Elunduluko lyonkalo yombepo inaali monika nando onale muuyuni awuhe, olya li lya ndhindhilikwa muJuli 2022:

•   Mo 25 Juli 2022, ehangano lyokukundaneka lyedhina CNN Wire Service olya ti: “Shika osho oshikando oshitiyali momwedhi nguka aakwanepangelo moChina taya londodha aantu kutya miilando tayi ihilile po 70, otamu ka kala mu na uupyu wa londa pombanda noonkondo.”

•   Mo 17 Juli 2022, oshifokundaneki The Guardian, osha ti: “Molwaashoka moEuropa omu na uupyu inawu monika mo nando onale, omakuti otaga pi po nayi miilongo oyindji menenevi ndyoka.”

•   Mo 24 Juli 2022, oshifokundaneki The New York Times osha ti: “Iilando oyindji moAmerika, mOsoondaha, oya li yi na uupyu inawu monika mo nando onale.”

 Mbela shoka otashi ti shike? Mbela osha hala okutya masiku kombanda yevi itaku ka kala we iinima yi na omwenyo? Ombiimbeli otayi ti ngiini?

 Osho lela. Uupyu mboka owa kwatelwa mo miiningwanima mbyoka Ombiimbeli ya hunganeka kutya otayi ka ningwa pethimbo lyetu. Pashiholelwa, Jesus okwa hunganeka kutya otatu ka mona iinima “iitilithi iinene” nenge tu tye “iinima tayi tilitha noonkondo.” (Lukas 21:11, paMbiimbeli yo-Good News Translation) Elunduluko lyonkalo yombepo muuyuni, olya ningitha yamwe ya kale ya tila kutya shoka aantu taya ningi otashi ka yona po evi.

 Oku na okukaliwa. Kalunga okwa shiti evi, opo aantu ya kale ko sigo aluhe. (Episalomi 115:16; Omuuvithi 1:4) Ita ka etha aantu ya hanagule po evi, ihe pehala lyaashono, ota ka ‘hanagula po mboka taa yonagula po evi,’ ngaashi e shi uvaneka.—Ehololo 11:18.

 Natu ka taleni ishewe komahunganeko gaali moka Kalunga uvaneka shoka ta ka ningila evi:

•   “Ombuga nomalondo otaga ka nyanyukwa, ontale otayi ka tundulukwa nokutemuna oongala.” (Jesaja 35:1) Kalunga ita ka pitika nando evi li mbugale, ihe ota ka opaleka iitopolwa yalyo mbyoka ya yonagulwa kaantu.

•   “Evi oho li sile oshimpwiyu, sho ho li tekele; oho li yambapaleke.” (Episalomi 65:9) Kalunga ota ka ninga evi oparadisa.

 Opo wu mone uuyelele wa gwedha po nkene elunduluko lyonkalo yombepo tali gwanitha po ehunganeko lyOmbiimbeli, lesha oshitopolwa “Climate Change and Our Future—What the Bible Says.”

 Opo wu mone uuyelele wa gwedha po kombinga yehunganeko li na ko nasha nokwoopalekulula evi, lesha oshitopolwa “Who Will Save the Earth?”