PaLukas 12:1-59
-
Efulika lyAafarisayi (1-3)
-
Tileni Kalunga, ihe haantu (4-7)
-
Okuhempulula Kristus (8-12)
-
Ethaneko lyomulumentu omuyamba egoya (13-21)
-
Etheni po okukala mu na oshimpwiyu (22-34)
-
Oshigunda oshishona (32)
-
-
Okukala twa tonata (35-40)
-
Omupiya omudhiginini nosho wo omupiya ngoka kee shi omudhiginini (41-48)
-
Hambili, ihe etopoko (49-53)
-
Okunongonona eityo lyaashoka tashi ningwa pethimbo ndika (54-56)
-
Okupongolola po oontamanana (57-59)
12 Pethimbo opo tuu mpoka, sho ongundu yaantu omayovi ogendji ya li ya gongala taya ithininike mumwe, Jesus okwa tameke tango okulombwela aalongwa ye ta ti: “Kotokeleni efulika lyAafarisayi, ano uufudhime wawo.
2 Ihe kapu na shoka sha holekwa thiluthilu, itaashi ka hololwa, nokapu na shoka sha holekwa itaashi ka tseyika.
3 Onkee ano kehe shoka tamu popi momilema otashi ka uvika muuyelele, naashoka tamu nongona momagumbo geni otashi ka uvithwa okuza koontala dhomagumbo.
4 Shimwe ishewe, otandi mu lombwele, ookuume kandje, inamu tila mboka taya dhipaga olutu, nokonima kaye na shoka taya vulu okuninga po.
5 Ihe otandi mu ulukile ngoka mu na okutila: Tileni ngoka, ngele konima a dhipaga, e na oonkondo dhokuumbila muGehenna.* Eeno, ngame otandi mu lombwele, nguka oye mu na okutila.
6 Mbela omanza gatano ihaga landwa owala nuupeni uyali?* Ihe kapu na nando olimwe lyomugo tali dhimbiwa kuKalunga.*
7 Nokuli nomafufu geni agehe gokomutse oga yalulwa. Onkee ano inamu tila; ne omwa simana unene mu vule omanza ogendji.
8 “Ngame otandi mu lombwele, kehe ngoka ta hempulula ndje montaneho yaantu, Omuna gwomuntu ote ke mu hempulula wo montaneho yaayengeli yaKalunga.
9 Ihe kehe ngoka ta idhimbike ndje paantu, otandi ke mu idhimbika wo montaneho yaayengeli yaKalunga.
10 Kehe ngoka ta popile Omuna gwomuntu muuwinayi ota dhiminwa po, ihe kehe ngoka ta sheke ombepo ondjapuki ita dhiminwa po.
11 Uuna taye mu fala kiigongi* nokaapangeli, inamu kala mu na oshimpwiyu kutya otamu ka tya ngiini, nenge shike, opo mu ipopile,
12 oshoka ombepo ondjapuki otayi ke mu kwathela pethimbo olyo tuu ndyoka shoka mu na okutya.”
13 Opo ihe gumwe gwomongundu ndjoka okwa ti kuye: “Muhongi, lombwela omumwamememati tu topole naye uuthiga.”
14 Jesus okwa ti kuye: “Mulumentu ngoye, olye a pe ndje uuthemba wokuninga omutokoli, nenge omutopoli guuthiga weni yaali?”
15 Okuza mpono, okwa ti kuyo: “Kaleni mwa tonata nokukotokela olwiho kehe, oshoka nokuli nonando omuntu oku na eliko olindji, halyo tali mu kaleke nomwenyo.”
16 Opo ihe okwe ya lombwele ethaneko ta ti: “Opwa li pu na omulumentu gumwe omuyamba e na epya lya vala nawa.
17 Onkee ano okwa tameke okwiipopila momwenyo ta ti: ‘Ngashingeyi nandi ninge po shike, sho kaandi na mpoka tandi pungula iilikolomwa yandje?’
18 Opo nduno okwa ti: ‘Otandi ningi ngeyi: Otandi hanagula po oompungulilo dhandje e tandi tungu dhimwe oonene, naamoka omo tandi pungula iilya yandje ayihe nosho wo iinima yandje yilwe ayihe.
19 Onda ilombwele tandi ti: “Owa* pungula iinima oyindji tayi kwata omimvo odhindji. Onkee ano ino ipula nasha, lya, nwa, nokunyanyukilwa onkalamwenyo.”’
20 Ihe Kalunga okwe mu lombwele ta ti: ‘Mugoya ngoye, uusiku wonena, omwenyo gwoye oto gu kuthwa. Iinima mbyoka we yi ipungulile otayi ningi nduno yalye?’
21 Shoka osho wo tashi ka ningilwa ngoka ta ilikolele omaliko, ihe momeho gaKalunga ke shi omuyamba.”
22 Opo nduno okwa ti kaalongwa ye: “Nomolwaashoka tandi mu lombwele, etheni po okukala mu na oshimpwiyu kombinga yonkalamwenyo yeni kutya otamu li shike, nenge kutya otamu zala shike.
23 Oshoka omwenyo ogwa simana gu vule iikulya, nolutu olu vule oonguwo.
24 Taleni komakola. Ihaga kunu noihaga teya; kage na oondunda dhokupungula, nenge iigandhi, ihe Kalunga ohe ga palutha. Ne mbela inamu simana unene mu vule oondhila?
25 Olye ando gwomune ta vulu okugwedha ko nando okashona kuule womasiku gonkalamwenyo ye mokukala e na oshimpwiyu?
26 Onkee ano ngele itamu vulu okuninga oshinima oshishona sha tya ngawo, omolwashike mu na oshimpwiyu niinima yilwe?
27 Taleni koongala nkene hadhi koko. Ihadhi longo, dho ihadhi ihondjele oonguwo. Ihe ngame otandi mu lombwele, nokuli naSalomo, meopalo lye alihe, ina zala nando a fe yimwe yomudho.
28 Ano ngele Kalunga osho ha zaleke iimeno yokelundu ngawo, mbyoka yi li po owala nena, ngula e tayi umbilwa meziko, mbela ne ite ke mu zaleka, ne yeitaalo eshona?
29 Onkee ano etheni po okukala mu na oshimpwiyu kombinga yaashoka tamu li, nenge tamu nu, noinamu kala mu na oshimpwiyu sha pitilila.
30 Oshoka iinima mbyoka oyo tayi lalakanenwa noonkondo kaantu yomuuyuni, ihe Ho yeni oku shi kutya iinima mbyoka omwe yi pumbwa.
31 Pehala lyaashono, tsikileni okupititha komeho Uukwaniilwa we, nena mbiyaka yilwe otamu ke yi gwedhelwa ko.
32 “Inamu tila, ne oshigunda oshishona, oshoka Ho yeni okwa halelela oku mu pa Uukwaniilwa.
33 Landithii po iinima yeni e tamu gandja iikwatha.* Iningileni uumpunda wiimaliwa, mboka ihaawu kulupa, ano eliko megulu, ndyoka ihaali hulu po, moka kaamu na aafuthi noothithi dhoku li yona po.
34 Oshoka hoka ku na eliko lyoye, oko wo ku na omutima gwoye.
35 “Kaleni mwa zala, mwa ilongekidha,* noolamba dheni nadhi kale dha tema
36 e tamu kala mwa fa aantu ya tegelela omuwa gwawo a galuke koshituthihango, opo ngele okwe ya, ya vule oku mu patulula nziya.
37 Aapiya mboka itaya kala tuu ya nyanyukwa, ngele mwene gwawo okwe ya adha ya tonata! Oshili tandi mu lombwele, ota zala* e te ya lombwele ya kuutumbe poshililo* note ya yakula.
38 Ihe ngele okwe ya pelangelo etiyali,* nenge nokuli pelangelo etitatu* e ta adha ya ilongekidha, otaya kala ya nyanyukwa.
39 Ihe dhiladhileni kwaashika, andola mwene gwegumbo okwa li e shi kutya omufuthi ote ya pongapi, ando ita etha egumbo lye li teywe.
40 Nane wo kaleni mwa ilongekidha, oshoka Omuna gwomuntu ote ya potundi, ndjoka inaamu tegelela.”
41 Opo nduno Petrus okwa ti: “Omuwa, otse owala to lombwele ethaneko ndika, nenge kehe gumwe wo?”
42 Opo ihe Omuwa okwa ti: “Olye ano omupiya* omudhiginini nomunandunge, ngoka omuwa gwe e mu langeke po a tonatele aapiya ye, noku ya pe iikulya yawo ya gwana pethimbo lyo opala?
43 Omupiya ngoka ita ka kala tuu a nyanyukwa, ngele mwene gwe okwe mu adha ta ningi ngawo!
44 Oshili tandi mu lombwele, mwene gwe ote ke mu langeka po a tonatele iinima ye ayihe.
45 Ihe ngele omupiya ngoka okwa ipopile momutima ta ti: Mwene gwandje okwa kala ko e ta tameke okudhenga aapiya ooyakwawo, aalumentu naakiintu, nokulya nokunwa e ta kolwa,
46 nena mwene gwomupiya ngoka ote ya mesiku, ndyoka inee mu tegelela, nopotundi, ndjoka inee yi tseya; namwene gwe ote ke mu geela negeelo enene e te mu tula mehala limwe naamboka kaaye shi aadhiginini.
47 Opo nduno omupiya, ngoka e shi ehalo lyamwene gwe, ihe ina ilongekidhila okuya kwe, nenge inaa gwanitha shoka a pulwa a ninge,* ota ka dhengwa unene.
48 Ihe omupiya ngoka kee shi ehalo lyamwene gwe, nokwa ningi iinima mbyoka ya gwana oku mu dhengitha, ota dhengwa kashona. Odhoshili kutya kehe ngoka a pewa oshindji ota ka pulwa oshindji, naangoka a langekwa po a tonatele oshindji, ota ka pulwa oshindji noonkondo.
49 “Onde ya kombanda yevi, ndi teme omulilo; oshike ishewe nda hala, ngele omulilo onde gu tema nale?
50 Odhoshili kutya ondi na eninginitho, ndyoka ndi na okuninginithwa, ihe otandi kala nda nika oluhodhi, sigo sha gwanithwa.
51 Mbela otamu dhiladhila kutya onde ya okweeta ombili kombanda yevi? Aawe, ngame otandi mu lombwele, onde ya okweeta etopoko.
52 Oshoka okuza ngashingeyi, momagumbo otamu ka kala etopoko. Ngele omu na aantu yatano, yatatu otaya ka kala ye li ompinge nayaali, nayaali otaya ka kala ompinge nayatatu.
53 Otaya ka kala ya topoka. He ota ka kala ompinge nomwanamati, nomwanamati ota ka kala ompinge nahe. Yina ota ka kala ompinge nomwanakadhona, nomwanakadhona ota ka kala ompinge nayina. Yinamweno ota ka kala ompinge noshitenya shomukadhona, noshitenya shomukadhona otashi ka kala ompinge nayinamweno.”
54 Opo nduno okwa lombwele wo ongundu yaantu ta ti: “Uuna mwa mono omugamba* tagu tumbu kuuninginino, ohamu ti: ‘Otaku zi oshikungulu shomvula,’ naashoka osho hashi ningwa.
55 Nongele mwa mono ombepo tayi pepe tayi zi kuumbugantu, ohamu ti: ‘Nena otaku ka kala kwa pupyala noonkondo,’ naashoka osho hashi ningwa.
56 Aafudhime ne! Omu shi okunongonona nkene onkalo yombepo* tayi ka kala, ihe omolwashike kaamu shi okunongonona eityo lyaashoka tashi ningwa pethimbo ndika?
57 Omolwashike ihaamu tokola wo ne yene shoka sha uka?
58 Pashiholelwa, uuna to yi nomutamaneki gwoye komupangeli, manga mu li mondjila, pongololii po uupyakadhi, mboka wu li pokati keni naye, opo kee ku gandje momake gomupanguli, nomupanguli kee ku gandje komuyakuli gwomompangu, omuyakuli gwomompangu e te ku tula mondholongo.
59 Ngame otandi ku lombwele, ito zi mo nandonando, sigo oosho wa futu okamaliwa koye kahugunina.”*
Omanyolo gopevi
^ Tala Omafatululo giitya.
^ Eln., “nooassarion mbali.”
^ Nenge “te li idhimbike.”
^ Nenge “koosinagoga.”
^ Nenge “mwenyo gwandje owa.”
^ Nenge “iikwatha koohepele.” Tala Omafatululo giitya.
^ Eln., “mu na omapaya ga patwa.”
^ Nenge “ta ilongekidha.”
^ Nenge “ya kuutumbe ya endeka.”
^ Okuza lwopomugoyi guusiku sigo omokati kuusiku.
^ Okuza mokati kuusiku sigo olwopondatu yokoongulasha.
^ Nenge “omutonateli gwegumbo.”
^ Nenge “metsokumwe nehalo lyamwene gwe.”
^ Nenge “oshikogo.”
^ Nenge “evi newangandjo.”
^ Eln., “okahaulapa koye kahugunina.”
