PaMateus 23:1-39
23 Opo nduno Jesus okwa popi nongundu yaantu nosho wo naalongwa ye, ta ti:
2 “Aalongimpango nAafarisayi oyi itula yo yene pondondo yaMoses.
3 Onkee ano ningeni ashihe shoka taye mu lombwele nokuvulika kusho, ihe inamu holela iilonga yawo, oshoka ohaya popi owala, ihe ihaya tula miilonga shoka haya popi.
4 Ohaya tsike yalwe omitenge omidhigu komapepe, ihe yo yene inaya hala oku dhi guma nando onomunwe gwawo.
5 Iilonga ayihe, mbyoka haya longo, ohaye yi longo ya monike kaantu, oshoka ohaya nenepeke iipakolwa yiipa, hoka ya nyola omanyolo, mbyoka haya zala yi li egameno, noonyemba dhoonguwo dhawo ohaye dhi ningi oonde.
6 Piituthi oye hole okukuutumba pomahala, ngoka ga nuninwa aayenda mboka ya simana, noye hole okukuutumba kiipundi yokomeho* moosinagoga,
7 noye hole wo okupopithwa momukalo gwi ikalekelwa pomahala gomalandithilo nokwiithanwa Muhongi* kaantu.
8 Ihe ne inamu ithanwa Muhongi, oshoka omu na owala Omuhongi gumwe, niishewe, amuhe aamwayinathana.
9 Shimwe ishewe, inamu ithana nando omuntu kombanda yevi ho, oshoka omu na owala Ho gumwe awike, Ngoka e li megulu.
10 Inamu ithanwa wo aawiliki, oshoka omu na owala Omuwiliki gumwe, Kristus.
11 Ihe ngoka omunene mokati keni oye na kale omuyakuli gweni.
12 Kehe ngoka ta inenepeke ota ka shonopekwa, nakehe ngoka ta ishonopeke ota ka nenepekwa.
13 “Yayee, aalongimpango nAafarisayi, aafudhime ne! molwaashoka omwa pata osheelo shUukwaniilwa womegulu, opo aantu kaaya ye mo, oshoka ne yene itamu yi mo, notamu keelele mboka ya hala okuya mo.
14 ——
15 “Yayee, aalongimpango nAafarisayi, aafudhime ne! oshoka ohamu taakana omafuta nomavi, opo mu likole omulongwa gumwe, ihe ngele mwe mu likola, ohamu mu ningi oshihakanwa shaGehenna* e mu vule.
16 “Yayee, aakwatiketi aaposi! mboka hamu ti: ‘Kehe ngoka ta gana kotempeli itashi ti sha; ihe ngele gumwe okwa gana koshingoli shotempeli, oku na okugwanitha po egano lye.’
17 Omagoya naaposi ne! Oshinipo sha simana, oshingoli, nenge otempeli ndjoka ya ningitha oshingoli shi kale oshiyapuki?
18 Shimwe ishewe, ohamu ti, ‘Kehe ngoka ta gana koshiyambelo itashi ti sha; ihe kehe ngoka ta gana keyambo, ndyoka li li ko, oku na okugwanitha po egano lye.’
19 Aaposi ne! Oshinipo sha simana, eyambo, nenge oshiyambelo shoka sha ningitha eyambo li kale eyapuki?
20 Onkee ano kehe ngoka ta gana koshiyambelo ota gana kusho nosho wo kukehe shoka shi li ko;
21 nakehe ngoka ta gana kotempeli ota gana kuyo nosho wo kuMwene gwayo;
22 nakehe ngoka ta gana kegulu ota gana koshipangelapundi shaKalunga nosho wo kuNgoka a kuutumba kusho.
23 “Yayee, aalongimpango nAafarisayi, aafudhime ne! oshoka ohamu gandja oshitimulongo shominti, shodili noshokumina,* ihe ihamu dhiginine iinima, mbyoka ya simanenena yomOmpango, ngaashi uuyuuki, ohenda nuudhiginini. Iinima mbyoka oyi na okugwanithwa po, ihe iikwawo oyi na wo okudhigininwa.
24 Ne aakwatiketi aaposi, mboka hamu dhindi mo omwe, ihe ongamelo ohamu yi nina po.
25 “Yayee, aalongimpango nAafarisayi, aafudhime ne! molwaashoka ohamu yogo oshitenga netiti kombanda, ihe meni lyeni omu udha olwiho nuukeeneidhiliko.
26 Mufarisayi ngoye omuposi, yoga tango meni lyoshitenga netiti, opo wo yi kale ya yela nokombanda.
27 “Yayee, aalongimpango nAafarisayi, aafudhime ne! molwaashoka omwa fa oombila dha paindwa olwaala olutokele tadhi monika nawa kombanda, ihe meni lyadho omwa udha iipongo yaasi nosho wo kehe shoka sha nyata.
28 Sha faathana, nane wo ohamu monika aayuuki kombanda, ihe meni lyeni omwa udha uufudhime nuukolokoshi.
29 “Yayee, aalongimpango nAafarisayi, aafudhime ne! molwaashoka ohamu tungu oombila dhaahunganeki, nohamu opaleke oombila* dhaayuuki
30 nohamu ti, ‘Ando otwa li ko pethimbo lyootatekulululwa, andola inatu tilahi pamwe nayo ombinzi yaahunganeki.’
31 Kungawo otamu shi koleke ne yene kutya, one oyana yaadhipagi yaahunganeki.
32 Manitheni ano shoka sha tamekelwe koohokulululwa.
33 “Omayoka noyana yomapili* ne, ongiini tamu vulu okuya ontuku epangulo lyaGehenna?*
34 Omolwoshinima shika, otandi mu tumine aahunganeki, aalumentu aanandunge naalongi. Yamwe otamu ke ya dhipaga noku ya alela komiti dhomahepeko, nayamwe otamu ke ya dhenga moosinagoga dheni noku ya hepeka miilando niilando,
35 opo mu kale mu na ondjo yombinzi yaamboka aayuuki, ndjoka ya tika kombanda yevi, okuza ngaa kombinzi yomuyuuki Abel, sigo okombinzi yaSakaria, omwana gwaBarakia, ngoka mwa dhipagele pokati kotempeli noshiyambelo.
36 Oshili tandi mu lombwele, iinima ayihe mbika otayi ka adha epipi ndika.
37 “Jerusalem, Jerusalem, omudhipagi gwaahunganeki, naamboka wa tuminwa owe ya dhipaga nomamanya. Olundji onda li handi kala nda hala okugongela aamwoye, ngaashi ondjuhwa hayi gongele uuyuhwena wayo kohi yomawawa gayo. Ihe kwa li we shi hala.
38 Tala, egumbo lyoye olya ninga eputu.
39 Ngame otandi ku lombwele kutya ito ka mona ndje nando, okuza ngashingeyi, sigo oosho to ka tya, ‘Ngoka te ya medhina lyaJehova, na lalekwe nuuyamba!’”
Omanyolo gopevi
^ Nenge “mbyoka iiwanawa.”
^ Nenge “Rabbi.”
^ Tala Omafatululo giitya.
^ Ominti, odili nokumina oyi li iigwanga, mbyoka ya li hayi longithwa okutowaleka iikulya.
^ Nenge “oombiladhimbuluko.”
^ Nenge “yomayoka.”
^ Tala Omafatululo giitya.
