paMarkus 14:1-72
-
Aayambi taya pangele ompangela ya dhipage Jesus (1, 2)
-
Jesus ta tilwa omagadhi ga nika nawa (3-9)
-
Judas ta gwaaleke Jesus (10, 11)
-
Opaasa yahugunina (12-21)
-
Okudhikwa po kwUulalelo wOmuwa (22-26)
-
Okwiidhimbika kwaPetrus taku hunganekwa (27-31)
-
Jesus ta galikana muGetsemane (32-42)
-
Jesus ta kwatwa po (43-52)
-
Jesus ta pangulwa mOmpangu yoPombanda yAajuda (53-65)
-
Petrus ta idhimbike Jesus (66-72)
14 Ano sho kwa li ku na omasiku gaali, oshituthi shOpaasa noshiikwiila inaayi tulwa efulika shi thike, aayambi aakuluntu naalongimpango oya li taya kongo ondunge nkene ye na okukwata po Jesus miineya, noye mu dhipage.
2 Ihe oya lombwelathana taya ti: “Inatu shi ninga pethimbo lyoshituthi, opo kaashi ete epiyagano mokati kaantu.”
3 Omanga Jesus a li muBetania ta li* megumbo lyaSimon omunashilundu, omukiintu gumwe okwe ya nohanga yomagadhi ga nika nawa gondilo, gonardelela. Opo nduno omukiintu ngoka okwa siikulula ohanga ndjoka yomagadhi, nokwa tameke oku ga tila momutse gwaJesus.
4 Ihe yamwe kaya li ye shi panda, noya lombwelathana taya ti: “Omolwashike omagadhi ga nika nawa taga hepekwa ngeyi?
5 Omagadhi ngaka ando oga landithilwe po, andola oga za iimaliwa yi thike poondenari 300 e tayi pewa oohepele.” Opo nduno oya li ya geyela omukiintu ngoka noonkondo.*
6 Ihe Jesus okwa ti: “Mu etheni. Omolwashike mwa hala okuuvitha nayi omukiintu nguka? Okwa longela ndje oshilonga oshiwanawa;
7 oshoka oohepele otamu kala nadho aluhe, notamu vulu oku dhi longela uuwanawa ethimbo kehe mwa hala, ihe ngame itamu kala mu na ndje aluhe.
8 Omukiintu nguka okwa ningi ngaashi ta vulu, sho a gwayeke olutu lwandje omagadhi ga nika nawa komeho yethimbo, opo e lu longekidhile efumviko.
9 Oshili tandi mu lombwele, kehe mpoka onkundana ombwanawa tayi ka uvithwa muuyuni awuhe, oshilonga shika a longo, otashi ka hokololwa, opo a dhimbulukiwe.”
10 Opo nduno Judas Iskariot, gumwe gwomaayapostoli 12, okwa yi kaayambi aakuluntu, opo a gandje Jesus miikaha yawo.
11 Sho ye shi uvu, oya li ya nyanyukwa, noye mu uvanekele oku mu pa iimaliwa yiisiliveli. Onkee ano okwa tameke okukonga ompito, opo a gwaaleke Jesus.
12 Mesiku lyotango lyiikwiila inaayi tulwa efulika, moka hamu yambwa eyambo lyOpaasa, aalongwa ye oye mu pula taya ti: “Openi wa hala tu ke ku longekidhile uulalelo wOpaasa?”
13 Opo nduno okwa tumu aalongwa ye yaali, nokwa ti kuyo: “Indeni moshilando, nomulumentu a humbata oshiyuma shomeya ote mu tsakaneke. Mu landuleni,
14 nongele okwa yi megumbo, lombweleni mwene gwegumbo tamu ti: ‘Muhongi ota ti: “Openi pu na ondunda yaayenda, moka tandi vulu okulila Opaasa pamwe naalongwa yandje?”’
15 Opo ihe ote mu ulukile ondunda onene yopombanda ya opalekwa nawa. Moka omo mu na oku tu longekidhila uulalelo wOpaasa.”
16 Onkee ano aalongwa oya yi moshilando shoka, noya adha ayihe yi li ngaashi Jesus e ya lombwela e taya longekidha uulalelo wOpaasa.
17 Sho kwa toko, okwe ya naayapostoli ye 12.
18 Manga ya li ya kuutumba* poshililo taya li, Jesus okwa ti: “Oshili tandi mu lombwele, gumwe gwomune, ngoka ta li pamwe nangame, ota ka gwaaleka ndje.”
19 Oya tameke okukala ya nika oluhodhi, noye mu pula koogumwe noogumwe taya ti: “Hangame ndishi?”
20 Okwa ti kuyo: “Ogumwe gwomune 12, ngoka ta elele oshita nangame metiti.
21 Omuna gwomuntu ota ka sa, ngaashi sha nyolwa kombinga ye, ihe yayee, ngoka te ke mu gwaaleka! Oshihwepo omuntu ngoka a kalele inaa valwa.”
22 Omanga ya li taya li, okwa kutha oshikwiila, ta galikana e te shi pambula, nokwe shi ya pe, ta ti: “Taambeni; oshikwiila shika otashi thaneke olutu lwandje.”
23 Okwa kutha wo oshitenga e ta galikana, nokwe shi ya pe, ayehe e taya nu mo.
24 Opo nduno okwa ti kuyo: “Omaviinu ngaka otaga thaneke ‘ombinzi yandje yehangano,’ ndjoka tayi tilwahi omolwoyendji.
25 Oshili tandi mu lombwele, itandi ka nwa we omaviinu, sigo esiku ndyoka tandi ke ga nwa omape pamwe nane mUukwaniilwa waKalunga.”
26 Hugunina, konima sho ya imbi omaimbilo gehambelelo,* oya yi kOndundu yOoholivi.
27 Opo nduno Jesus okwa ti kuyo: “Amuhe otamu ka thiga ndje po,* oshoka okwa nyolwa: ‘Otandi ka dhenga omusita, noonzi otadhi ka halakana.’
28 Ihe konima ngele nda yumudhwa, otandi ke mu tetekela kuGalilea.”
29 Ihe Petrus okwa ti kuye: “Nonando yalwe oye ku thige po, ngame itandi ku thigi po.”
30 Opo nduno Jesus okwa ti kuye: “Oshili tandi ku lombwele, uusiku mbuka wonena, manga ekondombolo inaali iga lwaali, oto ka idhimbika ndje lutatu.”
31 Ihe okwa kala owala ta ti: “Nonando otashi pula ndi se pamwe nangoye, itandi ku idhimbike nando.” Ayehe yalwe nayo oya tameke okupopya sha faathana.
32 Onkee ano oya yi kehala hali ithanwa Getsemane, nokwa lombwele aalongwa ye a ti: “Kuutumbeni mpaka, manga tandi ka galikana.”
33 Opo nduno okwa kutha Petrus, Jakob naJohannes e ta yi nayo, nokwa tameke okukala a nika oluhodhi noonkondo nokwa ziyalala.
34 Okwa ti kuyo: “Onda* nika oluhodhi noonkondo. Kaleni mpaka e tamu kala mwa tonata.”
35 Opo nduno sho a hedha ko kashona, okwa inyongamene pevi, nokwa tameke okugalikana kutya ngele otashi vulika, ina pita monkalo ndjoka,
36 nokwa ti: “Abba,* Tate, kapu na shoka tashi ku nyenge; kutha ndje oshitenga shika. Ihe hakehalo lyandje, ihe okehalo lyoye.”
37 Okwa galuka, nokwe ya adha ya kotha e ta ti kuPetrus: “Simon, oto kotha? Owa nyengwa okukala wa tonata uule owala wowili yimwe?
38 Kaleni mwa tonata nokugalikana aluhe, opo kaamu iyethele momamakelo. Odhoshili kutya ombepo oya hala,* ihe onyama onkundi.”
39 Opo nduno okwa yi ishewe a ka galikane, ta tumbula oohapu dha faathana.
40 Sho a galuka, natango okwe ya adha ya kotha, oshoka oya li ya sa oomposi noonkondo. Onkee ano kaya li ye shi kutya naye mu yamukule ngiini.
41 Opo nduno okwa galuka ishewe oshikando oshititatu e ta ti kuyo: “Omwa kotha natango, notamu vululukwa pethimbo ngaandika? Osha gwana! Ethimbo olya thika! Taleni, Omuna gwomuntu ota gandjwa miikaha yaalunde.
42 Thikameni tu yeni. Taleni, omugwaaleki gwandje oku li pokuthika.”
43 Nziya, manga a li ta popi, Judas, gumwe gwomaayapostoli 12, okwe ya pamwe nongundu onene yaantu yi na omagongamwele noondhimbo, ya tumwa kaayambi aakuluntu, kaalongimpango nokaakuluntu yoshigwana.
44 Omugwaaleki gwe okwa li e ya tsu onyala,* ta ti: “Ngoka tandi hupita oye tamu kongo; mu kwatii po; indeni naye; inamu mu etha.”
45 Opo nduno okwa yi a ukilila kuye e ta ti: “Muhongi,”* nokwe mu hupita.
46 Onkee ano oye mu kwata po.
47 Ihe gumwe gwomwaamboka ya li ya thikama puJesus okwa pweya mo egongamwele lye e ta umpile omupiya gwomuyambi omunene, nokwa tete ko okutsi kwe.
48 Ihe Jesus okwa ti kuyo: “Omwe ya okukwata ndje po mu na omagongamwele noondhimbo mwa fa mwe ya okukwata po omuyugi?
49 Esiku nesiku onda li handi kala nane motempeli tandi longo aantu, ihe inamu kwata ndje po. Ihe shika osha ningwa, opo Omanyolo ga gwanithwe po.”
50 Opo nduno aalongwa ayehe oye mu thigi po noya yi ontuku.
51 Ihe omulumentu gumwe omugundjuka, a idhingila owala elapi lyoliina, okwa ende a landula Jesus e li popepi, noya kambadhala oku mu kwata po,
52 ihe okwa thigi po elapi lye nokwa yi ontuku e li olutu lwowala.*
53 Opo nduno oya fala Jesus komuyambi omunene, naayambi aakuluntu ayehe, aakuluntu yoshigwana nosho wo aalongimpango oya gongala.
54 Ihe Petrus okwa landula Jesus e li konima kokule, sigo omehale lyomuyambi omunene, nokwa kuutumba pamwe naapiya yomegumbo ta huhulukwa pomulilo.
55 Opo nduno aayambi aakuluntu nOmpangu ayihe yopombanda yAajuda oya tsu aantu omaminimini,* opo ya vule oku mu dhipaga, ihe ina monika ondjo yasha.
56 Oyendji oya li nokuli taya popi iifundja kombinga ye, ihe oohapu dhawo kadha li tadhi tsu kumwe.
57 Shimwe ishewe, yamwe oya li ya thikama e taya popi iifundja kombinga ye, taya ti:
58 “Otwe mu uvu ta ti, ‘Otandi kumuna po otempeli ndjika ya tungwa niikaha, nomuule womasiku gatatu, otandi tungu yimwe inaayi tungwa niikaha.’”
59 Ihe nonando ongawo, nayo oohapu dhawo kadha li tadhi tsu kumwe.
60 Opo nduno omuyambi omunene okwa thikama mokati kawo e ta pula Jesus ta ti: “Ito ti ko sha kwaashoka aalumentu mbaka taya ti?”
61 Ihe Jesus okwa kala owala a mwena, noina tya sha nando. Natango omuyambi omunene okwa tameke oku mu pula ta ti: “Ongoye Kristus, Omuna gwaKalunga Omukombandambanda?”
62 Opo nduno Jesus okwa ti: “Ongame; notamu ka mona Omuna gwomuntu a kuutumba kolulyo lwaKalunga Omunankondo, note ya e li miikogo yokegulu.”
63 Opo ihe omuyambi omunene okwa tuula onguwo ye, nokwa ti: “Uumbangi ishewe wuni twa pumbwa?
64 Omwe dhi uvu ne yene, sho ta sheke Kalunga. Omwa tokola okuninga po shike?”* Ayehe oya ti kutya okwa gwana okudhipagwa.
65 Opo nduno yamwe oya tameke oku mu hiyila omayeye, noku mu siikila koshipala e taye mu dhenge noongonyo taya ti: “Tu lombwela!”* Opo ihe oye mu dhenge nomankawa moshipala, aapiya yomompangu e taye mu kutha po.
66 Omanga Petrus a li a kuutumba mehale, okakadhona kamwe okapiya komuyambi omunene oke ya po.
67 Sho ka mono Petrus ta huhulukwa, oke mu tala ke mu ukilila, noka ti kuye: “Nangoye wo owa li pamwe naJesus Omunasareti.”
68 Ihe Petrus okwe shi ipatana ta ti: “Omulumentu ngoka kandi mu shi, nokandi shi kutya oto popi kombinga yashike.” Opo nduno okwa yi ta ende momukala a uka pondje.
69 Sho e li hoka, okakadhona okapiya oke mu mono ishewe, noka tameke okulombwela mboka ya thikama popepi, taka ti: “Omulumentu nguka ogumwe gwomuyo.”
70 Natango okwe shi ipatana, nokonima yokathimbo, mboka ya li ya thikama popepi oya tameke okulombwela Petrus taya ti: “Odhoshili kutya nangoye ogumwe gwomuyo, oshoka oto ulike kutya ngoye Omugalilea.”
71 Ihe okwa tameke okwiithinga ye mwene nokugana ta ti: “Omulumentu ngoka tamu popi kandi mu shi!”
72 Nziya, ekondombolo olya igi oshikando oshitiyali, na Petrus okwa dhimbulukwa oohapu, ndhoka Jesus e mu lombwelele, sho a ti: “Manga ekondombolo inaali iga lwaali, oto ka idhimbika ndje lutatu.” Opo nduno okwa nika oluhodhi noonkondo e ta tameke okulila.
Omanyolo gopevi
^ Nenge “e li poshililo.”
^ Nenge “oya popi naye ya geya; oye mu nyenyetele.”
^ Nenge “ya kuutumba ya endeka.”
^ Nenge “omapisalomi.”
^ Eln., “otamu ka pundukithwa shi na ko nasha nangame.”
^ Nenge “Omwenyo gwandje ogwa.”
^ Oshitya shOshihebeli, nenge shOshiaramea shoka tashi ti, “Tate.”
^ Nenge “oya halelela.”
^ Nenge “okwe ya pe endhindhiliko.”
^ Nenge “Rabbi.”
^ Nenge “e li owala mokambulukweya kokohi.”
^ Nenge “oya kongo aantu ya lundile Jesus.”
^ Nenge “Otamu ti ngiini?”
^ Nenge “Hunganeka!”
