paMarkus 5:1-43
5 Opo ihe oya yi handiyaka yefuta koshitopolwa shAagerasa.
2 Nziya, konima sho Jesus a zi mowato, omulumentu, e na ombepo ya nyata* ta zi poombila,* okwe mu tsakaneke.
3 Omulumentu ngoka okwa li ha kala poombila, nokapu na nando ogumwe a li a vulu oku mu manga e ta kala inaa itokola mo, nokuli nando okwa mangwa nelyenge.
4 Olundji okwa li ha mangwa nomalyenge komaako nokomagulu, ihe okwa li ha itokola mo, nokapu na ngoka a li ha vulu oku mu pondola.
5 Aluhe omutenya nuusiku, okwa li ha igidha mokule e li koombila nokoondundu nokwa li ha itetagula nomamanya.
6 Ihe sho a mono Jesus okuza kokule, okwa matuka e te mu tsile oongolo.
7 Opo ihe okwa igidha mokule ta ti: “Owa halela ndje shike, Jesus, Omuna gwaKalunga Omukombandambanda? Otandi ku ganitha kuKalunga kuu hepeke ndje.”
8 Okwa popi ngawo, molwaashoka Jesus okwa kala ta lombwele ondemoni, ndjoka yi li muye, ta ti: “Mbepo ngoye ya nyata, za mo momulumentu nguka.”
9 Ihe Jesus okwe mu pula a ti: “Ongoye lye?” Okwe mu yamukula a ti: “Ongame ongundu onene, oshoka otu li oyendji.”
10 Omulumentu ngoka okwa kala ta indile Jesus kaa tidhe mo oombepo dha nyata moshilongo.
11 Pethimbo mpoka, popepi nayo opwa li pu na oshigunda oshinene shiingulu tayi li kondundu.
12 Onkee ano oombepo dha nyata odhe mu hehela dha ti: “Tu pitika tu ye miingulu.”
13 Opo nduno okwe dhi pitike dhi ye mo. Oombepo dha nyata* odha zi mo e tadhi yi miingulu, noshigunda ashihe shiingulu yi li 2 000 lwaampono, osha kolokele mefuta okuza koontuni, e tayi sile mo.
14 Ihe aasita yiingulu oya fadhuka po ya uka moshilando nomomikunda, noye shi hokololele aantu. Opo ihe aantu oye ya ya tale shoka sha ningwa po.
15 Onkee ano aantu oye ya kuJesus, noya mono omulumentu, ngoka a li e niwe koondemoni, a kuutumba a zala noku li nawa, noya li ya tila noonkondo.
16 Shimwe ishewe, mboka ya mono shoka sha ningwa po oye ya hokololele shoka sha ningilwa omulumentu, ngoka a li e na oondemoni, nokombinga yiingulu.
17 Onkee ano oya tameke okwiindila Jesus a ze mo moshitopolwa shawo.
18 Manga Jesus ta londo mowato, omulumentu, ngoka a li e niwe koondemoni, okwe mu hehela a ye naye.
19 Ihe Jesus ine mu pitika. Pehala lyaashono, okwe mu lombwele a ti: “Inda kegumbo kaakwanezimo yoye e to ya hokololele iinima ayihe, mbyoka Jehova e ku ningila, naasho e ku sile ohenda.”
20 Omulumentu ngoka okwa yi, nokwa tameke okuhokololela aantu muDekapolis,* ashihe shoka Jesus e mu ningila, naantu ayehe oya li ya kumwa.
21 Konima sho Jesus a shuna ishewe handiyaka yefuta e ta kala popepi nomunkulofuta, ongundu yaantu oye mu ngundumanene.
22 Gumwe gwomaakuluntu yosinagoga, gwedhina Jairus, okwe ya kuJesus, naasho e mu mono okwa tsu oongolo poompadhi dhe.
23 Okwe mu hehela lwiikando oyindji ta ti: “Okamwandjekadhona otaka ehama noonkondo.* Kwathela ndje wu ye wu ka tenteke iikaha yoye, opo ka aluke noka kale nomwenyo.”
24 Opo ihe Jesus okwa yi pamwe naye, nongundu onene yaantu oye mu landula, noya li tayi ithininike muye.
25 Pethimbo mpoka opwa li pu na omukiintu, ngoka a kala e na uuvu wetiko lyombinzi uule womimvo 12.
26 Omukiintu ngono okwa kala ta mono iihuna noonkondo, sho a kala ta kongo epango kaapangi yi ili noyi ili, noku ya futa ashihe shoka a li e na, ihe ina tya po hwepo. Pehala lyaashono, onkalo ye oya nayipala owala.
27 Sho a uvu kombinga yaJesus, okwe ya e li mokati kongundu yaantu e te mu ziilile konima, nokwa gumu oonyemba dhonguwo ye yokombanda,
28 oshoka okwa kala ta ipopile ta ti: “Shampa owala nda gumu onguwo ye yokombanda, otandi aluka.”
29 Nziya, etiko lye lyombinzi olya kodha nokwa uvu molutu lwe kutya okwa aluka kuuvu, mboka wa kala tawu mu hepeke noonkondo.
30 Opo nduno Jesus okwa dhimbulula nziya kutya molutu lwe omwa za oonkondo, nokwa piluka e ta tala kongundu yaantu, ndjoka ya li konima ye, e ta pula ta ti: “Olye a gumu onguwo yandje yokombanda?”
31 Ihe aalongwa ye oya ti kuye: “Owu wete kutya ongundu yaantu otayi ithininike mungoye, ihe oto pula to ti: ‘Olye a gumu ndje?’”
32 Ihe natango okwa li ta lengalenga a tale kutya olye e mu gumu.
33 Ihe omukiintu ngoka okwa li a tila ta kakama, sho a mono kutya oshike she mu ningilwa, nokwa yi kuye, te mu tsile oongolo e te mu lombwele oshili ayihe.
34 Jesus okwa ti kuye: “Mumwandjekadhona, eitaalo lyoye olye ku aludha. Inda nombili; aluka kuuvu woye mboka wa kala tawu ku hepeke noonkondo.”
35 Manga a li ta popi, aalumentu yamwe ya za kegumbo lyomukuluntu gwosinagoga oye ya e taya ti: “Okamwoyekadhona oka sa, oto monithile we shike Muhongi iihuna?”
36 Ihe Jesus okwa uvu shoka taya popi, nokwa lombwele omukuluntu gwosinagoga ta ti: “Ino tila, kala owala wu na eitaalo.”
37 Okuza mpoka, Jesus ina pitika nando ogumwe a ye pamwe naye, kakele kaPetrus, Jakob naJohannes omumwayina gwaJakob.
38 Sho e ya kegumbo lyomukuluntu gwosinagoga, okwa mono aantu ya lyalyakana taya lili notaya hekumuna mokule.
39 Konima sho a yi megumbo, okwa ti kuyo: “Omolwashike tamu lili nomwa lyalyakana? Okanona inaka sa, ihe oka kotha.”
40 Opo ihe oya tameke oku mu yola ye mu sa uunye. Ihe konima sho a lombwele ayehe ya ye pondje, okwa kutha he nayina yokanona naamboka ya li naye, noya yi moka mwa li okanona.
41 Opo nduno okwa kwata oshikaha shokanona e ta ti kuko: “Talita kuum,” shoka tashi ti: “Kakadhona, otandi ku lombwele, penduka!”
42 Nziya, okakadhona oka penduka noka tameke okweenda. (Oka li ke na omimvo 12.) Opo ihe aavali yako oya li ya nyanyukwa noonkondo kwaashoka sha ningwa po.
43 Ihe okwe ya lombwele lwiikando niikando oshinima shoka kaaye shi lombwele nando omuntu, nokwe ya lombwele ye ka pe okulya.
Omanyolo gopevi
^ Nenge “ondemoni.”
^ Nenge “poombiladhimbuluko.”
^ Nenge “oondemoni.”
^ Nenge “mOshitopolwa shIilando Omulongo.”
^ Nenge “oke li pokusa.”
