paMarkus 3:1-35
3 Natango okwa yi mosinagoga, nomwa li mu na omulumentu e na oshikaha sha sa.
2 Onkee ano Aafarisayi oya kala taye mu konenene, ya tale ngele ota aludha omulumentu ngoka mesiku lyEsabati, opo ya vule oku mu tamaneka.
3 Opo nduno okwa lombwele omulumentu ngoka e na oshikaha sha sa, a ti: “Thikama e to ya pokati mpaka.”
4 Opo ihe Jesus okwe ya pula a ti: “Oshike sha pitikwa pampango okulongwa mEsabati? Okulonga uuwanawa, nenge okulonga uuwinayi? Okuhupitha omwenyo, nenge okudhipaga?” Ihe oya kala owala ya mwena.
5 Konima sho e ya tala a geya nokwa nika oluhodhi noonkondo omolwuukukutu womitima dhawo, okwa ti komulumentu ngoka: “Ukililitha oshikaha shoye.” Sho e shi ukililitha, osha aluka.
6 Opo nduno Aafarisayi oya zi mo, noya tameke nziya okupangela ompangela pamwe naayambidhidhi yaHerodes, opo ya dhipage Jesus.
7 Ihe sho Jesus pamwe naalongwa ye ya li taya yi kefuta, ongundu onene yaantu, ya za kuGalilea nosho wo kuJudea, oye mu landula,
8 nayamwe nokuli ya za kuJerusalem, kuIdumea, kiitopolwa yokuuzilo waJordan, kuTiro nosho wo kuSidon. Aantu oyendji oye ya kuye, sho ya uvu kombinga yiinima oyindji mbyoka a li ta longo.
9 Opo ihe Jesus okwa lombwele aalongwa ye, ye mu longekidhile okawato okashona, opo kaa thininikwe kongundu yaantu.
10 Molwaashoka okwa li a aludha oyendji, ayehe mboka ya li ye na omikithi dha kwata miiti oya li ye mu ngundumanena, ya hala oku mu guma.
11 Nokuli uuna aantu mboka ye na oombepo dha nyata* ye mu mono, oya li haye mu tsile oongolo taya igidha taya ti: “Ongoye Omuna gwaKalunga!”
12 Ihe iikando oyindji, okwe ya londodha kaaya lombwele nando omuntu kombinga ye.
13 Okuza mpono okwa londo kondundu nokwa hogolola mboka a hala e taye mu landula.
14 Opo nduno okwa hogolola* aalumentu 12, nokwe ya luku aayapostoli. Aalumentu mboka oya li taya ka kala haya ende naye, nokwa li te ke ya tuma ya ka uvithe,
15 noku ya pa oonkondo dhokutidha mo oondemoni.
16 Aayapostoli 12, mboka a hogolola,* oyo mbaka: Simon, ngoka e mu luku wo Petrus,
17 Jakob omuna gwaSebedeus, nomumwayina Johannes (mboka a luku wo Boanerges, ndyoka tali ti, “Oyana yOmundundumo”),
18 Andreas, Filippus, Bartolomeus, Mateus, Tomas, Jakob omuna gwaAlfeus, Taddeus, Simon Omukaanan*
19 nosho wo Judas Iskariot, ngoka konima yethimbo e ke mu gwaaleka.
Opo nduno Jesus okwa yi megumbo limwe,
20 naantu oyendji oye mu gongalele ishewe, onkene Jesus naalongwa ye inaya mona we ompito yokulya.
21 Ihe sho aakwanezimo ye ye shi uvu, oya yi ko ye ke mu tale ko, oshoka oya li taya ti: “Ota yi oonkwengu.”
22 Shimwe ishewe, aalongimpango, mboka ya za kuJerusalem oya li taya ti: “Oku na Belsebul,* noondemoni ohe dhi tidha mo koonkondo dhomupangeli gwoondemoni.”
23 Konima sho e ya ithana kuye, okwa popi nayo ta longitha omathaneko ta ti: “Satana ota vulu ngiini okutidha mo Satana?
24 Ngele uukwaniilwa owa ipilukile po, nena uukwaniilwa mboka itawu kala po;
25 nongele egumbo olya topoka, egumbo ndyoka itali kala po.
26 Sha faathana, ngele Satana okwa ipilukile po nokwiikondjitha ye mwene, ita vulu okukala po, ihe ota hulu po.
27 Nokuli kapu na ngoka ha yi megumbo lyomulumentu omunankondo e ta yaka mo omaliko ge, okuninga te mu manga tango. Okonima owala ngele e mu manga, ta vulu oku mu yuga omaliko ge.
28 Oshili tandi mu lombwele, aantu otaya dhiminwa po eyono kehe nesheko kehe.
29 Ihe kehe ngoka ta sheke ombepo ondjapuki ita dhiminwa po nandonando, ihe ota kala e na ondjo sigo aluhe.”
30 Jesus okwa popi ngawo, oshoka oya li taye mu ula taya ti: “Oku na ombepo ya nyata.”*
31 Opo nduno yina yaJesus naamwayinamati oye ya e taya thikama pondje, noya tumu gumwe e ke mu ithane.
32 Opo ihe yamwe yomongundu, ndjoka ya li ya kuutumba ye mu ngundumanena, oya ti kuye: “Tala, nyoko naamwanyoko oye li pondje taye ku pula.”
33 Ihe okwe ya yamukula ta ti: “Meme olye, naamwamememati oolye?”
34 Opo ihe okwa tala kwaamboka ya kuutumba ye mu ngundumanena, nokwa ti: “Tala, meme naamwamememati oyo mbaka!
35 Kehe ngoka ha longo ehalo lyaKalunga oye omumwamememati, omumwamemekadhona nameme.”
Omanyolo gopevi
^ Nenge “oondemoni.”
^ Nenge “a langeke po.”
^ Nenge “a langeka po.”
^ Nenge “omulaadhi.”
^ Edhina ndyoka Satana ha ithanwa.
^ Nenge “ondemoni.”
