Iilonga yaayapostoli 9:1-43
9 Ihe Saulus okwa li natango ta ningile aalongwa yOmuwa omatilitho, nokwa li a tokola toko oku ya dhipaga, onkee okwa yi komuyambi omunene,
2 nokwe mu indile, koosinagoga dhomuDamaskus ku nyolelwe oontumwafo, opo aalumentu naakiintu ayehe mboka ta adha ko ye li mOndjila yOmuwa,* ya mangwe po, noya falwe kuJerusalem.
3 Opo ihe manga e li mondjila, noku li pokuthika muDamaskus, ohaluka, okwa adhiminwa kuuyelele we mu dhingoloka, wa zi megulu,
4 e ta ihata pevi, nokwa uvu ewi tali ti: “Saulus, Saulus, omolwashike to hepeke* ndje?”
5 Opo nduno Saulus okwa pula ta ti: “Omusimanekwa, ongoye lye?” Okwa ti: “Ongame Jesus, ngoka to hepeke.*
6 Thikama, e to yi moshilando, naamoka omo to ka lombwelwa shoka wu na okuninga.”
7 Aalumentu, mboka ya li taya ende pamwe naSaulus, oya li ya thikama ya kumwa, sho ye uvite owala ewi, ihe kaye wete omuntu.
8 Opo nduno Saulus okwa thikama, ihe nonando omeho ge oga li ga tonata, ka li e wete ko. Onkee ano oye mu kwata moshikaha noye mu fala muDamaskus.
9 Okwa kala uule womasiku kee wete ko, noina lya sha nenge a nwe sha.
10 MuDamaskus omwa li mu na omulongwa gwedhina Ananias, nOmuwa okwe mu ithana okupitila memoniko ta ti: “Ananias!” Ananias okwa ti: “Omuwa, ongame nguka!”
11 Omuwa okwa ti kuye: “Thikama e to yi kepandaanda, hali ithanwa Ukilila, e to ka konga omulumentu gwedhina Saulus gwokuTarsus, megumbo lyaJudas. Oshoka tala, ota galikana,
12 nokwa mono memoniko omulumentu gwedhina Ananias te ya kuye e te mu tenteke iikaha ye, opo a tsikuluke.”
13 Ihe Ananias okwa yamukula ta ti: “Omuwa, omulumentu ngoka onde mu uva koyendji kombinga yankene a kala ta hepeke aayapuki yoye muJerusalem.
14 Omulumentu ngoka okwa pewa epitikilo kaayambi aakuluntu, e ye a kwate po ayehe, mboka ya itaala* medhina lyoye.
15 Omuwa okwa ti kuye: “Inda, molwaashoka omulumentu ngoka onde mu hogolola a tseyithile iigwana, aakwaniilwa noyana yaIsraeli edhina lyandje.
16 Oshoka otandi ke mu ulukila sha yela omaudhigu agehe, ngono e na okupita mugo, omolwedhina lyandje.”
17 Onkee ano Ananias okwa thikama e ta yi kegumbo lyaJudas, nokwa tenteke Saulus iikaha ye, nokwa ti kuye: “Omumwatate Saulus, Omuwa Jesus, ngoka e ku ihololele, sho wa li mondjila to ya huka, okwa tumu ndje kungoye, opo wu tsikuluke, nowu tililwe ombepo ondjapuki.”
18 Opo nduno nziya, momeho ge omwa zi iinima ya fa iipeta, nokwa tsikuluka. Opo ihe okwa thikama e ta ninginithwa,
19 nokwa li iikulya e ta mono oonkondo.
Okwa kala uule womasiku gontumba naalongwa muDamaskus,
20 nokwa tameke nziya okuuvitha moosinagoga kombinga yaJesus kutya oye Omuna gwaKalunga.
21 Ihe ayehe, mboka ye mu uvu, oya kumwa, noya li taya ti: “Ano omulumentu nguno haye a li ha hepeke aalanduli yaJesus* muJerusalem? Huka nani ine ya ko nelalakano lyoku ya kwata po noku ya fala kaayambi aakuluntu?”
22 Mokweendela ko kwethimbo, Saulus okwa kala e na uulaadhi nowino oyindji yokuuvitha. Okwa tompo thiluthilu Aajuda, mboka ya li muDamaskus, kutya Jesus oye Kristus.
23 Sho pwa piti omasiku ogendji, Aajuda oya pangele ompangela ye mu dhipage.
24 Ihe Saulus okwa uvu kombinga yompangela yawo. Oya kala wo ya langela omiyelo dhoshilando omutenya nuusiku, opo ye mu dhipage.
25 Onkee ano aalongwa ye oye mu pitithile mombululu yekuma lyoshilando uusiku, noye mu kulukithile pevi, e li moshimbamba.
26 Sho a thiki muJerusalem, okwa ningi oonkambadhala a wayimine aalongwa, ihe oya li ye mu tila, molwaashoka kaya li ya itaala kutya okwa ninga shili omulongwa.
27 Onkee ano Barnabas okwe ya oku mu popila e te mu fala kaayapostoli, nokwe ya lombwele ombahu nokawawa* nkene Omuwa a ihololele Saulus mondjila nosho wo kutya okwa popya naye, nankene a popi nuulaadhi muDamaskus kombinga yedhina lyaJesus.
28 Nena Saulus okwa kala pamwe nayo muJerusalem, ta ende a manguluka,* nokwa kala ta popi nuulaadhi kombinga yedhina lyOmuwa.
29 Okwa kala ta popi nokutompathana nAajuda mboka haya popi Oshigreka, ihe yo oya li taya kambadhala oku mu dhipaga.
30 Sho aamwatate ye shi dhimbulula mo, oye mu fala kuKesarea, opo nduno taye mu tumine kuTarsus.
31 Nena egongalo alihe muJudea, muGalilea nomuSamaria olya kala li na ombili, nolya kala nokukolekwa; naasho lya kala hali tila Jehova nokukala metsokumwe newiliko lyombepo ondjapuki, olya indjipala.
32 Sho Petrus a kala ta endaenda noshitopolwa ashihe, okwa yi wo kaalongwa, mboka haya kala muLidda.
33 Hoka okwa adha ko omulumentu gwedhina Eneas, ngoka a kala ihaa zi pombete uule womimvo hetatu, molwaashoka okwa li a sa ombanda.
34 Petrus okwa ti kuye: “Eneas, Jesus Kristus okwe ku aludha. Thikama, e to yala ombete yoye.” Opo nduno okwa thikama nziya.
35 Sho aakalimo ayehe yomuLidda noyomuSharon ya mono shoka sha ningilwa Eneas, oya itaale Omuwa.
36 MuJoppa omwa li omulongwa gwedhina Tabita, ndyoka tali ti, “Dorkas.”* Okwa li ha longo iilonga oyindji iiwanawa, noha kwathele oohepele.
37 Sho Petrus a li muLidda, Tabita okwa ehama e ta si. Onkee ano aalongwa yomuJoppa oya yogo omudhimba gwe e taye gu langeke mondunda yopombanda.
38 Molwaashoka Lidda osha li popepi naJoppa, sho aalongwa ya uvu kutya Petrus oku li muLidda, oya tumu ko aalumentu yaali, ye ke mu indile taya ti: “Alikana, endelela, wu ye kutse!”
39 Opo ihe Petrus okwa thikama e ta yi pamwe nayo. Sho a thiki, oye mu fala mondunda yopombanda, naaselekadhi ayehe oye ya kuye taya lili, noye mu ulukile oonguwo odhindji nosho wo ndhoka dhokombanda, ndhoka Dorkas e ya hondjele sho a li momwenyo.
40 Opo nduno Petrus okwa lombwele ayehe, ya ye pondje, nokwa tsu oongolo e ta galikana. Opo ihe okwa punguluka, a taalele komudhimba, nokwa ti: “Tabita, penduka!” Okwa tonata, naasho a mono Petrus, okwa kuutumba.
41 Okwe mu kwata moshikaha, te mu thikamitha nokwa ithana aalongwa naaselekadhi e te mu gandja kuyo e na omwenyo.
42 Oshinima shoka osha taandele muJoppa ashihe, naantu oyendji oya itaale mOmuwa.
43 Petrus okwa kala muJoppa uule womasiku gontumba pamwe nomuhiki gwiipa, gwedhina Simon.
Omanyolo gopevi
^ Ondjila ndjoka otayi ulike konkalamwenyo yAakriste nokelongo lyawo.
^ Nenge “tidhagana.”
^ Nenge “tidhagana.”
^ Eln., “haya ithana.”
^ Eln., “mboka ya itaala medhina ndika.”
^ Nenge “iinima ayihe.”
^ Eln., “te ya, ye ta piti mo.”
^ Edhina Dorkas lyOshigreka nosho wo Tabita lyOshiaramea agehe otaga ti “Omenye.”
