PaLukas 11:1-54
11 Jesus okwa li ta galikana mehala lyontumba, naasho a mana, gumwe gwomaalongwa ye okwa ti kuye: “Omuwa, tu longa nkene tu na okugalikana, ngaashi wo Johannes a longo aalongwa ye.”
2 Onkee ano okwa ti kuyo: “Uuna tamu galikana, tyeni: ‘Tate, edhina lyoye nali yapulwe.* Uukwaniilwa woye nawu ye.
3 Tu pa oshikwiila* shetu shesiku, shoka twa pumbwa kehe esiku.
4 Tu dhimina po oondjo dhetu, ngaashi wo hatu dhimine po kehe ngoka a yona kutse; noino tu ethela momamakelo.’”
5 Opo nduno okwa ti kuyo: “Natu tye nduno gumwe gwomune okwa yi kukuume ke mokati kuusiku, nokwa ti kuye: ‘Kuume kandje, kwathela ndje iikwiila itatu,’
6 oshoka kuume kandje gumwe okwe ya kungame a zi molweendo, nokandi na shoka tandi mu pe.’
7 Ihe kuume ke ngoka okwe mu yamukula e li meni lyegumbo ta ti: ‘Ino piyaganeka ndje. Pomweelo opwa patwa nale. Ngame naamwandje otwa lala. Itandi vulu okupenduka ndi ku pe sha.’
8 Ngame otandi mu lombwele, nokuli nonando ita penduka e mu pe sha, molwaashoka e li kuume ke, oku na owala okupenduka e te mu pe shoka a pumbwa, molwaashoka a tsikile oku mu indila.
9 Onkee ano otandi mu lombwele, tsikileni okwiindila, notamu ka pewa; tsikileni okukonga, notamu ka mona; tsikileni okukonkola, notamu ka egululwa.
10 Oshoka kehe ngoka ta indile ota pewa, nakehe ngoka ta kongo ota mono, nakehe ngoka ta konkola ota egululwa.
11 Mbela omuvali guni gwomokati keni, ngele omwana e mu indile ohi, te ke mu pa eyoka pehala lyohi?
12 Nenge ngele okwe mu indile wo eyi, mbela ote ke mu pa ondje?
13 Ano, ngele ne, mboka aalunde, omu shi okupa oyana yeni omagano omawanawa, Ho yeni gwomegulu ita ka pa wo ombepo ondjapuki mboka taye mu indile!”
14 Konima yethimbo, okwa tidha mo ondemoni momulumentu, ndjoka ya li ye mu ningi omuthitawi. Sho ondemoni ya zi mo momulumentu ngoka omuthitawi, okwa tameke okupopya, nongundu yaantu oya li ya kumwa.
15 Ihe yamwe yomuyo oya ti: “Oondemoni ohe dhi tidha mo koonkondo dhaBelsebul,* omupangeli gwoondemoni.”
16 Yamwe ishewe oya tameke oku mu pula, e ya ulukile endhindhiliko lya za megulu, opo ye mu makele.
17 Sho Jesus a tseya shoka taya dhiladhila, okwa ti kuyo: “Uukwaniilwa kehe wa topoka otawu teka po, negumbo kehe lya topoka otali halakana po.
18 Sha faathana, ngele Satana okwa ipilukile po wo ye mwene, mbela uukwaniilwa we otawu vulu ngaa okukala po? Ne otamu ti ohandi tidha mo oondemoni koonkondo dhaBelsebul.
19 Ngele ohandi tidha mo oondemoni koonkondo dhaBelsebul, yo oyana yeni ohaye dhi tidha mo koonkondo dhalye? Onkee ano yo otaye ke mu pangula.
20 Ihe ngele okoonkondo dhaKalunga,* nena osha hala kutya Uukwaniilwa waKalunga owe mu pitilila po lela.
21 Ngele omulumentu omunankondo a homata ta tonatele egumbo lye, iinima ye otayi kala ya gamenwa.
22 Ihe ngele opwe ya omulumentu gumwe e mu vule oonkondo te mu kondjitha e te mu sindi, ote mu kutha iikondjitho ye ayihe, mbyoka a li a inekela, e te yi topolele po yalwe.
23 Kehe ngoka inaa gama kombinga yandje oku li ompinge nangame, nakehe ngoka itaa gongele pamwe nangame ota halakanitha.
24 “Uuna ombepo ya nyata* ya zi mo momuntu, ohayi taakana mombuga, tayi kongo ehala lyokuthuwa po, nongele inayi li mona, otayi ti: Otandi shuna kegumbo lyandje, hoka nda zile.
25 Sho ya galuka, oya adha egumbo lya kombwa lya yela sheke, nolya opalekwa nawa.
26 Opo ihe oya yi e tayi etelele oondemoni dhilwe heyali, ndhoka dha kolokosha dhi yi vule, nongele dha yi meni, otadhi kala moka. Onkee ano onkalo yahugunina yomuntu ngoka otayi ka kala ombwiinayi noonkondo yi vule yotango.”
27 Manga Jesus a li ta popi iinima mbyoka, omukiintu gumwe e li mokati kongundu yaantu okwe mu igidha ta ti: “Omukiintu, ngoka e ku vala nokwe ku yamutha, ina nyanyukwa tuu!”*
28 Ihe okwa ti: “Osho, ihe mboka ya nyanyukwa oomboka taya uvu oohapu dhaKalunga e taye dhi dhiginine.”
29 Sho aantu ya li ya gongala pamwe, okwa tameke ta popi ta ti: “Epipi ndika ekolokoshi otali kongo endhindhiliko, ihe itali pewa endhindhiliko lya sha, kakele kendhindhiliko lyaJona.
30 Ngaashi owala Jona a li endhindhiliko kAaninive, Omuna gwomuntu naye ota ka kala endhindhiliko kepipi ndika.
31 Omukwaniilwakiintu gwokuumbugantu ota ka yumudhwa pamwe naantu yepipi ndika mesiku lyEpangulo, note ke ya pa uusama, oshoka okwa zile kokule, opo e ye a pulakene koondunge dhaSalomo. Ihe tala, nguka e li mpaka okwa simana e vule Salomo.
32 Aaninive otaya ka yumudhwa pamwe nepipi ndika mesiku lyEpangulo, notaye ke li pa uusama, oshoka yo oya itedhulula, sho Jona e ya uvithile. Ihe tala, nguka e li mpaka okwa simana e vule Jona.
33 Ngele omuntu a tema olamba, ihe yi holeke, nenge e yi tule kohi yontungwa, ihe ohe yi tula koshihukikwa, opo ayehe mboka taye ya megumbo ya mone uuyelele.
34 Omeho goye ogo olamba yolutu. Uuna omeho goye ga tala owala koshinima shimwe, nena olutu lwoye aluhe otalu kala wo muuyelele. Ihe uuna omeho goye ga tala kiinima iiwinayi,* olutu lwoye otalu kala wo momilema.
35 Onkee ano kala wa kotoka, opo uuyelele, mboka wu li mungoye, kaawu ninge omilema.
36 Ano ngele olutu lwoye aluhe olu li muuyelele, kaapu na nando oshitopolwa shimwe shi li momilema, nena olutu lwoye aluhe otalu kala muuyelele, ngaashi olamba ndjoka, ye ku minikila.”
37 Sho Jesus a popi ngawo, Omufarisayi gumwe okwe mu hiya a ka lye pamwe naye. Onkee ano okwa yi megumbo lye e ta kuutumba* poshililo, ya lye.
38 Ihe Omufarisayi ngoka okwa li a kumwa, sho Jesus inaa iyoga tango kiikaha,* manga inaa lya.
39 Ihe Omuwa okwa ti kuye: “Aafarisayi ne, ohamu yogo oshitenga netiti kombanda, ihe meni lyeni omwa udha olwiho nuukolokoshi.
40 Magoya ne! Mbela ngoka a shita shoka shi li kombanda haye ngaa a shita shoka shi li meni?
41 Ihe gandjeni iikwatha* tashi zi komutima, opo mu kale mwa yela thiluthilu.
42 Yayee, Aafarisayi ne! Oshoka ohamu gandja oshitimulongo shominti, shorue* nosho wo iigwanga yilwe,* ihe ohamu etha uuyuuki nohole yokuhola Kalunga. Iinima mbyoka omwa li mu na oku yi gandja, ihe iikwawo yilwe kamu na oku yi etha.
43 Yayee, Aafarisayi ne! Oshoka omu hole okukuutumba kiipundi yokomeho* moosinagoga, nokupopithwa momukalo gwa ikalekelwa pomahala gomalandithilo.
44 Yayee, ne! Oshoka omwa fa oombila* dha filala, hoka aantu haya ende inaaye shi nongela.”
45 Gumwe gwomwaamboka ye shi Ompango nawa okwa ti kuJesus: “Muhongi, owe tu tuku wo, sho wa popi ngawo.”
46 Opo ihe Jesus okwa ti: “Yayee, ne, mboka wo mu shi Ompango nawa, oshoka ohamu tsike yalwe omitenge omidhigu okuhumbata, ihe ne yene ihamu dhi gumu nando onomunwe gumwe.”
47 Yayee, ne, molwaashoka ohamu tungu oombila* dhaahunganeki, mboka oohokulululwa ye ya dhipaga.
48 Osha yela kutya omu shi iilonga yoohokulululwa, mbyoka ya longo, sho ya dhipaga aahunganeki, nohamu ulike kutya omwe yi hokwa, sho hamu tungu oombila dhaahunganeki.
49 Onkee ano Kalunga, ngoka omunongo, okwa ti wo: ‘Otandi ke ya tumina aahunganeki naayapostoli, notaya ka dhipaga nokuhepeka yamwe yomuyo,
50 opo ombinzi yaahunganeki ayehe, ndjoka ya tika okuza petameko lyuuyuni, yi ka pulwe epipi ndika,
51 okuza kombinzi yaAbel, sigo okombinzi yaSakaria, ngoka a dhipagelwa pokati koshiyambelo notempeli.’ Eeno, ngame otandi mu lombwele, epipi ndika otali ke yi pulwa.
52 Yayee, ne, mboka mu shi Ompango nawa, oshoka omwa kutha po oshipatululo shokupatulula omweelo gwokutseya Kalunga. Ne yene itamu yi mo, notamu imbi mboka ya hala okuya mo.”
53 Onkee ano sho Jesus a zi mo megumbo moka, aalongimpango nAafarisayi oya tameke oku mu gongalela nelalakano lyoku mu pula omapulo ogendji ga gwedhwa po,
54 opo andola a popye sha, yo ye mu mone ondjo.
Omanyolo gopevi
^ Nenge “nali talike ko eyapuki; nali yelekwe.”
^ Nenge “iikulya.”
^ Edhina ndyoka Satana ha ithanwa.
^ Eln., “okomunwe gwaKalunga.”
^ Nenge “ondemoni.”
^ Eln., “oshivalelo, shoka she ku humbata, nomagundji, ngoka ge ku yamutha, oga nyanyukwa.”
^ Eln., “uuna omeho goye ge na olwiho.”
^ Nenge “a kuutumba a endeka.”
^ Sha hala okutya, inaa iyoga sha ikolelela koonkuluhedhi dhawo.
^ Nenge “iikwatha koohepele.” Tala Omafatululo giitya.
^ Oshihemba shika osha li hashi longithwa momiti nomiikulya.
^ Nenge “iikwamboga yilwe.”
^ Nenge “mbyoka iiwanawa.”
^ Nenge “oombiladhimbuluko.”
^ Nenge “oombiladhimbuluko.”
