Iikolokosha mbyoka hayi ethithwa kopolotika, oya etitha omaipulo maantu muuyuni awuhe.

•   MoMeksiko, aanapolotika 39 mboka ya li aaulikwahogololwa yoongundu dhopapolotika oya dhipagelwa momadhipago gopashiyakela, omwaalu ngoka inaagu uvika nale moshilongo shoka. Shono osha li sha halutha nokupiyaganeka aantu moshilongo moka, noshe ya ningitha kaaya kale we ye na ko nasha nomahogololo gomo 2023-2024.

•   Omasiku opo ga zi ko, moEuropa omwa kala tamu inyenge iikolokosha mbyoka hayi etithwa kopolotika, mwa kwatelwa onkambadhala yedhipago lyopashiyakela, ndyoka lyaale li ningilwe ominista yotango yaSlovakia, momasiku 15 Mei 2024.

•   Momasiku 13 Juli 2024, aantu moAmerika oya thigwa kaaye na iitya nomatumbulo, omolwonkambadhala yedhipago lyopashiyakela ndjoka ya ponyo, ya li ya odhekelwa ngoka a li nale omupresitende gwaAmerika, tatekulu Donald Trump.

 Omolwashike iikolokosha mbyoka hayi etithwa kopolotika tayi ende tayi indjipala noonkondo? Mbela opu na ngaa esiku limwe nayi ka hule? Ombiimbeli otayi ti ngiini?

 Ombiimbeli oya adhika nale ya popya kutya pethimbo lyetu, ndyoka hali ithanwa ‘omasiku ga hugunina,’ aantu oyendji otaya ka kala ye na iikala mbyoka hayi etitha iikolokosha nosho wo oontamanana.

•   Ombiimbeli otayi ti: “Omasiku omahugunina otaku ya omathimbo omadhigu. Oshoka aantu otaa ka kala . . . ihaa pandula, aakaanuuyuuki, . . . aayoni yeuvaneno, . . . yaa na olukeno nohenda, . . . aakotokeli, ihaa yawala, haa tuwalala.” — 2 Timoteus 3:1-4; yelekanitha OB-1954.

 Ombiimbeli oya hunganeka wo kutya aantu otaya ka tsa ondumbo nomapangelo nosho wo kutya omakuyunguto gopapolotika otage ki ihanena apuhe muuyuni, pethimbo lyetu. (Lukas 21:9) Ihe nonando ongawo, iikolokosha yopapolotika nosho wo omatopoko itayi kala sigo aluhe.

 Ombiimbeli oya popya kutya Kalunga ota ka pingena po omapangelo agehe gopantu, nepangelo lye mwene lyomegulu.

•   Ombiimbeli otayi ti kutya ‘Kalunga komegulu ota ka dhika po oshilongo shoka tashi ka yonagula po iilongo mbyoka ayihe yilwe, nosho shene otashi kala sigo aluhe.’ — Daniel 2:44.

 Uukwaniilwa waKalunga otawu ka hanganitha shili aantu ayehe, notawu ka eta ombili muuyuni awuhe.

•   Omupangeli gUukwaniilwa mboka, Jesus Kristus, ota ithanwa e li “Omuwa gwombili” nota ka shilipaleka kutya ‘oshilongo she otashi kala aluhe shi na ombili.’ — Jesaja 9:6, 7.

•   Nokuli ngashingeyi, mboka ye li kohi yepangelo lye otaya ilongo nkene ye na okukala aanambili. Oshizemo, Ombiimbeli oya ti: “Otaa ka hambula omagonga gawo, omatemo nomagongamwele gawo iimwitho. Iigwana itayi ka ya we kiita, itayi ilongekidhile we olugodhi.” — Jesaja 2:3, 4.

 Opo wu ilonge oshindji, lesha oshitopolwa “What Will God’s Kingdom Accomplish?” e to tala okavidio Uukwaniilwa waKalunga oshike?