PaMateus 2:1-23
2 Konima sho Jesus a valelwa muBetlehem shomuJudea, pethimbo omukwaniilwa Herodes ta pangele, aayanekeli yoonyothi ya za kUuzilo, oye ya kuJerusalem
2 e taya ti: “Omukwaniilwa gwAajuda ngoka opo a valwa oku li peni? Otwa mono onyothi ye, sho tu li kUuzilo, notwe ya oku mu inyongamena.”
3 Sho omukwaniilwa Herodes e shi uvu, okwa haluka noonkondo nosho wo Jerusalem ashihe.
4 Opo ihe okwa ithana aayambi aakuluntu naalongimpango ayehe e te ya pula mpoka Kristus* ta ka valelwa.
5 Oye mu yamukula ya ti: “OmuBetlehem shaJudea, ngaashi sha hunganekwa komuhunganeki, ngoka a ti:
6 ‘Ngoye Betlehem shomevi lyaJuda, nonando ongoye oshilando oshishonashona mokati kiilando yaaleli yaJuda, omungoye tamu ka za omupangeli, ngoka ta ka wilika oshigwana shandje, Israeli.’”
7 Opo ihe Herodes okwa ithana aayanekeli yoonyothi meholamo e te ya pula kutya onyothi oya holoka lela ethimbo peni?
8 Sho e ya tumu kuBetlehem, okwe ya lombwele ta ti: “Indeni mu ka konge okanona hoka neitulomo, nongele omwe ka mono, ileni mu lombwele ndje, opo nangame ndi ye ko, ndi ke ka inyongamene.”
9 Konima sho omukwaniilwa e ya lombwele, oya yi, nonyothi ndjoka ya li ya mono sho ya li kUuzilo, oye ya tetekele sigo ya kankama mpoka okanona ka li.
10 Sho ya mono onyothi ndjoka, oya li ya nyanyukwa noonkondo.
11 Sho ya yi megumbo, oya mono okanona ke li nayina Maria, noya tsu oongolo e taye ka inyongamene. Oya kutha omagano ngoka ya etelela, ngaashi oshingoli, eka lya nika nawa nosho wo omugwayo gwa nika nawa* e taye ga pe okanona.
12 Ihe molwaashoka Kalunga okwa li e ya londodha mondjodhi kaaya shune kuHerodes, oya yi nondjila yilwe koshilongo shawo.
13 Konima sho ya yi, omuyengeli gwaJehova okwi ihololele Josef mondjodhi e te mu lombwele ta ti: “Thikama, kutha okanona nayina, mu ye ontuku kuEgipiti e tamu kala hoka, sigo tandi mu tseyithile mu galuke, oshoka Herodes okwa hala okukonga okanona e ka dhipage.”
14 Opo ihe Josef okwa penduka e ta kutha okanona nayina, noya yi kuEgipiti uusiku mboka.
15 Okwa kala hoka sigo oosho Herodes a si. Shika osha gwanitha shoka sha popilwe kuJehova okupitila momuhunganeki gwe, a ti: “Omumwandje onde mu ithana mo muEgipiti.”
16 Opo nduno Herodes sho a mono kutya okwa kengelelwa kaayanekeli yoonyothi, okwa geye noonkondo. Okwa gandja elombwelo, opo aanona aamati ayehe yomimvo mbali okuuka pevi ya dhipagwe, muBetlehem nomiitopolwa yasho ayihe, shi ikolelela kethimbo ndyoka a lombwelwa kaayanekeli yoonyothi.
17 Kungawo, shika osha gwanitha shoka sha popilwe komuhunganeki Jeremia, ngoka a ti:
18 “MuRama omwa uvika ewi lyelilagano. ORakel ta lili oyana, noka li a hala okuhekelekwa, oshoka kaye ko we.”
19 Sho Herodes a si, omuyengeli gwaJehova okwi ihololele Josef mondjodhi, sho e li muEgipiti
20 e te mu lombwele ta ti: “Thikama, kutha okanona nayina e tamu shuna koshilongo shaIsraeli, oshoka mboka ya li ya hala oku ka dhipaga, oya sa.”
21 Onkee okwa thikama e ta kutha okanona nayina e taya shuna kuIsraeli.
22 Ihe sho Josef a uvu kutya Arkelaus oye a ninga omukwaniilwa gwaJudea, pehala lyahe, Herodes, okwa li a tila okushuna ko. Opo ihe sho a londodhwa kuKalunga mondjodhi, okwa yi koshitopolwa shaGalilea.
23 Okwa yi e ta kala moshilando Nasaret, opo oohapu ndhoka dha popiwa okupitila maahunganeki dhi gwanithwe, ndhoka tadhi ti: “Ota ka ithanwa Omunasareti.”*
Omanyolo gopevi
^ Nenge “Messias; Omugwayekwa.”
^ Nenge “omira.”
^ Tashi vulika sha za koshitya shOshihebeli “oshitutuma.”
