MOsoondaha yomasiku 20 Novomba 2022, omo omutumba gu na ko nasha nomalunduluko gonkalo yombepo gwedhina COP27 United Nations Climate Change Conference gwa hulu. Nonando opwa li pwa ningwa euvathanotsokumwe lyokukwathela pashimaliwa iilongo mbyoka ya hepa, opo yi vule okuungaunga niiponga mbyoka hayi etithwa komalunduluko gonkalo yombepo, oyendji oye shi ndhindhilike kutya omakwatho ngoka itaga vulu okukandula po uupyakadhi mboka.

•    Momasiku 19 Novomba 2022, António Guterres, amushangandjayi gwIigwana ya Hangana, okwa popi a ti: “Onda nyanyukilwa etokolo li nasha nokukwathela pashimaliwa iilongo mbyoka hayi iyadha moshiponga, omolwelunduluko lyonkalo yombepo. Nonando ongawo, shoka hasho ekandulopo lyomukundu . . . Opulanete yetu yevi natango oyi li moshiponga.”

•    Momasiku 20 Novomba 2022, Mary Robinson, ngoka a li omupresidende gwaIrlanda nosho wo omukuluntu guuthemba womuntu gwIigwana ya Hangana, okwa popi a ti: “Ngele tashi ya ponkalo yombepo, uuyuni owu li pokati kamumpaka namumpaka.”

 Aagundjuka oyo unene hayi ipula kombinga yonakuyiwa. Ihe mbela iigwana otayi vulu ngaa okwiimanga kumwe, yi gwanithe po euvaneko lyawo lyokukandula po uupyakadhi mboka hawu etithwa konkalo yombepo? Ombiimbeli otayi ti ngiini?

 Ombiimbeli otayi tu lombwele kutya nonando iigwana oyi kambadhale okulonga nuudhiginini, opo yi kandule po uupyakadhi mboka hawu etithwa konkalo yombepo, uushili owo kutya otayi ka hulila mokwena kwa thita. Tala komatompelo ngaka gaali, wu mone kutya omolwashike:

•    “Shoka sha goyoka, itashi vulu okuuthwa.” — Omuuvithi 1:15.

   Shoka tali ti: Omapangelo itaga vulu okugwanitha po shoka ga hala okuninga, oshoka aantu inaya uthwa yi ipangele yo yene. (Jeremia 10:23) Nonando iigwana oyi imanga kumwe, itayi vulu okukandula po omaupyakadhi ngoka ge li muuyuni kutya nduno oyi kambadhala shi thike peni.

•    ‘Aantu otaa ka kala nokwiihola, ye hole eliko naayoni yeuvaneno.’ — 2 Timoteus 3:2, 3, yelekanitha OB-1954.

   Shoka tali ti: Ombiimbeli oya ulika sha yela kutya aantu oyendji yopethimbo lyetu, otaya ka kala yi ihole yo yene noihaya longele kumwe, ya etele yalwe uuwanawa.

 Onakuyiwa yevi lyetu inayi ikolelela komauvaneko ngoka haga ningwa komapangelo gopantu. Kalunga okwa hogolola Omupangeli guuyuni a dhenga mbanda, Jesus Kristus. Ombiimbeli oya popya kombinga ye ya ti:

•    “Epangelo olye; oli li komapepe ge. Ota lukwa Omupukululi omukumithi, Kalunga omunankondo, He yomuukwaaluhe, Omuwa gwombili.” — Jesaja 9:6.

 Jesus oye Omukwaniilwa gUukwaniilwa waKalunga nenge tu tye gwepangelo lyomegulu. (Mateus 6:10) Oku na oonkondo, uunongo nehalo lyokusila oshimpwiyu evi nosho wo aantu mboka ye li ko. (Episalomi 72:12, 16) Kohi yewiliko lye, epangelo ndika lyomegulu otali ka ya moshipala mboka taya “yonagula po evi” noku li galulila monkalo ombwanawa. — Ehololo 11:18; Jesaja 35:1, 7.

 Opo wu mone uuyelele owundji kombinga yaashoka tashi vulu shili okukandula po uupyakadhi mboka hawu etithwa konkalo yombepo, lesha oshitopolwa “Climate Change and Our Future — What the Bible Says.”