PaLukas 15:1-32
15 Aafendelithi naalunde oya kala taya gongalele Jesus, ya pulakene kuye.
2 Opo nduno Aafarisayi naalongimpango oya kala taya ngungutula taya ti: “Omulumentu nguka okuume kaalunde, noha li pamwe nayo.”
3 Okuza mpono okwe ya lombwele ethaneko, ta ti:
4 Natu tye ando omulumentu gumwe oku na oonzi 100. Ngele yimwe oya kana, mbela ita thigi ndhiyaka dhilwe 99 mombuga e ta ka konga ndjiyaka ya kana, sigo e yi mono?
5 Ngele okwe yi mono, ota kala a nyanyukwa e te yi humbata komapepe ge.
6 Opo nduno uuna a thiki kegumbo, ota ithana ookuume ke naashiinda she e te ya lombwele ta ti: ‘Nyanyukweni pamwe nangame, oshoka onzi yandje, ndjoka ya li ya kana, onde yi mona.’
7 Ngame otandi mu lombwele, uuna wo omulunde a itedhulula, megulu ohamu kala enyanyu enene, li vule okunyanyukilwa aayuuki 99, mboka inaaya pumbwa okwiitedhulula.
8 “Mbela omukiintu guni, uuna e na iimaliwa iisiliveli omulongo e ta kanitha po shimwe, itaa tema olamba e ta kombo egumbo lye e ta kongo i itula mo, sigo e shi mono?
9 Opo nduno uuna e shi mono, ota ithana ookuume ke* naashiinda she e te ya lombwele ta ti: ‘Nyanyukweni pamwe nangame, oshoka oshisiliveli shandje, shoka nda li nda kanitha, onde shi mona.’
10 Ngame otandi mu lombwele, naayengeli yaKalunga megulu wo ohaya kala ya nyanyukwa, uuna omulunde gumwe a itedhulula.”
11 Opo nduno okwa ti: “Omulumentu gumwe okwa li e na oyanamati yaali.
12 Ngoka omushona kumukwawo okwa ti kuhe: ‘Tate, pe ndje ombinga yandje yeliko, ndjoka ndi na okupewa.’ Onkee ano he okwe ya topolele eliko lye.
13 Konima yomasiku omashona, omwanamati, ngoka omushona, okwa gongele iinima ye ayihe e ta yi koshilongo shokokule, hoka a ka hanagula po eliko lye nokukala nonkalamwenyo inaayi yogoka.*
14 Sho a mana po eliko lye alihe, oshilongo shoka osha adhika kondjala onene, nokwa li ta mono iihuna.
15 Okwa yi nokuli kugumwe gwomoshilongo shoka, ngoka e mu tumu kepya lye a ka lithe iingulu ye.
16 Okwa li nokuli ha kala a hala okulya omayakashala, ngoka ga li haga liwa kiingulu, ihe kapu na nando ogumwe e mu pe sha.
17 “Sho a dhimbulula kutya ina katuka pandunge, okwa ti: ‘Aaniilonga yatate oye na iikulya ya gwana, omanga ngame ndi li huka tandi si ondjala.
18 Otandi thikama ndi shune kutate e tandi mu lombwele tandi ti: “Tate, onda yona kuKalunga* nokungoye.
19 Inandi gwana we okwiithanwa omumwoye. Nandi kale ngaashi gumwe gwomaaniilonga yoye.”’
20 Onkee ano okwa thikama e ta yi kuhe. Manga e li kokule, he okwe mu mono, nokwa li e mu uvitile ohenda. Opo nduno he okwa matuka e ke mu tsakaneke e te mu papatele,* nokwe mu hupita.
21 Opo ihe omwanamati ngoka okwa ti kuhe: ‘Tate, onda yona kuKalunga* nokungoye. Inandi gwana we okwiithanwa omumwoye.’
22 Ihe he okwa ti kaapiya ye: ‘Endeleleni mu ete onguwo, ndjoka ombwanawa lela, mu yi mu zaleke. Mu zalekeni okalinga komunwe noongaku koompadhi dhe.
23 Eteni wo ontana, ndjoka ya ondodhwa, yi tseleni, opo tu lyeni notu nyanyukilweni pamwe,
24 oshoka omumwandje nguka okwa li a sa, ihe ngashingeyi okwa yumuka; okwa li a kana, ihe okwa monika.’ Opo nduno oya tameke okunyanyukilwa pamwe.
25 “Ihe omwanamati, ngoka omukuluntu, okwa adhika e li mepya, naasho a thiki popepi negumbo, okwa uvu aantu taya imbi notaya tanta.
26 Onkee ano okwa ithana gumwe gwomaapiya kuye e te mu pula kutya oshike shi li megumbo.
27 Omupiya ngoka okwa ti kuye: ‘Mumwanyoko okwe ya, naho okwe mu tselela ontana ya ondodhwa, molwaashoka okwa galuka e li nawa.’
28 Ihe omwanamati, ngoka omukuluntu, okwa geye, nokwa tindi okuya megumbo. Okuza mpono, he okwe ya pondje e te mu ladhipike a ye naye megumbo.
29 Okwa ti kuhe: ‘Tala, onde ku longela omimvo odhindji, nonda kala aluhe handi vulika kungoye, ihe kapu na nando esiku wa pele ndje okakombwena, ndi nyanyukilwe pamwe nookuume kandje.
30 Ihe nziya sho omumwoyemati, nguka a halakanitha po eliko lyoye pamwe noombwanda, a galuka, owe mu tselele ontana ya ondodhwa.’
31 Opo nduno he okwa ti kuye: ‘Mumwandje, ngoye owa kala aluhe pamwe nangame, niinima ayihe yandje oyoye wo.
32 Otwa ninga owala oshituthi, tu nyanyukilwe pamwe, oshoka omumwanyoko okwa li a sa, ihe ngashingeyi okwa yumuka; okwa li a kana, ihe okwa monika.’”
Omanyolo gopevi
^ Nenge “ookuume ke aakiintu.”
^ Nenge “ a iyekelahi; nonkalamwenyo ya vundakana.”
^ Eln., “kegulu.”
^ Eln., “e te mu idhingile mothingo.”
^ Eln., “kegulu.”
