noya dhiminwe po oondjo.
32 Tse otu li oombangi dhiinima mbika pamwe nombepo ondjapuki, ndjoka Kalunga a gandja kwaamboka haya vulika kuye e li omupangeli.”
33 Sho ya uvu oohapu ndhoka, oya li ya geya noonkondo, noya li ya hala oku ya dhipaga.
34 Ihe Omufarisayi gwedhina Gamaliel, ngoka a li omulongi gwOmpango a simanekwa kaantu ayehe, okwa thikama mOmpangu yoPombanda yAajuda, nokwa gandja elombwelo aayapostoli ya ze mo manga uule wokathimbo.
35 Nena okwa ti kuyo: “Aalumentu ne Aaisraeli, kotokeleni oshinima shoka mwa hala okuningila aalumentu mbaka.
36 Pashiholelwa, omathimbo opo ga zi ko, Teudas okwa li e ya ta ti kutya ye okwa simana, naalumentu yontumba ye thike pomathele gane lwaampono oye mu wayimine. Ihe okwa dhipagwa, naayehe mboka ye mu landula, oya halakanithwa po.
37 Konima ye, pethimbo lyomayalulo gaantu, Judas Omugalilea okwa holoka e ta nwetha mo aantu ye mu landule. Omulumentu ngoka naye okwa dhipagwa, naayehe mboka ya li ye mu landula oya halakanithwa po.
38 Omolwoshinima shika, otandi mú lombwele, aalumentu mbaka inamu ya ningila nando uuwinayi washa, ihe ya etheni. Oshoka ngele ompangela, nenge oshilonga shika osha za komuntu, otashi hulu po.
39 Ihe ngele osha za kuKalunga, itamu vulu oku ya sinda nando. Ngele inamu kotoka, otamu ka iyadha nokuli tamu kondjitha Kalunga mwene.”
40 Opo ihe oya taamba ko omayele ge, noya ithana aayapostoli e taye ya dhengitha, noye ya lombwele, ya ethe po okupopya medhina lyaJesus e taye ya etha ya ye.
41 Onkee ano oya zi mo mOmpangu yoPombanda yAajuda, ya nyanyukwa, oshoka oya li ya talika ko ya gwana okuhepekelwa edhina lyaJesus.
42 Esiku kehe, oya tsikile okulonga aantu nokuuvitha onkundana ombwanawa kombinga yaKristus Jesus motempeli nosho wo egumbo negumbo nopwaa na oku shi etha po.
Omanyolo gopevi
^ Nenge “yoyana yaIsraeli.”
