PaJohannes 13:1-38
13 Manga oshituthi shOpaasa inaashi thika, Jesus okwa kala e shi shi nale kutya ethimbo lye lyokuza mo muuyuni mbuka, a shune kuhe, olya thika. Okwa li e hole aalongwa ye, mboka ya kala pamwe naye, nokwa kala e ya hole sigo opehulilo.
2 Pethimbo ya li taya li uulalelo, Ondiyapoli oya adhika nale ya nwetha mo* Judas Iskariot, omuna gwaSimon, a gwaaleke Jesus.
3 Onkee ano molwaashoka Jesus okwa li e shi kutya He okwe mu pa iinima ayihe nosho wo kutya okwa za kuKalunga, nota shuna kuye,
4 okwa thikama, sho ya li taya li uulalelo e ta ihula onguwo ye yokombanda. Opo nduno okwa kutha oshihanduke e te shi idhingile moshiya.
5 Konima yaashono, okwa tula omeya moshiyaha e ta tameke okuyoga oompadhi dhaalongwa ye, nokwe dhi theta noshihanduke, shoka a li a idhingila.
6 Opo nduno okwe ya puSimon Petrus, na Simon Petrus okwa ti kuye: “Omuwa, oto yogo oompadhi dhandje?”
7 Jesus okwe mu yamukula ta ti: “Shoka tandi ningi ku shi uvite ko ngashingeyi, ihe oto ke shi uva ko nale.”
8 Petrus okwa ti kuye: “Itandi ku pitike nando wu yoge oompadhi dhandje.” Jesus okwe mu yamukula a ti: “Ngele itandi yogo oompadhi dhoye, ito kala we nangame.”
9 Simon Petrus okwa ti kuye: “Omuwa, ino yoga owala oompadhi dhandje, ihe yoga wo iikaha yandje nomutse gwandje.”
10 Jesus okwa ti kuye: “Kehe ngoka a yogwa olutu aluhe okwa pumbwa owala okuyogwa koompadhi, opo a kale a yela thiluthilu. Ne omwa yela, ihe haamuhe.”
11 Jesus okwa li e shi ngoka a li te ke mu gwaaleka, nomolwaasho a ti: “Haamuhe mwa yela.”
12 Sho a yogo oompadhi dhawo, okwa zala onguwo ye yokombanda e ta kuutumba ishewe poshililo a endeka, nokwa ti kuyo: “Omu shi ngaa kutya omolwashike nda yogo oompadhi dheni?
13 Omu li mondjila, sho hamu ithana ndje ‘Muhongi’ nosho wo ‘Omuwa,’ oshoka ongame naanaa ngoka.
14 Onkee ano ngele ngame, Omuwa nOmuhongi, onda yoga oompadhi dheni, nane wo omu na* okukala hamu yogathana koompadhi.
15 Oshoka onde mu tulila po oshiholelwa, mu ninge naanaa ngaashi nde mu ningila.
16 Oshili tandi mu lombwele, omupiya ke vule mwene gwe, nomutumwa ke vule ngoka e mu tuma.
17 Ngele iinima mbika omu yi shi, nohamu yi tula miilonga, otamu kala mwa nyanyukwa.
18 Itandi popi kombinga yeni amuhe. Ngame ondi shi mboka nda hogolola. Ihe shika osha ningwa, opo enyolo li gwanithwe, ndyoka tali ti: ‘Ngoka a li ta li oshikwiila shandje, okwa ninga omutondi gwandje.’*
19 Ngashingeyi otandi shi mu lombwele, manga inaashi ningwa, opo ngele osha ningwa, mu itaale kutya enyolo ongame tali popi.
20 Oshili tandi mu lombwele, kehe ngoka ta taamba ko ngoka nda tuma okwa taamba ndje ko wo, nakehe ngoka ta taamba ndje, okwa taamba ko wo ngoka a tuma ndje.”
21 Konima sho Jesus a popi oohapu ndhoka, okwa tameke okukala a nika oluhodhi, nokwa popi ta ti: “Oshili tandi mu lombwele, gumwe gwomune ota ka gwaaleka ndje.”
22 Aalongwa oya tameke okutalathana taya ipula kutya olye gwomuyo Jesus ta popi.
23 Gumwe gwomaalongwa, ngoka a li e holike kuJesus, okwa li a kuutumba a endeka, popepi naye.*
24 Opo ihe Simon Petrus okwa gandja endhindhiliko komulongwa ngoka mokukomona komutse e ta ti kuye: “Tu lombwela kutya ota popi kombinga yalye.”
25 Onkee ano omulongwa ngoka okwa egamene pontulo yaJesus, nokwa ti kuye: “Omuwa, olye?”
26 Jesus okwa yamukula ta ti: “Oye ngoka tandi pe oshikwiila, shoka tandi elele.” Onkee ano konima sho a elele oshikwiila, okwe shi pe Judas, omuna gwaSimon Iskariot.
27 Konima sho Judas a taamba oshikwiila shoka, Satana okwe mu nwetha mo. Onkee ano Jesus okwa ti kuJudas: “Shoka wa hala okuninga shi ninga nziya.”
28 Ihe ayehe mboka ya li ya kuutumba poshililo ya endeka, kaya li ye shi kutya omolwashike Jesus a lombwele Judas oohapu ndhoka.
29 Molwaashoka Judas oye a li ha kala nokaketha kiimaliwa, yamwe oya li taya dhiladhila nokuli kutya Jesus okwa li te mu lombwele ta ti: “Ka lande shoka twa pumbwa omolwoshituthi,” nenge a gandje sha koohepele.
30 Onkee ano konima sho Judas a taamba oshipambu shoshikwiila, okwa yi nziya pondje, nosha li uusiku.
31 Onkee ano konima sho Judas a yi pondje, Jesus okwa ti: “Omuna gwomuntu ngashingeyi okwa tumbalekwa, na Kalunga ota simanekwa okupitila muye.
32 Kalunga mwene ote ke mu tumbaleka, note ke mu tumbaleka nziya.
33 Ookuume,* otandi kala nane owala okathimbo okafupi. Otamu ka konga ndje, ihe ngaashi nda lombwele Aajuda, nane otandi mu lombwele kutya: ‘Hoka tandi yi, itamu vulu okuya ko.’
34 Otandi mu pe oshipango oshipe, ano kutya mu kale mu holathane. Ngaashi owala ngame nda kala ndi mu hole, nane wo kaleni mu holathane.
35 Kungawo, aantu ayehe otaya ka tseya kutya ne aalongwa yandje, ngele omu holathane.”
36 Simon Petrus okwa ti kuye: “Omuwa, oto yi peni?” Jesus okwe mu yamukula ta ti: “Hoka tandi yi, ito vulu okuya ko ngashingeyi, ihe oto ke ya ko nale.”
37 Petrus okwa ti kuye: “Omuwa, omolwashike itaandi vulu okuya ko ngashingeyi? Onda ilongekidha okusa peha lyoye.”
38 Jesus okwe mu yamukula ta ti: “Owa ilongekidha ngaa shili okusa peha lyandje? Oshili tandi ku lombwele, manga ekondombolo inaali iga, oto ka idhimbika ndje lutatu.”
Omanyolo gopevi
^ Eln., “ya tula omadhiladhilo momutima.”
^ Nenge “oshinakugwanithwa.”
^ Nenge “okwa pilukila ndje po.”
^ Eln., “mekolo lyaJesus.”
^ Eln., “aanona.”
