PaMateus 10:1-42
10 Onkee ano Jesus okwa ithana aalongwa ye 12 e te ya pe oonkondo dhokusinda oombepo dha nyata, opo ya vule oku dhi tidha mo noya aludhe omikithi nuunkundi kehe.
2 Omadhina gaayapostoli 12 ogo ngaka: Simon, ngoka ha ithanwa Petrus, nomumwayina Andreas; Jakob, omwana gwaSebedeus, nomumwayina Johannes;
3 Filippus naBartolomeus; Tomas naMateus, omufendelithi; Jakob, omwana gwaAlfeus; Taddeus;
4 Simon, Omukaanan,* naJudas Iskariot, ngoka lwanima a ka gwaaleka Jesus.
5 Sho Jesus a tumu aayapostoli ye 12, okwe ya pe omalombwelo ngaka: “Inamu ya kaantu yomiigwana yilwe, noinamu ya nando omoshilando shimwe shomuSamaria,
6 ihe pehala lyaashono, tsikileni okuya koonzi ndhoka dha kana dhomegumbo lyaIsraeli.
7 Sho tamu yi, uvitheni tamu ti: ‘Uukwaniilwa womegulu owa hedha popepi.’
8 Aludheni aavu, yumudheni aasi, yelitheni aanashilundu, tidhii mo oondemoni. Omwa pewa omagano*, gandjeni wo omagano.
9 Inamu ya niimaliwa yoshingoli, yoshisiliveli nenge yongopolo,
10 nenge nompunda yiikulya yomolweendo, nenge oonguwo mbali, nenge oongaku, nenge ondhimbo, oshoka omulongi okwi ilongela okupewa iikulya ye.
11 “Ngele omwa thiki moshilando nenge momukunda gwontumba, kongii mo ngoka e na ehalo lyoku mu taamba e tamu kala moka, sigo tamu zi mo.
12 Uuna tamu yi megumbo, kundeni aanegumbo.
13 Ngele megumbo moka omwa taambiwa mo, ombili yeni nayi kale mo; ihe ngele inamu taambiwa mo, ombili yeni nayi mu galukile.
14 Ngele kapu na ngoka te mu taamba, nenge ta pulakene koohapu dheni, zii mo megumbo ndyoka, nenge moshilando shoka e tamu ipupula ontsi koompadhi dheni.
15 Oshili tandi mu lombwele, egeelo lyoshilando shoka mEsiku lyEpangulo otali ka kala enene li vulithe lyaSodom naGomorra.
16 “Taleni, ngame otandi mu tumu ongoonzi mokati komambungu;* kaleni ano mwa kotoka ongomayoka nokaamu na oshipo sha sha ongoonguti.
17 Kaleni mwa kotoka, oshoka aantu otaye ke mu fala koompangu, notaye ke mu dhenga noongola moosinagoga dhawo.
18 Otamu ka falwa kiipala yaapangeli noyaakwaniilwa omolwandje, shi ninge uumbangi kuyo nokiigwana.
19 Nonando ongawo, uuna taye mu fala kaapangeli, inamu kala mu na oshimpwiyu kutya otamu ka tya ngiini, nenge shike, oshoka shoka tamu ka popya otamu ke shi pewa pethimbo olyo tuu ndyoka;
20 oshoka hane owala tamu ka popya, ihe ombepo yaHo yeni oyo tayi ke mu kwathela mu popye.
21 Shimwe ishewe, omumwayina ota ka gandja mumwayina a dhipagwe, nahe ota ka gandja omwana, naanona otaya ka kala ye li ompinge naavali yawo, noku ya dhipagitha.
22 Otamu ka kala mu tondike kaantu ayehe omolwedhina lyandje, ihe ngoka ta idhidhimike sigo ehulilo, ota ka hupithwa.
23 Ngele otaye mu hepeke moshilando shimwe, indeni ontuku kushilwe, oshoka ngame otandi mu lombwele oshili kutya itamu mana okuuvithila iilando ayihe yomuIsraeli, sigo Omuna gwomuntu te ya.
24 “Omulongwa ke vule omulongi gwe, nomupika ke vule mwene gwe.
25 Osha opala ngele omulongwa ta kala ngaashi omulongi gwe, nomupika ngele ta kala ngaashi mwene gwe. Ngele aantu ohaya ithana mwene gwegumbo Belsebul,* nena naanegumbo lye osho taye ke ya ithana.
26 Onkee inamu ya tila, oshoka kapu na shoka sha siikilwa itaashi ke ya puuyelele, nokapu na shoka sha holekwa itaashi ka tseyika.
27 Shoka tandi mu lombwele momilema, shi hokololeni muuyelele, naashono tamu uvu tashi nongonwa, shi uvitheni okuza koontala dhomagumbo.
28 Noinamu tila mboka taya vulu okudhipaga olutu, ihe itaya vulu oku mu imba mu ka kale ishewe nomwenyo monakuyiwa. Pehala lyaashono, tileni ngoka ta vulu okuhanagula po ayihe, omwenyo nosho wo olutu muGehenna.*
29 Mbela omanza gaali ihaga landwa owala nokapeni kamwe akeke?* Ihe kapu na nando olimwe lyomugo tali gwile pevi, Ho yeni kee shi shi.
30 Nokuli nomafufu geni agehe gokomutse oga yalulwa.
31 Onkee inamu tila, ne omwa simana unene mu vule omanza ogendji.
32 “Kehe ngoka ta hempulula ndje montaneho yaantu, nangame otandi ke mu hempulula wo montaneho yaTate, ngoka e li megulu.
33 Ihe kehe ngoka ta idhimbike ndje paantu, otandi ke mu idhimbika wo puTate, ngoka e li megulu.
34 Inamu dhiladhila kutya onde ya okweeta ombili kombanda yevi; inandi ya okweeta ombili, ihe egongamwele.
35 Oshoka onde ya okutopola omulumentu nahe, omukadhona nayina, noshitenya shomukadhona nayinamweno.
36 Odhoshili kutya aanegumbo yomuntu oyo taya ningi aatondi ye.
37 Kehe ngoka e hole unene he, nenge yina, shi vulithe pungame, ina opalela ndje, nakehe ngoka e hole unene omwanamati, nenge omwanakadhona, shi vulithe pungame, ina opalela ndje.
38 Nakehe ngoka itaa kutha omuti gwe gwomahepeko* e ta landula ndje, ina opalela ndje.
39 Kehe ngoka ta kambadhala okuhupitha omwenyo gwe, ote ke gu kanitha, nakehe ngoka ta kanitha omwenyo gwe omolwandje, ote ke gu mona.
40 “Kehe ngoka te mu taamba, okwa taamba ndje ko wo, nakehe ngoka ta taamba ndje, okwa taamba ko wo Ngoka a tuma ndje.
41 Kehe ngoka ta taamba ko omuhunganeki, molwaashoka e li omuhunganeki, ota ka mona ondjambi yomuhunganeki, nakehe ngoka ta taamba ko omulumentu omuyuuki, molwaashoka e li omulumentu omuyuuki, ota ka mona ondjambi yomulumentu omuyuuki.
42 Kehe ngoka ta pe gumwe gwomwaambaka aashona nando oshitenga owala shomeya omatalala, molwaashoka e li omulongwa, oshili tandi mu lombwele, ita kala inaa pewa ondjambi ye.”
Omanyolo gopevi
^ Nenge “omulaadhi.”
^ nenge “oshali.”
^ oludhi lwoombwa dhomiihwa, ihe oohahu.
^ Edhina ndyoka Satana ha ithanwa; omupangeli gwoondemoni.
^ Tala omafatululo giitya.
^ Nenge “no-assarion.”
^ Tala omafatululo giitya.
