PaMateus 19:1-30
19 Sho Jesus a mana okupopya oohapu ndhoka, okwa zi mo muGalilea e ta yi koongamba dhaJudea, handiyaka yaJordan.
2 Ongundu yaantu oye mu landulile ko wo, nokwa aludha ayehe mboka ya li taya ehama.
3 Opo nduno Aafarisayi oye ya kuye nelalakano lyoku mu makela, noye mu pula taya ti: “Mbela osha pitikwa ngaa pampango, omulumentu a teye ondjokana nomukulukadhi gwe, omolwoshinima kehe?”
4 Okwe ya yamukula a ti: “Inamu lesha nani kutya ngoka e ya shiti petameko okwe ya shiti omulumentu nomukiintu
5 e ta ti: ‘Nomolwoshinima shoka, omulumentu oku na okuthiga po he nayina e ta imanga kumwe nomukulukadhi gwe, oyo notaya ningi omuntu gumwe?’*
6 Ano kaye li we yaali, ihe omuntu gumwe. Onkee ano shoka Kalunga a tula kumwe, inashi kuthwa kumwe nando okomuntu.”
7 Aafarisayi oye mu pula ya ti: “Omolwashike nduno Moses a gandja elombwelo, omukulukadhi a pewe onzapo yeteyondjokana, uuna omusamane a teya ondjokana?”
8 Jesus okwa ti kuyo: “Moses okwa pitike mu teye ondjokana naakulukadhi yeni, omolwokwaavulika* kweni, ihe hasho sha kala ngaaka okuza petameko.
9 Ngame otandi mu lombwele, kehe ngoka ta teya ondjokana nomukulukadhi gwe omolwoshinima shilwe kaashi shi omilalo dha nyata* e ta hokana gulwe, ota hondele.”
10 Aalongwa oya ti kuye: “Ngele ondjokana pokati komulumentu nomukulukadhi gwe osho yi li ngawo, nena oshi li hwepo omuntu kaa hokane.”
11 Okwa ti kuyo: “Haayehe taye shi vulu, ihe oomboka owala ye na omagano* goku shi ninga.
12 Oshoka oku na mboka ya valwa ye li aaikaleli, naamboka ya ningwa aathonwantu kaantu, nopu na wo aaikaleli mboka yi ininga aaikaleli yo yene, omolwUukwaniilwa womegulu. Ngoka te shi vulu, ne shi ninge.
13 Opo nduno kuye okwe etwa aanona, e ya tenteke iikaha* noku ya galikanene, ihe aalongwa oye ya keelele.
14 Ihe Jesus okwa ti kuyo: “Etheni aanona ye ye kungame; inamu ya keelela ko, oshoka Uukwaniilwa womegulu owaamboka we ya fa.”
15 Oye nokwe ya tenteke iikaha ye nokwa zi po mpoka.
16 Opo nduno omulumentu gumwe okwe ya kuye e te mu pula ta ti: “Muhongi, ondi na okulonga shike oshiwanawa, opo ndi mone omwenyo gwaaluhe?”
17 Jesus okwa ti kuye: “Omolwashike to pula ndje kutya oshike oshiwanawa? Oku na owala gumwe awike, ngoka omwaanawa.* Onkee ano ngele owa hala oku ka mona omwenyo, tsikila okuvulika kiipango yaKalunga.”
18 Okwe mu pula a ti: “Oyinipo?” Jesus okwe mu yamukula a ti: “Oyo: Ino dhipaga, ino hondela, ino yaka, ino fundja,
19 simaneka ho nanyoko, nokukala wu hole mukweni, ngaashi wu ihole mwene.”
20 Omulumentu omugundjuka okwa ti kuye: “Ayihe mbyoka ohandi vulika kuyo; oshike ishewe ndi na okuninga?”
21 Jesus okwa ti kuye: “Ngele owa hala wu kale wa gwana wa pwa, inda wu ka landithe po omaliko goye agehe, iimaliwa e to yi pe oohepele. Kungawo, oto kala wu na eliko megulu, opo nduno to ya wu landule ndje.”
22 Sho omulumentu omugundjuka a uvu oohapu ndhoka, okwa zi po a nika oluhodhi, oshoka okwa li e na omaliko ogendji noonkondo.
23 Opo nduno Jesus okwa lombwele aalongwa ye, a ti: “Oshili tandi mu lombwele, oshidhigu komuyamba a ye mo mUukwaniilwa womegulu.
24 Otandi mu lombwele ishewe kutya oshipu kongamelo yi pite meyulu lyonane, shi vulithe omulumentu omuyamba a ye mUukwaniilwa waKalunga.”
25 Sho aalongwa ye shi uvu, oya li ya kumwa noonkondo, noya ti: “Olye ano nduno ta vulu okuhupithwa?”
26 Jesus okwe ya tala e ta ti kuyo: “Pataloko lyopantu, itashi wapa, ihe kapu na shoka tashi nyenge Kalunga.”
27 Opo nduno Petrus okwe mu pula ta ti: “Otwa thiga po iinima ayihe e tatu ku landula; mbela oshike tatu ka mona?”
28 Jesus okwa ti kuyo: “Oshili tandi mu lombwele, sho ayihe tayi ka ningwa iipe, nuuna Omuna gwomuntu ta ka kuutumba koshipangelapundi she oshiyapuki, ne mboka mwa kala nokulandula ndje, otamu ka kuutumba kiipangelapundi 12, mu pangule omazimo 12 gaIsraeli;
29 nakehe ngoka ta thigi po egumbo lye, nenge aamwayinamati, nenge aamwayinakadhona, nenge he, nenge yina, nenge oyana, nenge epya omolwandje, iinima mbyoka ote ke yi mona lwethele, nota ka mona omwenyo gwaaluhe.
30 “Ihe oyendji mboka aatango otaya ka ninga aahugunini, naamboka aahugunini otaya ka ninga aatango.
Omanyolo gopevi
^ Nenge “ontumba yimwe.”
^ Nenge “omolwuukukutu womitima dheni.”
^ MOshigreka “porneia.” Tala omafatululo giitya.
^ Sha hala okutya omagano gokukala inoo hokana, nenge inoo hokanwa.
^ Nenge “e ya yambeke.”
^ Nenge “Kalunga oye awike ta vulu okuutha shoka oshiwanawa.”
