PaLukas 7:1-50
-
Eitaalo lyomukuluntu gwetangakwiita (1-10)
-
Jesus ta yumudha okamwanamati komuselekadhi muNain (11-17)
-
Johannes Omuninginithi ta tangwa (18-30)
-
Epipi li na omitima omikukutu tali pangulwa (31-35)
-
Omukiintu omulunde ta dhiminwa po (36-50)
-
Ethaneko kombinga yaalumentu mboka ya li ye na oongunga (41-43)
-
7 Sho Jesus a mana okupopya shoka a li e na okulombwela aantu, okwa yi kuKapernaum.
2 Pethimbo mpoka omukuluntu gwetangakwiita okwa li e na omupiya gwe ngoka e hole, ngoka a li ta ehama noonkondo, nokwa li pokusa.
3 Sho a uvu kombinga yaJesus, okwa tumu aakuluntu yamwe yoshigwana shAajuda, ye ke mu ithane, e ye kuye, a aludhe omupiya gwe.
4 Oye ya kuJesus, noya tameke oku mu indila ya mana mo taya ti: “Omulumentu nguka okwa gwana okukwathelwa kungoye,
5 oshoka oku hole oshigwana shetu, noye a tungitha osinagoga yetu.”
6 Onkee ano Jesus okwa yi pamwe nayo. Ihe sho a li pokuthika pegumbo lyomukuluntu gwetangakwiita, okwa adhika nale a tuma ookuume ke, ya ka lombwele Jesus taya ti: “Omuwa, ino ihepeka we, oshoka inandi gwana oku ku taamba megumbo lyandje.
7 Onda mona wo kutya inandi gwana okuya kungoye. Popya owala lumwe, omupiya gwandje nota aluka;
8 oshoka nangame wo omupangelwa owala ndi na aakwiita ye li kohi yewiliko lyandje. Ngele onda ti kugumwe: ‘Inda!’ ota yi, nongele onda ti kumukwawo: ‘Ila!’ ote ya, nuuna nda ti komupiya gwandje: ‘Ninga shino!’ ote shi ningi.”
9 Sho Jesus a uvu oohapu dhe ndhoka, okwa li a kumwa, nokwa tala kongundu yaantu, ndjoka ya li ye mu landula, e ta ti: “Ngame otandi mu lombwele, muIsraeli ashihe inandi mona mo nokuli nando onale gumwe e na eitaalo lya kola lya fa ndika.”
10 Sho mboka ya li ya tumwa ya galukile kegumbo, oya adha omupiya ngoka a aluka.
11 Nziya konima yaashono, Jesus naalongwa ye nosho wo ongundu onene yaantu oya yi koshilando shedhina Nain.
12 Sho ya thiki popepi nosheelo shoshilando, okwa mono aantu ya inda omudhimba gwomumati, ngoka oye awike a li a valwa kuyina, omuselekadhi. Omuselekadhi ngoka okwa li wo pamwe nongundu onene yaantu ya za moshilando shoka.
13 Sho Omuwa a mono omuselekadhi ngoka, okwe mu etele ohenda e ta ti kuye: “Ino lila we.”
14 Sho a hedha popepi, okwa gumu ontala, hoka omudhimba gwa li gwa langekwa, naamboka ya li ya inda ontala oya thikama ya mwena. Opo nduno okwa ti: “Mugundjuka ngoye, otandi ku lombwele, penduka!”
15 Opo nduno omumati, ngoka a li a sa, okwa penduka e ta kuutumba nokwa tameke okupopya, na Jesus e te mu gandja kuyina.
16 Opo ihe aantu oya li ya tila noonkondo, noya tameke okuhambelela Kalunga taya ti: “Mokati ketu omwa holoka omuhunganeki omunene,” nosho wo kutya: “Kalunga okwa dhimbulukwa oshigwana she.”
17 Opo nduno ehokololo ndyoka kombinga yaJesus olya taandele muJudea ashihe nomomikunda adhihe dhopopepi.
18 Aalongwa yaJohannes oya hokololele Johannes iinima ayihe mbyoka.
19 Onkee ano Johannes okwa ithana aalongwa ye yaali e te ya tumu kOmuwa, ye ke mu pule taya ti: “Ongoye ngaa ngoka wa li wu na okuya, nenge otu na okutegelela gulwe i ili?”
20 Sho ye ya kuJesus, aalumentu mboka oya ti kuye: “Johannes Omuninginithi okwe tu tumu kungoye, tu ku pule kutya: ‘Ongoye ngaa ngoka wa li wu na okuya, nenge otu na okutegelela gulwe i ili?’”
21 Pethimbo olyo tuu ndyoka, Jesus okwa aludha aantu komikithi dhi ili nodhi ili, mwa kwatelwa ndhoka dha kwata miiti, e ta tidha mo oombepo dha nyata* maantu, nokwa tsikulula aaposi oyendji.
22 Jesus okwe ya yamukula a ti: “Indeni mu ka lombwele Johannes shoka mwa mono naashoka mwa uvu: Aaposi ngashingeyi oye wete ko, iilema otayi ende, aanashilundu otaya aludhwa, oombolo odhi uvite ko, aasi otaya yumudhwa, noohepele otadhi uvithilwa onkundana ombwanawa.
23 Ngoka itaa pundukithwa, omolwandje, ota kala a nyanyukwa.”
24 Sho aalongwa yaJohannes ya shuna, Jesus okwa tameke okulombwela oongundu dhaantu kombinga yaJohannes ta ti: “Mombuga, omwa yile mo mu ka tale shike? Enenge tali falwafalwa kombepo?
25 Omwa yile mo ano mu ka tale shike? Omulumentu a zala oonguwo dhondilo? Mboka haya zala oonguwo dhondilo ohaya kala moombala.
26 Oshike ano mwa ka talele mombuga? Mbela hamuhunganeki mwa ka talele? Eeno, ihe ngame otandi mu lombwele, ye okwa simana e vule omuhunganeki.
27 Nguka oye a li ta popiwa, sho kwa nyolwa taku ti: ‘Tala, otandi tumu omutumwa gwandje, e ku tetekele,* ngoka te ke ku longekidhila ondjila.’
28 Ngame otandi mu lombwele, mokati kaamboka ya valwa kaakiintu kamu na nando ogumwe e vule Johannes, ihe omuntu, ngoka omushuushuka mUukwaniilwa waKalunga, omunene e mu vule.”
29 (Aantu ayehe nosho wo aafendelithi, sho ya uvu oohapu ndhoka, oya popi kutya Kalunga omuyuuki, molwaashoka oya ninginithwa kuJohannes.
30 Ihe Aafarisayi nosho wo mboka ya li ye shi Ompango nawa kaya li ya hala okuvulika komayele gaKalunga, ngoka ya li taya pewa kuJohannes, oshoka kaya li ya ninginithwa kuye.)
31 “Epipi* ndino otandi li faathanitha nashike, nolya fa oolye?
32 Olya fa aanona ya kuutumba pomalandithilo taya igidha aanona ooyakwawo, taya ti: ‘Otwe mu hikile okafiloli, ihe inamu dhana. Otwe mu imbile omaimbilo goosa, ihe inamu lila.’
33 Sha faathana, Johannes Omuninginithi okwe ya itaa li oshikwiila, ye ita nu omaviinu, ihe ne omwa ti: ‘Oku niwe kondemoni.’
34 Omuna gwomuntu okwe ya ta li nota nu, ihe ne omwa ti: ‘Tala, omulumentu omufukedhi nonkolwe,* ye okuume kaafendelithi nokaalunde.’
35 Nonando ongawo, uunongo ohawu hololwa kiilonga yawo ya uka.”*
36 Gumwe gwomAafarisayi okwa kala ta hiya Jesus, a ka lye pamwe naye. Opo ano okwa yi megumbo lyOmufarisayi e ta kuutumba poshililo* a endeka.
37 Ihe tala, sho omukiintu gumwe, ngoka a tseyika moshilando kutya omulunde, a uvu kutya Jesus oku li megumbo lyOmufarisayi ngoka ta li,* okwa yi ko nohanga yomagadhi ga nika nawa.
38 Omukiintu ngoka okwa tsu oongolo konima yaJesus poompadhi dhe ta lili e ta tameke okututika oompadhi dhaJesus nomahodhi ge, nokwe dhi theta nomafufu ge gokomutse. Shimwe ishewe, okwa hupita Jesus koompadhi e te dhi gwayeke omagadhi gezimba lya nika nawa.
39 Sho Omufarisayi, ngoka a li a hiya Jesus, e shi mono, okwa ipopile ta ti: “Omulumentu nguka ando okwa li omuhunganeki shili, ando oku shi kutya omukiintu, nguka te mu gumu, okwa tya ngiini, ano kutya omulunde.”
40 Ihe Jesus okwa ti kuye: “Simon, onda hala oku ku lombwela sha.” Simon okwa ti: “Eewa, Muhongi.”
41 “Opwa li pu na aalumentu yaali ya lya oongunga komulumentu gwontumba; gumwe okwe mu lile oongunga dhoondenari 500, namukwawo 50.
42 Sho ya li kaaye na sha sho ku dhi futa, okwe ya dhimine po ayehe nehalo ewanawa. Mbela sho to tala, oguni gwomuyo ta ka kala e mu hole unene?”
43 Opo ihe Simon okwe mu yamukula a ti: “Ondi wete kutya oye ngoka a dhiminwa po oongunga odhindji.” Jesus okwa ti kuye: “Owa yamukula mondjila.”
44 Sho a popi ngawo, okwa punguluka e ta tala komukiintu, nokwa ti kuSimon: “Omukiintu nguno owu mu wete? Sho nde ya megumbo lyoye, ino pa ndje omeya, ndi iyoge koompadhi. Ihe omukiintu nguka okwa tutike oompadhi dhandje nomahodhi ge, nokwe dhi theta nomafufu gokomutse gwe.
45 Ngoye ino hupita ndje, ihe omukiintu nguka, okuza ngaa ethimbo sho nde ya megumbo lyoye, ina etha okuhupita oompadhi dhandje.
46 Ngoye ino gwayeka omutse gwandje omagadhi, ihe omukiintu nguka okwa gwayeka oompadhi dhandje nomagadhi ga nika nawa.
47 Onkee ano omolwoshinima shika, ngame otandi ku lombwele, oondjo dhomukiintu nguka, nando nadhi kale odhindji, odha dhimwa po, oshoka oku na ohole onene. Ihe ngoka a dhiminwa po oondjo oonshona, naye oku na ohole onshona.
48 Opo ihe Jesus okwa lombwele omukiintu ngoka ta ti: “Oondjo dhoye odha dhimwa po.”
49 Aantu, mboka ya li ya kuutumba pamwe naye poshililo* ya endeka, oya tameke okulombwelathana taya ti: “Omulumentu nguka olye ano, sho ta vulu nokuli okudhima po oondjo?”
50 Ihe Jesus okwa lombwele omukiintu ngoka ta ti: “Eitaalo lyoye olye ku hupitha; inda nombili.”
Omanyolo gopevi
^ Nenge “oondemoni.”
^ Eln., “komeho goye”
^ Nenge “aantu yopethimbo ndika.”
^ Nenge “ha nu omaviinu sha pitilila.”
^ Nenge “kiizemo yawo; koyana yawo.”
^ Nenge “poshitaafula.”
^ Nenge “a kuutumba poshililo.”
^ Nenge “poshitaafula.”
