paMarkus 13:1-37
13 Sho Jesus a zi mo motempeli, gumwe gwomaalongwa ye okwa ti kuye: “Muhongi, tala omamanya nomatungo ga opala!”
2 Ihe Jesus okwa ti kuye: “Owu wete omatungo ngaka omanene, kapu na nando emanya tali ka thigwa po mpaka lya londa kekwawo inaali kumunwa po.”
3 Omanga a li a kuutumba kOndundu yOoholivi a taalela kotempeli, Petrus, Jakob, Johannes naAndreas oye mu pula ye li po oyo ayeke, taya ti:
4 “Tu lombwela kutya iinima mbika otayi ka ningwa uunake, nendhindhiliko, ndyoka tali ulike kutya iinima ayihe mbika oyi li pokuhula po, olini?”
5 Onkee ano Jesus okwa tameke oku ya lombwela ta ti: “Kotokeni mwaa pukithwe nando okomuntu.
6 Oyendji otaye ke ya medhina lyandje, taya ti: ‘Ongame Kristus,’ notaya ka pukitha oyendji.
7 Shimwe ishewe, uuna mwa uvu iita nosho wo oonkundana kombinga yiita, inamu kwatwa kuumbanda; iinima ayihe mbika oyi na okuningwa, ihe ehulilo inali ya natango;
8 “oshoka iigwana otayi ka kondjithathana, nomaukwaniilwa otaga ka ponokelathana; otaku ke ya omakakamo gevi koombinga noombinga nosho wo oondjala. Iinima mbika oyi li ongetameko lyoshitheta, sho okanona ke li pokuvalwa.
9 “Kaleni mwa kotoka, oshoka aantu otaye ke mu fala koompangu noku mu dhenga moosinagoga, notaye ke mu thikameka kiipala yaapangeli noyaakwaniilwa omolwandje, naashoka otashi ke mu pa ompito mu ya lombwele kombinga yeitaalo lyeni.
10 Shimwe ishewe, onkundana ombwanawa oyi na okuuvithilwa tango iigwana ayihe.
11 Uuna taye mu fala kaapangeli, inamu kala mu na oshimpwiyu kutya otamu ka tya ngiini, oshoka shoka tamu ka popya, otamu ke shi pewa pethimbo olyo tuu ndyoka; oshoka hane tamu ka popya, ihe ombepo ondjapuki otayi ke mu kwathela.
12 Omumwayina ota ka gandja wo mumwayina a dhipagwe, nahe ota ka gandja omwana, naanona otaya ka kala ye li ompinge naavali yawo, noku ya dhipagitha.
13 Otamu ka kala mu tondike kaantu ayehe omolwedhina lyandje, ihe ngoka ta idhidhimike sigo ehulilo ota ka hupithwa.
14 “Ihe uuna mwa mono oshinima oshitondithi, shoka tashi etitha ehanagulo, sha thikama mehala moka kaashi na okukala (omuleshi na longithe oondunge dhokuyoolola), mboka ye li muJudea naya tameke okuya ontuku koondundu.
15 Ngoka ta adhika kontala yegumbo, ina ya megumbo a ka tale mo sha;
16 naangoka ta adhika mepya, ina shuna megumbo a ka tale mo iinima, mbyoka a thiga mo, ngaashi onguwo ye yokombanda.
17 Yayee, aamwali nosho wo aakiintu, mboka taya adhika ye li momategelelo pethimbo ndyoka!
18 Kaleni tamu galikana, opo esiku ndyoka kaali ye pethimbo lyokufu;
19 oshoka pomasiku ngoka otaku ke ya uudhigu inaawu kala ko nando onale, okuza petameko, sho Kalunga a shiti uuyuni, sigo ongashingeyi, noitawu ka kala ko we.
20 Odhoshili kutya ngele Jehova omasiku ngoka ine ga fupipika, kapu na ngoka ta ka hupa. Ihe omolwaahogololwa ye mboka a hogolola, omasiku ngoka okwe ga fupipika.
21 “Ngele opu na ishewe gumwe te mu lombwele ta ti: ‘Tala, Kristus oye nguka,’ nenge: ‘Tala, oye ngwiyaka,’ inamu mu itaala;
22 oshoka otaku ke ya ookristus aafundja naahunganeki aafundja, notaya ka longa iikumithalonga, opo ya pukithe aantu, nongele otashi vulika, naahogololwa wo.
23 Onkee ano ne kaleni mwa kotoka, oshoka iinima ayihe onde yi mu lombwela komeho yethimbo.
24 “Ihe pomasiku ngoka, konima yuudhigu mboka, etango otali ka luudhikwa, omwedhi itagu ka minikila we,
25 oonyothi otadhi ka gwa ko kegulu, niikwagulu otayi ka kakama.
26 Opo nduno otaya ka mona Omuna gwomuntu te ya miikogo e na oonkondo oonene neadhimo.
27 Opo ihe ota ka tuma aayengeli notaya ka gongela aahogololwa ye koombinga ne dhevi, okuza komunkulo gwevi sigo okomunkulo gwegulu.
28 “Ilongeni kethaneko ndika lyomukwiyu: Ngele iitayi yagwo tayi hapuka, nomafo gagwo taga mbunyuka, ohamu kala mu shi kutya othinge oyi li popepi.
29 Sha faathana, nane wo uuna mu wete iinima mbika tayi ningwa, tseyeni kutya Omuna gwomuntu oku li popepi posheelo.
30 Oshili tandi mu lombwele, epipi ndika itali hulu po nando, sigo oosho iinima ayihe mbika ya gwanithwa.
31 Egulu nevi otayi hulu po, ihe oohapu dhandje kadhi na siku dhi hule po.
32 “Shi na ko nasha nesiku ndyoka, nenge notundi, kapu na ngoka e yi shi, kutya nduno aayengeli megulu, nenge Omwana, kakele kaHe.
33 Onkee ano kaleni mwa tonata nomwa kotoka, oshoka euthwathimbo kamu li shi.
34 Shoka otashi vulu okufaathanithwa nomulumentu ta yi kondje yoshilongo, nokwa thigile aapiya ye egumbo lye, nakehe gumwe okwe mu pe oshilonga she e ta lombwele omukeeleli gwoposheelo a kale a tonata.
35 Onkee ano kaleni mwa tonata, oshoka kamu shi kutya mwene gwegumbo ote ya uunake, kutya nduno okongulohi, omokati kuusiku, okoongulasha,* nenge ongula onene,
36 opo ngele okwe ya ombaadhilila, kee mu adhe mwa kotha.
37 Ihe shoka tandi shi mu lombwele, otandi shi lombwele wo aantu ayehe kutya: Kaleni mwa tonata.”
Omanyolo gopevi
^ Eln., “pethimbo ekondombolo tali igi.”
