PaLukas 19:1-48
19 Opo nduno sho Jesus a li ta piti muJeriko,
2 omwa li mu na omulumentu gwedhina Sakeus, gumwe gwomaakuluntu yaafendelithi, nokwa li omuyamba.
3 Sakeus okwa li ta kambadhala okumona Jesus, ihe ka li ta vulu, oshoka okwa li omufupi, nokwa li a shigwa kaantu.
4 Onkee ano okwa matuka a uka komeho, nokwa londo komukwiyu, opo a vule okumona Jesus, oshoka opo a li te ya okupita mpoka.
5 Sho Jesus a thiki po, okwa tala pombanda, nokwa ti kuye: “Sakeus, londoloka nziya, oshoka nena, otandi ka uhala kegumbo lyoye.”
6 Opo ihe nziya, okwa londoloka e te mu taamba ko megumbo lye nenyanyu.
7 Sho aantu ayehe ye shi mono, oya tameke okungungutula, taya ti: “Ota ka uhala kegumbo lyomulumentu omulunde.”
8 Ihe Sakeus okwa thikama e ta ti kOmuwa: “Omuwa, tala! Etata lyiinima yandje otandi li gandja koohepele, nongele opu na ngoka nde mu nyokoma,* otandi ke mu shunithila iinima ye mbyoka lune.”
9 Opo ihe Jesus okwa ti kuye: “Nena tuu ndjika, ehupitho olye ya megumbo ndika, oshoka naye wo omuna gwaAbraham.
10 Oshoka Omuna gwomuntu okwe ya okukonga nokuhupitha mboka ya li ya kana.”
11 Manga aalongwa ya li taya pulakene koohapu dhe ndhoka, okwe ya lombwele ethaneko limwe, molwaashoka okwa li e li popepi naJerusalem, noya li taya dhiladhila kutya Uukwaniilwa waKalunga otawu holoka nziya.
12 Onkee ano Jesus okwa ti: “Opwa li omulumentu a valwa komukwaniilwa, nokwa yi koshilongo shokokule, opo a ka ninge omukwaniilwa, ye a galuke.
13 Manga inaa ya, okwa ithana aapiya ye omulongo, e te ya pe iisiliveli* omulongo, nokwa ti kuyo: ‘Ka ngeshefeni niimaliwa mbyoka, sigo nda galuka.’
14 Ihe aakwashigwana yomoshilongo shono oya li ye mu tonde, noya tumu aatumwakalelipo kuye ye ke mu lombwele taya ti: ‘Inatu hala wu ninge omukwaniilwa gwetu.’
15 “Sho a galuka a ninga omukwaniilwa, okwa ithana aapiya ye, mboka a li a pa iimaliwa,* opo a mone kutya oye yi likolitha shi thike peni mokungeshefa kwawo.
16 Onkee ano omupiya gwotango okwe ya kuye e ta ti: ‘Omuwa, oshisiliveli* shoye onde shi likolitha iisiliveli omulongo.’
17 Okwa ti kuye: ‘Iyaloo, omupiya ngoye omwaanawa! Molwaashoka owa ulike kutya ngoye omudhiginini miinima iishona, oto ningi omupangeli gwiilando omulongo.’
18 Opo nduno omupiya omutiyali okwe ya kuye ta ti: ‘Oshisiliveli* shoye onde shi likolitha iisiliveli itano.’
19 Okwa ti wo kungoka: ‘Nangoye oto ningi omupangeli gwiilando itano.’
20 Ihe omupiya gwe gulwe okwe ya kuye ta ti: ‘Omuwa, oshimaliwa shoye osho shika, shoka nda kala nda holeka, nde shi gonyena melapi.
21 Onda li nde ku tila, molwaashoka ngoye omulumentu omukwanyanya. Oho kutha shoka inoo pungula, noho teya shoka inoo kuna.’
22 Omuwa gwe okwa ti kuye: ‘Otandi ku pangula omolwoohapu dhoye, omupiya ngoye omukolokoshi. Mbela ino kala wu shi kutya ngame omulumentu omukwanyanya, handi kutha shoka inaandi pungula, nohandi teya shoka inaandi kuna?
23 Onkee ano omolwashike nduno inoo fala iimaliwa yandje kaapunguli yiimaliwa, opo ngele nda galuka, ndi yi pewe niihohela?’
24 “Opo ihe okwa lombwele mboka ya li ya thikama mpoka ta ti: ‘Mu kutheni oshisiliveli* shoka e na e tamu shi pe ngoka e na iisiliveli omulongo.
25 Ihe oya ti kuye: ‘Omuwa, oku na nale iisiliveli* omulongo.’ —
26 ‘Ngame otandi mu lombwele, kehe ngoka e na ota pewa oshindji, ihe ngoka kee na sha ota kuthwa nokuli naashoka e na.
27 Eteni nokuli aatondi yandje mpaka, mboka kaaya li ya hala ndi ninge omukwaniilwa, e tamu ya dhipagele komeho gandje.’”
28 Konima sho a popi oohapu ndhoka, okwa tsikile nondjila ye a uka kuJerusalem.
29 Opo nduno sho a thiki popepi naBetfage naBetania, pondundu hayi ithanwa Ondundu yOoholivi, okwa tumu aalongwa ye yaali,
30 ta ti: “Indeni komukunda, ngoka gu li komeho geni, nokonima ngele mwa thiki ko, otamu adha ko okasinogona ka mangwa, hoka inaaka kayilwa nando onale komuntu. Ka mangululeni e tamu ka eta huka.
31 Ihe ngele opu na gumwe, ngoka te mu pula, ‘Omolwashike tamu ka mangulula mo?’ tyeni, ‘Omuwa okwe ka pumbwa.’”
32 Onkee ano mboka ya tumwa oya yi, noye ka adha naanaa ngaashi e ya lombwele.
33 Ihe manga ya li taye ka mangulula mo, ooyene yako oya ti kuyo: “Omolwashike tamu mangulula mo okasinogona?”
34 Oya ti: “Omuwa okwe ka pumbwa.”
35 Opo nduno oya eta okasino kuJesus, taya yala ko oonguwo dhawo dhokombanda, Jesus e ta kuutumba kuko.
36 Sho e ka kayila ta yi, aantu oya li taya yala oonguwo dhawo dhokombanda mondjila.
37 Nziya, sho a thiki pondjila, ndjoka ya enda pOndundu yOoholivi, ongundu ayihe yaalongwa oya nyanyukwa, noya tameke okuhambelela Kalunga newi lyopombanda, omolwiikumithalonga ayihe, mbyoka ya mona,
38 taya ti: “Na lalekwe nuuyamba, ngoka te ya e li Omukwaniilwa medhina lyaJehova! Megulu namu kale ombili, nesimano nali ye kuKalunga, ngoka e li pombandambanda!”
39 Ihe yamwe yomAafarisayi, mboka ya li mokati kongundu yaantu, oya ti kuJesus: “Muhongi, ganda aalongwa yoye.”
40 Ihe okwe ya yamukula a ti: “Ngame otandi mu lombwele, ngele mbaka oya mwena, omamanya otage shi igidha mokule.”
41 Opo nduno sho a thiki popepi noshilando Jerusalem, okwe shi tala e te shi lili
42 ta ti: “Owa li wu na okukala wa uva ko nale iinima mbyoka tayi eta ombili, ihe ngashingeyi owe yi holekwa.
43 Oshoka ethimbo otali ya, uuna aatondi yoye taye ke ku dhingilila niiti ya honga, notaye ke ku kondeka* okuziilila koombinga adhihe.
44 Otaye ke ku hanagula po pamwe noyana yoye, nomungoye itaya ka thiga mo emanya lya londa kekwawo, oshoka Kalunga okwa li e ya oku ku konakona, ihe ino shi ndhindhilika.”
45 Opo ihe okwa yi motempeli, nokwa tameke okutidha mo ayehe mboka ya li taya landitha,
46 ta ti kuyo: “Okwa nyolwa, ‘Egumbo lyandje otali ka ithanwa egumbo lyokugalikanena,’ ihe ne omwe li ninga ekololo lyaayugi.”
47 Esiku kehe, Jesus okwa tsikile okulonga aantu motempeli. Ihe aayambi aakuluntu, aalongimpango naawiliki yoshigwana oya li taya pangele ompangela, ye mu dhipage.
48 Ihe inaya mona ompito yoku shi ninga, oshoka aantu oyendji oya kala haye mu ngundumanene aluhe, ya pulakene kuye.
Omanyolo gopevi
^ Nenge “nde mu nyokoma moku mu kengelela.”
^ Eln., “oomina.” Omina yimwe oya li yi thike pofuto yoomwedhi ndatu.
^ Eln., “iisiliveli.”
^ Eln., “omina. Omina yimwe oya li yi thike pofuto yoomwedhi ndatu.”
^ Eln., “omina. Omina yimwe oya li yi thike pofuto yoomwedhi ndatu.”
^ Eln., “omina. Omina yimwe oya li yi thike pofuto yoomwedhi ndatu.”
^ Eln., “oomina. Omina yimwe oya li yi thike pofuto yoomwedhi ndatu.”
^ Nenge “thininika.”
