Ngaashi twa kala noku shi kundana, aakwatelikomeho oyendji yomalongelokalunga oya kala nokuladhipika aantu ya kuthe ombinga miita mbyoka yi li pokati kaUkraine naRusia. Ndhindhilika nkene aakwatelikomeho yamwe yomalongelokalunga ya kala taya ambidhidha oombinga mbali ndhoka tadhi kondjithathana:

•    Omuwiliki gwongeleka yOrthodox, gwedhina Epiphanius I gwomoshilandopangelo shaUkraine, Kyiv, okwa popi moshifokundaneki shedhina The Jerusalem Post, mo 16 Maalitsa 2022 a ti: “Otwa pandula omapendafule ngoka taga gamene oshilongo shetu, shaUkraine, komutondi . . . Omitima dhetu odhi li pamwe nane, otatu mu galikanene notwi ilongekidha aluhe oku mu yambidhidha.”

•    Mo 3 Apilili 2022, oshikundaneki shedhina Reuters osha ti: “Omuwiliki gwongeleka yOrthodox moRusia okwa ningile aakwiita yaRusia elongelokalunga li ikalekelwa mOsoondaha, nokwe ya ladhipike ya kondjele oshilongo shawo, ‘oshoka Aarusia oyo owala taya vulu oku shi ninga,’ omanga epangelo tali tsikile okukondjitha Ukraine.”

 Mbela Aakriste oye na ngaa okukutha ombinga miita? Ombiimbeli otayi ti ngiini?

 Ombiimbeli otayi ulike kutya aalanduli yashili yaJesus Kristus, ihaya kutha ombinga miita.

•    “Shuna mo egongamwele lyoye molumpangwa, oshoka ayehe mboka taa longitha egongamwele, oyo otaa ka sa kegongamwele.” — Mateus 26:52.

   Mbela omuntu ngoka ha yambidhidha iita nenge ha kutha ombinga muyo ota vulika ngaa koohapu dhaJesus?

•    “Oshipango oshipe otandi shi mu pe, mu holathane. Ngashi naanaa nangame nda kala ndi mu hole, osho nane wo omu na okuholathana. Ngele omu holathane, nena aantu ayehe otaa ka dhimbulula kutya one aalongwa yandje.” — Johannes 13:34, 35.

   Mbela omuntu ngoka ha yambidhidha nenge ha gama ombinga uuna pu na iita ota ulike ngaa ohole ndjoka Jesus a ti kutya oyo tayi ka ndhindhilikitha mo aalongwa nenge aalanduli ye?

 Opo wu mone uuyelele wa gwedha po, lesha oshitopolwa shi na oshipalanyolo, “Is War Compatible With Christianity?”

 Mbela kunena Aakriste otaya vulu ngaa okuyanda okukutha ombinga miita? Eeno. Ombiimbeli oya hunganeka kutya pethimbo lyetu, ano ‘momasiku ga hugunina,’ otaku ka kala aantu yomiigwana ayihe kombanda yevi, mboka ‘itaaye ki ilongekidhila we olugodhi,’ metsokumwe naashoka Jesus a longo aantu. — Jesaja 2:2, 4.

•    Opo wu mone uuyelele wa gwedha po, lesha iitopolwa yOshungolangelo yi na oshipalanyolo, “Kalunga okwa tala ko ngiini iita?”

 Masiku Jehova, a ‘Kalunga kombili,’ ota ka longitha epangelo lye a hupithe aantu “methiminiko nomepiyagano.” — Aafilippi 4:9; Episalomi 72:14.

•    Opo wu tseye kutya ote ke shi enda ngiini, tala okavidio Uukwaniilwa waKalunga oshike?