PaJohannes 19:1-42
19 Nena Pilatus okwa kutha Jesus e te mu dhengitha.
2 Opo nduno aakwiita oya tungu oshishani shomakwega e taye shi mu zaleke komutse, noye mu zaleke wo elwaakani etiliganembwilili,
3 noya kala taye ya kuye taya ti: “Natu ku kunde, Omukwaniilwa gwAajuda!” Oya kala wo taye mu dhenge nomankawa moshipala.
4 Pilatus okwa yi ishewe pondje, nokwa ti kuyo: “Taleni, onde mu eta pondje kune, opo mu tseye kutya inandi mu mona ondjo yasha.”
5 Onkee ano Jesus okwe ya pondje a zala oshishani shomakwega komutse nelwaakani etiliganembwilili. Opo nduno Pilatus okwa ti kuyo: “Taleni, omulumentu oye nguka.”
6 Ihe sho aayambi aakuluntu naalangeli yotempeli ye mu mono, oya igidha taya ti: “Na ka alelwe komuti! Na ka alelwe komuti!”* Pilatus okwa ti kuyo: “Mu kuthii po e tamu ke mu dhipaga* ne yene. Oshoka ngame inandi mu mona ondjo yasha.”
7 Aajuda oye mu yamukula taya ti: “Otu na ompango, nompango ndjoka oya ti kutya okwa ilongela okusa, molwaashoka ota iti kutya ye omuna gwaKalunga.”
8 Sho Pilatus a uvu shoka taya popi, okwa li a tila noonkondo shi vulithe nale,
9 nokwa shuna ishewe megumbo lye e ta ti kuJesus: “Owa za peni?” Ihe Jesus ine mu yamukula nando.
10 Onkee ano Pilatus okwa ti kuye: “Ino hala okuyamukula ndje? Mbela ku shi shi kutya ondi na oonkondopangelo dhoku ku mangulula, nondi na oonkondopangelo dhoku ku dhipagitha?”*
11 Jesus okwe mu yamukula ta ti: “Andola kwa li wa pewa oonkondopangelo kuKalunga dhokupangela, ando ku dhi na; nomolwaashono omuntu ngoka a gandja ndje miikaha yoye, oye e na unene ondjo.”
12 Onkee ano Pilatus okwa kala ta dhiladhila kutya ote shi ende ngiini, opo e mu mangulule, ihe Aajuda oya igidha taya ti: “Ngele omulumentu nguka owe mu mangulula, ku shi kuume kOmukesari. Kehe ngoka ta iti kutya omukwaniilwa oku li ompinge nOmukesari.”
13 Opo nduno konima sho Pilatus a uvu oohapu ndhoka, okwa eta Jesus pondje, nokwa kuutumba koshipundi shokupangula, mehala hali ithanwa Olupale lwOmamanya, ihe mOshihebeli, ohalu ithanwa Gabbata.
14 Osha li lwopotundi ontihamano* mesiku lyelongekidho lyOpaasa. Opo nduno Pilatus okwa ti kAajuda: “Taleni, omukwaniilwa gweni oye nguka!”
15 Ihe oya igidha taya ti: “Mu kutha po mpaka! Mu kutha po mpaka! Na ka alelwe komuti!”* Pilatus okwa ti kuyo: “Omwa hala ndi dhipage omukwaniilwa gweni?” Aayambi aakuluntu oye mu yamukula taya ti: “Tse katu na omukwaniilwa, ihe otu na owala Omukesari.”
16 Opo nduno okwe mu gandja kuyo, a ka alelwe komuti.
Onkee ano oya kutha po Jesus.
17 Oya yi naye, a humbata omuti gwe gwomahepeko,* kehala hali ithanwa Ehala lyOmakolotse, ndyoka mOshihebeli, hali ithanwa Golgata.
18 Oye mu alele komuti pamwe naalumentu yaali, gumwe okolulyo lwe, nomukwawo okolumoho lwe, ye mu tula pokati.
19 Pilatus okwa nyola wo okapilangi e te ka tula komuti gwomahepeko.* Okwa li kwa nyolwa oohapu tadhi ti: “Jesus Omunasareti, Omukwaniilwa gwAajuda.”
20 Aajuda oyendji oya li ya lesha oohapu ndhoka, molwaashoka pehala mpoka Jesus a alelwa komuti, olya li popepi noshilando, noohapu ndhoka odha li dha nyolwa mOshihebeli, mOshilatina nomOshigreka.
21 Ihe aayambi aakuluntu yAajuda oya ti kuPilatus: “Ino nyola ko, ‘Omukwaniilwa gwAajuda,’ ihe nyola ko kutya okwa ti: ‘Ongame omukwaniilwa gwAajuda.’”
22 Pilatus okwe ya yamukula ta ti: “Ngame onda nyola shoka nda nyola.”
23 Sho aakwiita ya alele Jesus komuti, oya kutha onguwo ye yokombanda e taye yi topola miitopolwa ine, nomukwiita kehe okwa mono oshitopolwa shimwe, noya kutha po wo onguwo ye yokohi. Ihe onguwo ye yokohi kaya li yi na omuhondjo, oya li ya tungwa owala okuza pombanda sigo opevi.
24 Onkee ano oya lombwelathana taya ti: “Inatu yi tuula, ihe natu yi umbileni oshihogololitho, tu tale kutya otayi ningi po yalye.” Shoka osha ningwa, opo enyolo li gwanithwe, ndyoka tali ti: “Oya itopolele oonguwo dhandje, noye dhi umbile oshihogololitho.” Shoka osho naanaa aakwiita ya ningi.
25 Ihe pomuti gwomahepeko* gwaJesus opwa li pwa thikama yina nomumwayina gwayina; Maria, omukulukadhi gwaKleopas nosho wo Maria Magdalena.
26 Sho Jesus a mono yina nosho wo omulongwa, ngoka a li e hole, ya thikama popepi, okwa ti kuyina: “Meme, tala, okuza ngashingeyi, nguka omumwoyemati!”
27 Okwa lombwele wo omulongwa ngoka ta ti: “Tala, okuza ngashingeyi, nguka onyoko!” Okuza mpoka, omulongwa ngoka okwa taamba ko Maria, a ninge gwaandjawo.
28 Konima yaashika, Jesus okwa li e shi kutya iinima ayihe oya gwanithwa; opo enyolo li gwanithwe okwa ti: “Onda sa enota.”
29 Mpoka opwa li pu na oshiyuma sha udha omaviinu omalulu. Onkee ano oya yaya oshiyayo momaviinu omalulu e taye shi tula koshiti shoshisopi,* noye mu pe a nwe.
30 Sho Jesus a lolo omaviinu ngoka omalulu, okwa ti: “Osha gwanithwa!” e ta sizimike omutse gwe, nokwa si.
31 Molwaashoka osha li esiku lyElongekidho, opo omidhimba kaadhi kale komiti dhomahepeko mesiku lyEsabati, (oshoka esiku ndyoka lyEsabati olya li lya simanenena,) Aajuda oya pula Pilatus, a teyithe omagulu gawo, opo omidhimba dhawo dhi kuthwe ko.
32 Onkee ano aakwiita oye ya e taya teya omagulu gomulumentu gwotango nosho wo gomulumentu omukwawo, mboka yali ya alelwa pamwe naJesus.
33 Ihe sho ye ya puJesus, oya mono kutya okwa sa nale, onkee ano inaya teya omagulu ge.
34 Opo ihe gumwe gwomaakwiita okwe mu tsu negonga molupati, nomwa zi nziya ombinzi nomeya.
35 Ngoka a mono oshinima shoka okwe shi hokolola, nehokololo lye olyoshili, noku shi kutya shoka a popi oshoshili, opo nane wo mu vule okwiitaala.
36 Nokuli iinima mbika oya ningwa, opo enyolo li gwanithwe, ndyoka tali ti: “Kapu na nando olimwe lyomomasipa ge tali teywa.”*
37 Natango enyolo lilwe otali ti: “Otaya ka tala kwaangoka ya tsu negonga.”
38 Konima yaashono, Josef gwokuArimatia, ngoka a li omulongwa gwaJesus gwomeholamo, molwaashoka okwa li a tila Aajuda, okwa pula Pilatus ngele ota vulu okukutha po omudhimba gwaJesus, na Pilatus okwe mu pe epitikilo. Onkee ano okwe ya e ta kutha po omudhimba gwe.
39 Nikodemus, omulumentu, ngoka a yile kuJesus uusiku oshikando shotango, naye okwe ya, a etelela iigwanga* yomira nosho wo endombo ya lumbakanithwa mumwe, yookilohalama 30 lwaampono.*
40 Onkee ano oya kutha omudhimba gwaJesus, noye gu dhingile momalapi goliina mumwe niigwanga, pamukalo gwAajuda gwokufumvika.
41 Pehala mpoka a alelwa* komuti opwa li oshikunino, nomoshikunino moka omwa li ombila* ompe, moka inaamu langekwa nando onale omudhimba.
42 Molwaashoka olya li esiku lyElongekidho lyAajuda, nombila oya li popepi, oya langeke omudhimba gwaJesus moka.
Omanyolo gopevi
^ Nenge “Na ka dhipagelwe komuti! Na ka dhipagelwe komuti!”
^ Nenge “alela komuti.”
^ Nenge “alelitha komuti.”
^ Sha hala okutya, lwopomulongonambali gwomutenya.
^ Nenge “Na ka dhipagelwe komuti.”
^ Tala Omafatululo giitya.
^ Tala Omafatululo giitya.
^ Tala Omafatululo giitya.
^ Tala Omafatululo giitya.
^ Nenge “nyanyagulwa.”
^ Nenge tashi vulika, “okapandi kiigwanga.”
^ Sha hala okutya, yoopaunda dhAaroma 100 lwaampono.
^ Nenge “dhipagelwa.”
^ Nenge “ombiladhimbuluko.”
