PaLukas 16:1-31
16 Opo nduno Jesus okwa lombwele wo aalongwa ye ta ti: “Omulumentu gumwe omuyamba okwa li e na omupiya,* nokwa li a lombwelwa taku ti, ‘Omupiya ngoka ha tonatele egumbo lyoye ota hepeke eliko lyoye.’
2 Onkee ano okwa ithana omupiya ngoka, nokwa ti kuye: ‘Shoka nda uvu kombinga yoye kashi shi oshiwanawa. Ulukila ndje omukanda, ngoka wa nyola, nkene wa kala to longitha eliko lyandje, oshoka ino gwana we okutonatela egumbo lyandje.’
3 Opo ihe omupiya ngoka okwa ipopile ta ti: ‘Nandi ninge po shike, sho mwene gwandje ta kutha ndje oshinakugwanithwa shokutonatela egumbo lye? Itandi vulu iilonga yomepya, nonda sa ohoni okuhehela.
4 Ehee! Ondi shi shoka ndi na okuninga, opo ngele onda kuthwa oshinakugwanithwa shokutonatela egumbo lyamwene gwandje, aantu ya taambe ndje momagumbo gawo.’
5 Okuza mpono, sho a ithana kehe gumwe ngoka e na oongunga dhamwene gwe, okwa ti kugwotango: ‘Owu na oongunga dhamwene gwandje dhi thike peni?’
6 Okwe mu yamukula a ti: ‘Iiyuma 100* yomagadhi gooholivi.’ Opo nduno omupiya ngoka okwa ti kuye: ‘Kutha omukanda gwoye gwoongunga, to kuutumba e to nyola po nziya iiyuma 50.’
7 Okuza mpono okwa ti kugulwe, ngoye owu na oongunga dhi thike peni? Okwa ti: ‘Oondoloma* 100 dhiilya.’ Omupiya okwa ti kuye: ‘Kutha omukanda gwoye gwoongunga e to nyola po oondoloma 80.’
8 Nonando omupiya ngoka ka li omuyuuki, mwene gwe okwe mu pandula, oshoka okwa katuka pandunge. Oyana yuuyuni mbuka* ohaya ungaunga pandunge nayakwawo, omolwuuwanawa wawo yene, ye vule oyana yuuyelele.
9 “Shimwe ishewe, ngame otandi mu lombwele: “Ikongeleni ookuume neliko lyuuyuni mbuka, opo ngele olya hulu po, ye mu taambe momahala gaaluhe.
10 Omuntu, ngoka omudhiginini miinima iishona, omudhiginini wo miinima, mbyoka iinene, nomuntu, ngoka kee shi omudhiginini miinima iishona, ke shi wo omudhiginini miinima, mbyoka iinene.
11 Onkee ano ngele inamu ulika kutya omu shi okwiinekelelwa eliko lyomuuyuni mbuka, olye te ke mu inekelela ndyoka lyashili?
12 Nongele inamu ulika kutya ne aainekelwa shi na ko nasha niinima yayalwe, olye te ke mu pa shoka mwa nuninwa?
13 Kapu na omupiya ta vulu okulongela aawa yaali, oshoka ota tondo gumwe e ta kala e hole omukwawo, nenge ta kala omudhiginini kugulwe e ta dhini ngwiyaka. Itamu vulu okukala aapiya yaKalunga nosho wo yOmaliko.”
14 Pethimbo ndyoka, Aafarisayi, mboka ye hole iimaliwa, oya li taya pulakene, sho Jesus ta popi iinima ayihe mbyoka, noya tameke oku mu sheka.
15 Onkee ano okwa ti kuyo: “Ne ohamu imonikitha aayuuki kaantu, ihe Kalunga oku shi shoka shi li momitima dheni. Oshoka shoka aantu ya tala ko sha simana osho iihuna* momeho gaKalunga.
16 Ompango nosho wo Aahunganeki ayehe oya hulile muJohannes. Okuza mpono, onkundana ombwanawa kombinga yUukwaniilwa waKalunga otayi uvithwa, naantu yomaludhi agehe otaye wu lalakanene.
17 Odhoshili kutya oshipu egulu nevi yi hule po shi vulithe okandanda kamwe komOmpango ka kale inaaka gwanithwa po.
18 “Kehe ngoka ta teya ondjokana nomukulukadhi gwe e ta hokana gulwe ota hondele, nakehe ngoka ta hokana omukiintu, ngoka ya teya ondjokana nomusamane gwe ota hondele.
19 “Opwa li omulumentu omuyamba, ngoka a li ha zala oonguwo oontiliganembwilili nodholiina, nokwa kala ta nyanyukilwa onkalamwenyo yuuzeko esiku kehe.
20 Ihe omuheheli, gwedhina Lasarus, okwa li ha tulwa posheelo shomuyamba ngoka, e na iilalo olutu aluhe,
21 nokwa li ha kala a halelela okulya uundjagumuke, mboka tawu gu poshitaafula shomuyamba ngoka. Eeno, nokuli noombwa odha li hadhi ya e tadhi latha iilalo ye.
22 Mokweendela ko kwethimbo, omuheheli ngoka okwa si, naayengeli oye mu fala puAbraham.*
“Omulumentu ngoka omuyamba naye okwa si wo e ta fumvikwa.
23 Manga omulumentu ngoka omuyamba e li mOmbila,* ta hepekwa, okwa yelutha omeho ge, nokwa mono Abraham e li kokule, naLasarus e li puye.*
24 Onkee ano okwa igidha ta ti: ‘Tate Abraham, sila ndje ohenda e to tumu Lasarus a yaye ondungu yomunwe gwe momeya, opo a talaleke elaka lyandje, oshoka ondi li mo te luluma unene momulilo, nguka gwa hanya.’
25 Ihe Abraham okwa ti: ‘Mumwandje, dhimbulukwa kutya owa li wu na iinima iiwanawa monkalamwenyo yoye, ihe Lasarus okwa kala ta mono iihuna. Ye ngashingeyi oku li mpaka ta hekelekwa,* ihe ngoye owu li muuwehame.
26 Kakele kaashono, pokati ketu nane opwa tulwa olumbogo olunene, opo mboka ya hala okuya kune kaaya vule oku shi ninga, naantu, mboka ye li kune, kaaya vule okuya kutse.’
27 Opo nduno omulumentu ngoka omuyamba okwa ti: ‘Ngele osho shi li ngawo, otandi ku indile, tate, wu mu tume kegumbo lyatate,
28 oshoka ondi na aamwamememati yatano, e ke ya londodhe, opo nayo kaaye ye mehala ndika lyomahepeko.’
29 Ihe Abraham okwa ti: ‘Oye na omanyolo gaMoses nogAahunganeki; naya pulakene kugo.’
30 Opo ihe okwa ti: ‘Aawe, tate Abraham, ngele gumwe gwomaasi okwa yi kuyo, otaya itedhulula.’
31 Ihe okwa ti kuye: ‘Ngele itaya pulakene komanyolo gaMoses nogAahunganeki, itaya ka tompwa wo kugumwe ngoka a yumudhwa kuusi.’”
Omanyolo gopevi
^ Nenge “omutonateli gwegumbo.”
^ Nenge “oolitela 2 200.” Oshiyuma shimwe osha li hashi yi oolitela 22.
^ MOshigreka, oo-koros. Oshiyelekitho shoka oshi thike poolitela 220, nenge pondoloma yimwe lwaampono.
^ Nenge “yonkalelo yiinima yuuyuni mbuka.” Tala Omafatululo giitya.
^ Eln., “oshitondithi.”
^ Eln., “mekolo lyaAbraham.”
^ Nenge “mu-Hades,” sha hala okutya, muusi. Tala Omafatululo giitya.
^ Eln., “mekolo lyaAbraham.”
^ Nenge “ta talalekwa.”
