PaMateus 22:1-46
22 Jesus okwa popi ishewe nayo, ta longitha omathaneko, ta ti:
2 “Uukwaniilwa womegulu otawu vulu okufaathanithwa nomukwaniilwa, ngoka a longekidhile omwanamati oshituthihango.
3 Okwa tumu aapiya ye ya ka ithane mboka ya hiywa koshituthihango, ihe kaya li ya hala okuya.
4 Okwa tumu ko ishewe aapiya yamwe, ta ti, ‘Lombweleni mboka ya hiywa tamu ti: “Onda longekidha uulalelo, onda tsela oontsezi dhandje niimuna ya ondodhwa, naayihe oya pwa okulongekidhwa. Ileni koshituthihango.”’
5 Ihe mboka ya hiywa kaya li ye na ko nasha, noya yi, gumwe okepya lye, gumwe okongeshefa ye;
6 ihe ayehe yalwe, oya kwata po aapiya ye, noya ungaunga nayo nayi e taye ya dhipaga.
7 “Omukwaniilwa okwa geye noonkondo e ta tumu ko etangakwiita lye li ka dhipage aadhipagi mboka, noli fike po oshilando shawo.
8 Opo ihe okwa ti kaapiya ye, ‘Oshituthihango osha pwa okulongekidhwa, ihe mboka ya li ya hiywa inaya gwana we okukala po.
9 Onkee ano indeni noondjila ndhoka dha za moshilando e tamu hiya kehe ngoka tamu tsakaneke e ye koshituthihango.’
10 Aapiya mboka oya yi e taya ningi ngaashi ya lombwelwa, noya hiya kehe ngoka ya tsakaneke, kutya nduno omukolokoshi, nenge omuyuuki, nehala moka mwa li tamu ningilwa oshituthihango, omwa li mu udha aantu taya li.*
11 “Sho omukwaniilwa e ya mo, a tale aayenda, okwa mono omulumentu gumwe inaa zala onguwo yohango.
12 Onkee ano okwa ti kuye: ‘Kuume kandje, owe ya mo ngiini muno inoo zala onguwo yohango?’ Ka li e shi kutya na tye shike.
13 Opo nduno omukwaniilwa okwa lombwele aapiya ye ta ti: ‘Mu mangeni komaako nokomagulu e tamu mu umbile pondje momilema, moka ta ka lilagana nokwiikokota komayego.’
14 “Oshoka oyendji oya hiywa, ihe aashona owala ya hogololwa.”
15 Opo nduno Aafarisayi oya yi e taya kundathana, opo ya ningithe Jesus a popye sha sha puka.
16 Onkee ano oya tumu ko aalongwa yawo kuye pamwe naayambidhidhi yaHerodes, taya ti: “Muhongi, otu shi kutya ngoye omunashili, oho longo oshili kombinga yaKalunga, noiho lalakanene okupandika kaantu, oshoka iho tala keholokopo lyomuntu lyokombanda.
17 Tu lombwela nduno, mbela oto ti ngiini, osha uka* ngaa okufuta iifendela kOmukesari, nenge inashi uka?”
18 Ihe molwaashoka Jesus okwa li e shi shoka taya dhiladhila, okwa ti: “Aafudhime ne, omolwashike tamu makele ndje?
19 Ulukilii ndje oshimaliwa.” Oyo noye mu etele ondenari.
20 Okwa ti kuyo: “Ethano nedhina, ndika li li ko, olya lye?”
21 Oya ti: “OlyOmukesari.” Opo nduno okwa ti kuyo: “Ano shOmukesari shi peni Omukesari, naashoka shaKalunga shi peni Kalunga.”
22 Sho ye shi uvu, oya li ya kumwa, noye mu thigi po e taya yi.
23 Mesiku olyo tuu ndyoka, Aasadukayi, mboka haya ti kutya kaku na eyumuko, oye ya kuye e taye mu pula taya ti:
24 “Muhongi, Moses okwa tile: ‘Ngele omulumentu okwa si kee na aanona, omumwayina oku na okuhokana po omukulukadhi gwe, opo a valele omumwayina aanona.’
25 Opwa li aamwayinamati yaheyali, gwotango okwa hokana e ta si kee na aanona, nokwa thigile omumwayina gumwe omukulukadhi gwe.
26 Shoka osho wo sha ningilwa omutiyali nomutitatu, sigo ayehe yaheyali ya pu ko.
27 Hugunina, omukulukadhi ngoka naye okwa si.
28 Ano peyumuko, omukulukadhi ngoka ota ka ninga gwalye pokati kaalumentu mboka yaheyali, ngele ayehe oya li ye mu hokana?”
29 Jesus okwe ya yamukula ta ti: “Ne omwa puka, oshoka kamu shi Omanyolo nosho wo oonkondo dhaKalunga;
30 oshoka pethimbo lyeyumuko, aalumentu itaya ka hokana, naakiintu itaya ka hokanwa, ihe otaya ka kala ongaayengeli megulu.
31 Shi na ko nasha neyumuko lyaasi, inamu lesha nani kombinga yaashoka mwa lombwelelwe kuKalunga, sho a ti:
32 ‘Ongame Kalunga kaAbraham, Kalunga kaIsak, naKalunga kaJakob’? Oye Kalunga kaanamwenyo, ihe ke shi Kalunga kaasi.”
33 Sho ongundu yaantu ye shi uvu, oya li ya kuminwa omukalo gwe gwokulonga.
34 Konima sho Aafarisayi ya uvu nkene Jesus a tompo Aasadukayi, oye ya ye li ongundu.
35 Gumwe gwomuyo, ngoka a li e shi Ompango nawa, okwe mu tala po moku mu pula ta ti:
36 “Muhongi, oshipango oshinenenene shomOmpango oshinipo?”
37 Okwa ti kuye: “‘Hola Jehova Kalunga koye nomutima gwoye aguhe, nomwenyo gwoye aguhe* nosho wo nomadhiladhilo goye agehe.’
38 Shika osho oshipango oshinenenene noshotango.
39 Oshitiyali, she shi fa, osho shika: ‘Hola mukweni ngaashi wu ihole mwene.’
40 Oohapu dhaahunganeki nOmpango ayihe oya kankamena kiipango mbyoka iyali.”
41 Sho Aafarisayi ya li ya gongala pamwe, Jesus okwe ya pula ta ti:
42 “Otamu ti ngiini shi na ko nasha naKristus? Oye omuna gwalye?” Oya ti kuye: “OgwaDavid.”
43 Okwe ya pula ta ti: “Omolwashike nduno David a li a nwethwa mo kuKalunga, e mu ithane Omuwa, ta ti,
44 ‘Jehova okwa lombwele Omuwa gwandje a ti: Kuutumba kolulyo lwandje, sigo nda tula aatondi yoye kohi yoompadhi dhoye”’?
45 Ano ngele David okwe mu ithana Omuwa, ongiini nduno e li omwana gwe?”
46 Kapwa li nando ogumwe a vulu oku mu yamukula, nokuza esiku ndyoka, kapwa li nando ogumwe a kambadhala oku mu pula omapulo ga fa mpoka.
Omanyolo gopevi
^ Nenge “ya kuutumba poshitaafula.”
^ Nenge “oshi li ngaa pampango.”
^ Tala Omafatululo giitya.
